Jiemurat Mambetkarimov | PDP University

Hurmatli va aziz ustozlar!

Bugungi bayram sizlarni nafaqat tabriklash imkoniyati, balki ko'proq sizlarning yosh avlodni tarbiyalash orqali insoniyat kelajagini qurish kabi buyuk missiyangizni e'tirof etish va sizlarga bo'lgan hurmatimizni bildirish imkoniyatidir.

Ustoz va murabbiylik - bu san'at. Inson ongini va xarakterini shakllantirish san'ati, bilim olish va izlanishlarga o'rgatish san'ati. Siz beradigan boylik, shogirtlaringiz ongida va ko'nglida mangu qoladi, uni hech kim tortib ola olmaydi.

Ustozlik qilish oson ish emas albatta. Katta sabr, sadoqat va tinimsiz izlanish talab qiladi. Kundalik turmush tashvishlari bilan sizning qilayotgan mehnatingizning asl mohiyati sezilmay qolishi, ko'pchiligimiz uni oddiy majburiyatday qabul qilishimiz mumkin.

Lekin bilamizki, siz bunga qaramasdan jamiyatimiz kelajagini qurishda davom etasiz va sizning har bir harakatingiz, har bir darsingiz, har bir maslahatingiz muhim.

Bugun sizga chin ko'ngildan minnatdorchilik bildiramiz. Har bir kuningiz bugungiday hurmat-izzatga, iliq so'zlarga boy bo'lsin!

Qadrli ustozlar, bayramingiz muborak bo'lsin! Sizlarga mustahkam sog'lik, tugamas kuch-g'ayrat va ilhom, oilangizga baxt-saodat, ishlaringizga muvaffaqiyat tilaymiz!

🎬 Bugun talabalarimiz bilan "Xususiy universitetlarga ishonsa bo'ladimi?" mavzusidagi teleko'rsatuvda ishtirok etdik.

Toshkent telekanalining "Gap chiqdi" ko'rsatuvida o'z fikrlarimiz va tajribalarimiz bilan qatnashdik.

Faol talabalarimizga minnatdorchilik bildiraman!

Sizlarning yutuqlaringiz va e'tiroflaringiz bizga yanada ilhom bag'ishlaydi va PDP University har bir talaba uchun o'z salohiyatini ishga soladigan maskan bo'lishi uchun bor kuchimizni sarflaymiz.

📺 Ko'rsatuv bugun soat 21:30 da efirga uzatiladi.

🔄 Katta xursandchilik bilan sizlarga bitta yangilikni bo'lishmoqchiman: ajoyib o'qituvchilarimizdan biri Zubayda Temirova PhD darajasi ilmiy ishlarini amalga oshirish uchun POSCO granti sohibi bo'ldilar!

Bu grant o'qituvchilarimiz mehnatlarining jahon miqyosida tan olinishi va universitetimizning akademik sohadagi o'rnini ko'rsatadi.

Zubayda Temirovani bu muhim yutuq bilan tabriklaymiz va kelajakda IT sohasiga katta-katta ilmiy hissalarini qo'shishlarini kutib qolamiz!

Bugun UNICORN-2.0 grantining ilk sohiblarini aniqlash va taqdirlash jarayoni bo'lib o'tdi. Buning uchun xodimlarimiz kun bo'yi - ertalabdan yarim kechasigacha tinmasdan ishlashdi. Dastlabki uchta bosqichdan muvaffaqiyatli o'tib kelgan nomzodlarning har biri bilan alohida, sinchkovlik bilan suhbat o'tkazildi.

Grant sohiblarining har biri tahsinga loyiq. Ularning ko'nglidagi va ko'zlaridagi otashni ko'rib, kelajakda jamiyatimiz rivojiga katta hissalarini qo'shishiga shubhamiz qolmadi.

Bu loyihaning asosiy g'oyasi - "yaxshilik zanjiri" tamoyiliga asoslangan. Chunki loyiha homiylarining bu mablag'larni kimningdir bugungi ehtiyojlarini qondirishga sarflamasdan, ta'limga sarflashida shu maqsad bor. Bu yoshlarimiz ertaga katta muvaffaqiyatli insonlar bo'lib yetishsa, o'zlari kabi minglab yoshlarga ham yordam berishadi va biz bu onlarni intizorlik bilan kutamiz.

UNICORN-2.0 grantining ilk sohiblarini yana bir bor tabriklayman va ularga ta'lim olish yo'lida muvaffaqiyatlar tilayman! Bunga o'z hissalarini qo'shayotgan homiylarga va PDP University jamoasiga o'z minnatdorchiligimni bildiraman.

Ta'lim va millat farovonligi.

Nima uchun qaysidir davlatlar tezkor rivojlanmoqda, qaysidirlari esa sust holatda deb o'ylaganmisiz?

BMTning Inson kamoloti indeksining oxirgi hisobotini ko'rib o'tirib, ushbu indeksning tarkibidagi ikkita "O'rtacha ta'lim olish davomiyligi" va "Aholi jon boshiga yalpi milliy daromad" ko'rsatkichlarining to'g'ri korreliyatsiyasi e'tiborimni tortdi.

Oddiy qilib aytganda, aholi ta'lim olish davomiyligining aholi daromad miqdoriga ta'siri sezilarli darajada ko'rinib turibdi.

To'g'ri, bu yerda faqatgina ta'lim olishning davomiyligini asosiy faktor deb bo'lmaydi. Ta'limning sifati, davlatning tabiiy boyliklari, siyosiy barqarorligi, eksport darajasi, egalik huquqining kafolati, korruptsiyaning tiyilganligi kabi kuchli faktorlar ham bor. Lekin daraxtning o'sishiga tuproqning ta'siri kabi, mamlakat iqtisodiyotining rivojlanishiga fan va texnikaning rivojlanishi katta ta'sir ko'rsatadi. Fan va texnikaning asosi esa ta'limdir.

Ta'limni rivojlantirish orqali iqtisodiyotining o'sishiga erishgan davlatlarga misol qilib oldin baliqchilik bilan shug'ullangan, endilikda iqtisodiy "ajdarho" - Singapurni, oldin urushlardan charchagan, endilikda texnologiya bo'yicha lider - Janubiy Koreyani va oldin agrar davlat bo'lgan, endilikda sifatli ta'lim sinonimi - Finlyandiyani misol qilib aytishimiz mumkin.

Ta'lim o'zligicha maqsad emas, uning tadbig'i va natijasi yillar o'tibgina namoyon bo'ladi. Taniqli ma'rifatparvar Abdulla Avloniyning "Tarbiya biz uchun yo hayot - yo mamot, yo najot - yo halokat, yo saodat - yo falokat masalasidir”, - deb ta'kidlashida tarbiya bilan bir qatorda ta'limni ham nazarda tutganligi shubhasiz.

PS: Diagrammadagi umumiy trenddan chetlashib ketgan ba'zi davlatlarning bu holatiga tabiiy boyliklarining ko'pligi va boshqa noyob faktorlar sababchi. Masalan, Lixtenshteynda aholi soni juda kam, hamda ishlab chiqariladigan mahsulot va ko'rsatiladigan xizmatlarning deyarli barchasi export qilinadi.