رامین احمدي
کلونه وړاندې کله، چې امریکایي ځواکونه په افغان جګړه کې له پرلپسې ماتیدونکو تیندکونو سره مخ شول او په تعقیب یې په کال ۲۰۱۴م کې د خپلو لوی شمیر پوځيانو د ایستلو عملیه پلې کړه؛ په تعقیب یې دلته د فکري، مذهبي او تکتیکي جګړې یوه بله څپه پیل کړه.
هغوی د فکري برخې لپاره کرایي ملا نما څیرې، نفوذي شخصیتونه، رسنۍ او زدکړه ییز مرکزونه وکارول؛ مذهبي برخه کې یې بیا هم په کور دننه او بهر ملکونو کې د علماوو په نامه لویې غونډې وکړې او د امریکا په مشري د کابل حکومت پر وړاندې یې جګړه ناروا تعبیر کړه او د تکتیکي جګړې لپاره یې بیا له سلفي مفکورو څخه متاثره کسانو څخه د داعشي ملیشو په نوم قاتلې لښکرې جوړې کړې.
هغوی په ننګرهار، کنړ، جوزجان، سرپل او یو شمیر نورو ولایتونو او لرې پرتو سیمو کې، عام خلک په مرګونې بڼه وځورول او تر یوه سپیڅلي نوم لاندې یې د مجاهدینو د رنګ بدي پټې او ښکاره هڅې وکړې.
امارت ورته د خبرو وړاندیزونه وکړل، خو له بار بار غوښتنو وروسته بیا هم د تکبر له غونډکۍ څخه راشیوه نه شول او هرې غوښتنې او وړاندیز ته یې له کوم التفات پرته یې، همداسې خپل وحشت او دهشت ته دوام ورکړ.
امارت هم د مجبوریت له مخې، په داسې حال کې چې له امریکایي اشغالګرو او د هغوی له داخلي ملګرو سره تونده جګړه کې ښکیل وه، د دوی پر وړاندې یې هم وسلې ته لاس کړ؛ چې وروسته دوی هم د هغوی (ناټو او امریکایي ایتلاف) کرایي جګړه ماران وختل او په ننګه به یې کله د کابل حکومت او کله هم د ناټو هوایي ځواکونو ملاتړ ته را دانګل.
له سختې مبارزې وروسته د دغې فتنې مخه په ټول توان سره ونیول شوه، مشران یې ووژل شول، ملیشې یې تار ومار شوې او ځینو یې هم له امارت سره د مباهلې په کولو سره، ککرې له لاسه ورکړې.
هوکې؛ امارت واکمن شو، خو لا هم د بهرنیو استخباراتي کړیو دا کرل شوی تخم، په افغان خاوره کې ژوندی پروت وو؛ ځای ځای زیانباره بریدونه او چاودنې روانې وې او عام ولس او د ا. ا. ا منسوبینو ته یې زیانونه واړول.
ا. ا. ا هم لاس تر زنې ناسته غوره نه کړه، بلکې پر وړاندې یې پخوانۍ توره یوځل بیا راوخیسته، سلګونه پټې او ښکاره ملیشې یې لمنځه یووړې، زرګونه یې د اسارت په ګروګان کې راوستل او لسګونه نور چې د کابل ادارې پټ جنګیالي یا هم د ګاونډیو هیوادونو واردات وو، له هیواده تیښتې ته اړ شول.
ویښو استخباراتي ځواکونو د دوی سرلاري یو یو په نښه او د افغانستان د پټو او ښکاره غلیمانو ټولې مرموزې دسیسې یې تس نس کړې.
دا دی افغان ویښو ځواکونو د داعشي خوارجو وروستۍ هیله هم د ابدي نابودي پر لور سوق کړه او نور یې د تل لپاره هیوادوالو ته د هوسا، مطمئن او سوکاله مسکن د برابریدو ارمغان ور پوره کړ.
لوستونکیه! د افغانستان تاریخ که له پیله تر پایه را وسپړې، درته څرګنده به شي، چې دلته له تیرو پیړیو راهیسې وخت پر وخت هغوی سر خوړلی، چې د الله ج د سپیڅلو بندګانو پر وړاندې یې پاڅون ته ملا تړلې او عملاً یې مسلمانې پرګنې تر نیواک لاندې نیولې دي.
دلته ګرګین خپل سر کیښووده، دلته مکناټن هم خپلو هیلو ته ونه رسیده؛ د همدې خاورې غزنوي، میرویس نیکه، شاه اشرف، احمد شاه بابا او ګڼو اتلوالو بچیو په سیمه کې د هسکې شملې حکمراني وکړه او د افغان اتلولي یې له پیړیو تر پیړیو نسلونو نسلونو ته عبرتناکه تاریخي کیسه کړه.
امام شهاب الدین بغدادي په خپل کتاب(معجم البلدان ج۲ ص۴۰۱ملک نمبر۴۱۶۴) کې لیکي: خراسان یو پراخه ملک ده اوبیا لیکي «عن شریک بن عبدالله انه قال: الخراسان کنانة الله اذاغضب علی قومٍ رماهم به» ژباړه: له شریک بن عبدالله نه روایت ده هغه وایی: خراسان دالله چانټه ده، کله چې الله ج یو قوم ته په غضب شي، په همدوی یې ولي/ لمنځه وړي.
څوکاله وړاندې دامریکا دسمندري ځواکونو دقول اوردو قومندان «چوک کولک» ولیکل: « ډیرو هڅې کړې، خو هیڅوک هم د افغانستان په لاندې کولو نه دي بریالي شوي؛ موږ به هم د هغوکسانو په لیست کې راشو، چې په دې کار کې پاته راغلي»
د هغوی سرلارو تل ویلي چې: «افغانستان دامپراتوریوهدیره ده»
خراسانه! ویاړ دې مبارک دعربی ژبې مشهوره مقوله ده: والفضل بماشهدبه الاعداء.
مونږ که وړمه ورځ انګریزان ځغلولي وه، پرون مو روسان مات کړل او نن مو د امریکا په مشرۍ ټوله کفري ټلواله تیښتې ته اړ کړه؛ نو همدې ټولو ته په کتو سره ویلای شو چې، د بهرنیانو پاتې شونې استخباراتي ملیشې که هرڅوک، په هر نامه او هره سیمه کې وي؛ له کوم ځنډ پرته به د الله ج په نصرت، د مظلوم ملت په ملاتړ او د هیواد د اتلوالو سرتیرو په لاس به ورسره سخت ترین حساب کتاب کیږي.
ان شاءالله
https://t.me/Almersaad313
