بنکەو ئەهوورای بەردش ڕاوە
ڕۆ شەمەی 98.9.23 جە زانگا کورساننە جە شاروو سنەینە بە بەشداری جەماعەتوو فەرهەنگوو ئەدەبیاتی و وانیارەکاو دانشگای کۆڕێوە پەی ئەدەبیاتی هەورامی لوا ڕاوە و ڕێز گیریا جە شاعیر و نویسەر ڕەئووف مەحموود پووری. سەرەتاو بەرنامەکەی دەعوەت کریا جە بڕێ جە شاعرەکاو هەورامانی پێسەو: مۆمن یەزدان بەخش، ئەحسەن ڕەشیدی، جەماڵ قادر پور، ژوان ڕەحیمی، شەرا، مەهوەش دروستکار، عەباس غەریبی، بێهروز م پور، حسەین وەفایی سەعدی غەریبی و... و هەرکام چن شیعرێشا پێشکەشوو بەرنامەکەی کەردێ. شۆنیشەرە پەنێلیوە لوا ڕاوە بە باس ولەیەکدایوەو کتێبەکاو و شیعرەکاو کاک ڕەئووفی. سەرەتا سابیر عەزیزی سەروو ڕەوتوو شیعرێ تازێ هەورامیێ و کاریگەری دەقەکا و زەڕنەو ئاسۆی و هورپڕای گەچ و تەختەی سەروو ڕەوتوو تازەگەری شیعرێ تازێرە قسێش کەردێ. دماتەر دوکتور نەجمەدین جەباری، مامۆساو بەشوو زوان و ئەدەبیاتی فارسی، سەروو کتێبوو پیرشالیاری و ئوستوورەی قسێش کەردێ و جە کارەکاو ڕەئووف مەحموود پووری پێسە بنەمایێ پەی ئوستوورەی نامێش بەردێ و واتش: ئینە تاوۆ هەنگامێوە بۆ پەی متەی دیالۆگ و دیسکورسەکای تەری بابەتوو ئوستوورەی کوردینە و بە ڕاسی ئی هەنگامێ و ئی زەحمەتە کارێوەن بە ئاسانی مەکریۆ ئێمە چەنەش گوزەر کەرمێ. بەشوو کۆتایی پەنێلەکەی بە لەیەک دایوەو هەردوە دەقە شیعریەکاو زەڕنەو ئاسۆی و هورپڕای گەچ و تەختەی تەمامیا و فەرشید ڕۆستەمی بە پاو بڕێ ئا تێئۆریە ئەدەبیا کە سەروو شیعرێ و بە تایبەت شیعرێ تازێ وچینێنێ، بەراوردوو دوە کتێبەکەیش کەرد.
بەشی دمایینو کۆڕەکەی کاک ڕەئووف چن دەیێقێ کۆتانە دەس وەشیش کەرد جە گردوو زەحمەت کێشاو ئی کۆڕیە و ئی خاڵێش وستە وەروو باسی کە ئەگەر من تا ئیسە کارانێوەم کەردێبا هنوو تەنیا من نینەنێ و پێوەشا هەن بە سامانێوە فەرهەنگیێ کە جەماعەتێ ساحیبێشنێ و ئومێدەوارنا بەش بە حاڵوو وێم هەنگامێوەم هورگێرتێۆ پەی خرمەتی و چیوێ سروشتین ئەگەریچ کەم و کۆڕی و نەقس کارەکامنە بۆ.
@Ahura_uok977
