جيتك بهالليل وحدي وحافية
يابو الأكبر يبو حچاية الدافية
..............
وحدي نص الليل يم جثتك اجيت
نوبة اوگع نوبة اوگف مادريت
والله تعبانة بكثر ماني بچيت
خوية يم چثتك وگعت اتمدديت

وانت نايم خوية نوم العافية
جيتك بهالليل وحدي وحافية
................
خوية مثلي امصاب ماشافت مرة
كل اهلهه ذبحوهم بالسرة
واحد اعلة الماي ايدة امبترة
وانت جثتك ياحبيبي امطشرة

وأنه متسلبة واجيتك لافية
جيتك بهالليل وحدي وحافية
................
شرد اگلك يابو الأكبر عالخيام
والله مابية اسولف اي كلام
بس اگلك فرهدونة والسلام
وهسة ابشرك عالترب گمنة ننام

والنساء من الصبح ماغافية
جيتك بهالليل وحدي وحافية
..............

والله فگدك يابو الأكبر مو سهل
مرة اني وتدري بية شحتمل
گمت ادور خاف ضايع اي طفل
هاك شوف ايدي دماية من الحبل

گربلة اشتعلت شعل مو صافية
جيتك بهالليل وحدي وحافية
................
خوية شوف ايدية بالدم سايحة
امدلله وياك چنت البارحة
خوية جيتك اقرة ليك الفاتحة
غصب باچر انه عنك رايحة

وانت تعرف علتي مو خافية
جيتك بهالليل وحدي وحافية
.................

الخادم عمار الساعدي