شهر الدمع يم الضلع هل اعليج
وام الحزن ظلت تون تنظر ليج
ونن سوى بطف نينوى
عالظل رميه وغالي مولاتي اعليج
*****
يم الحسن مولاتي يم الاحزان
بين عليج هلال شهر العطشان
تنزل دمعتج دمه فوگ الاوجان
بيمن يذكرج يبت سيد الاكوان
طف الدمه يافاطمه اتذكرينه
وظل عالثره ابنج تره مگطعينه
يحن الگلب دمعج يصب
عالظل رميه وغالي مولاتي اعليج
*****
من طاح ابواليمه او هوى بالحومه
مگطع وذر بالطف غرگ بدمومه
بصيوانها زينب بقت مهمومه
محد يجيها يوصل الها علومه
بت حيدره اتاني تره ايرد ليها
اوياها الحرم نص الخيم اتباجيها
ادگ عالصدر ام الخدر
عالظل رميه وغالي مولاتي اعليج
*****
لزينب يرد يصهل وخالي الميمون
جنه يگلها طاح اخيج يم عون
ركضت الحره اوي الحرم ركض جنون
صوب الحسين بصوت عالي ينادون
يبن الطهر بعد الظهر مارديت
ردتك ترد بسيفك تهد يل ماجيت
لمن رحت حيره حرت
عالظل رميه وغالي مولاتي اعليج
*****
جنتي جريبه من الولد يالزهره
شفتي الشمر مولاتي گاطع نحره
وجسمه بقه دامي اعله وجه الغبره
وخيل العده شفتيها داست صدره
ويمه تجي بنت الوصي يا فاطمه زينبكم
المدمع يصب يلوج الگلب وتنادي يمصيبتكم
ماتنحمل دمعي يهل
عالظل رميه وغالي مولاتي اعليج
******
تنسين كسر ضلوعج وحرگ الدار
لمصاب ابنج وبن سيد الاطهار
نار البابج والخيم نفس النار
الاشرار ذوله ولد ذيج الاشرار
نفس الرجس الجانت امس بينت زين
ماكو فرق نفس الحرق يم حسين
مايطفه ابد ليوم الوعد
عالظل رميه وغالي مولاتي اعليج
******
بشهر الحزن شيعتكم الوفايه
تنصب الولدج يالوديعه قرايه
وانتي يبنت الهادي ادرى بهايه
بكل مجلس تحضرين يمنه هوايه
وكت النعي يصير البجي اوي الدمعه
يوم الحشر هيه الذخر يالبضعه
ياعامه تنزل دمه
عالظل رميه وغالي مولاتي اعليج
******
خادم اهل البيت /ابومحمد العاشور( 07810010732)