امير المؤمنين ع يخاطب الزهراء ع وهي في قبرها…
… ..
مشتاگلج … يالبية طيبج زارعة
مشتاگلج ... كد رحمة الله الواسعة
يا فاطمة .. يا فاطمة… يافاطمة
… ..
يم سوالف دافية وتكطر حنان
شرد اسولف عنج ايحير اللسان
انت رحمه امن الاله ابكل زمان
وبعد عينج ما بقت رحمة وامان

وي موتج … مات الورد يالغالية
وي موتج … طاحت شمسنة العالية
متألمة… متألمة… متألمة
… ..

يل صفاتج تختلف عن كل صفات
ابروحتج كل معنى ماظل للحياة
مو عجيبة الكون يبجيلج فرات
ومو عجيبة الفرح بعدج ذكره مات

حزنانه… لمصيبتج دنيانه
حزنانه… ارض وسمة ويانه
تبجي السمة... تبجي السمة... تبجي السمة
… .
انتي يازهرة جنان امن الزهور
امچانچ البستان مو ذيج الاكبور
ما مصدك ميته والكبرج أزور
والج اقرة الفاتحة واشعل بخور

معقولة … الفاتحة اقرالج
معقولة ... جوه التُراب أخيالج
شهل خاتمة… شهل خاتمة…شهل خاتمة
… .
يالتركتني وانه بعازه الهواج
داري ظلمة يالزجية ابلا ضواج
علّيتي ما تشفة الا من دواج
انه ميت بس جسد باقي وراج

تدريني … ما اهو اعيش أبدونج
تدريني … للموت احن وأعيونج
حلم ارسمة… حلم ارسمة… حلم ارسمة
… .
صورتج بعيوني مكسورة ظلوع
وحركة الباب بحقد ذيج الجموع
روحي تاخذني الحجرتج بالدموع
اعلك ابحزاني يا زهرة الشموع

كل ليلة… ادخل حجرتج ناعي
كل ليلة… اللطم عليج اظلاعي
وخدي اللطمة… وخدي واللطمة ..وخدي اللطمة

……
بية حسرة الموتتج حسرة يتيم
ماتت امة وعافته بحزنه يهيم
الدنية من بعدج احسنهة جحيم
يالمشيتي بظلع مكسور وألليم

يالغالية… روحي الج مشتاكة
يالغالية… كولي اشوكت نتلاكة
يالعالمة… يالعالمة… يالعالمة
… .
الحمدلله رب العالمين
اللهم صل على محمد وال محمد
موسى الخادم