عن التفاصيل الصغيرة ..💙🌸

مسج صغير مكتوب فيه "كتير انبسطت إني شفتك اليوم" أو "شكلك كان حلو" أو "كانت طلعة حلوة يا ريت نعيدها" أو "اشتقتلك" أو "ع قد الزناخة الي عندك ع قد ما بنبسط لما بحكي معك" أو "أنا معك" بتفرق معنا كتير و جد ممكن تخلينا مبسوطين نهار كامل ..

ابتسامة من شخص بتيجي بس لأنك مرقت و حكيتله "صباح الخير" بتخليك تبتسم و بتحسسك إنك كنت السبب بابتسامة شخص على الصبح

تكون يتحكي بموضوع مع ناس و تلف وجهك فجأة تلاقي حدا بتطلع عليك بإعجاب ما بدو غير إنه يشوف ملامحك و انت مندمج بالموضوع .. هاي النظرة الحلوة من حدا بعيد كان أو قريب قديش بتبسط و وقديش بتعلق بالبال.

مرات نكتة حلوة ممكن تغير المزاج و مرات نكتة هبلة بس الي بحكيها بيضحك عليها ممكن تخليك تضحك .. مرات حبة شوكولاتة من صاحبك الي راح ع السوبرماركت و ما وصيته على إشي تبسطك .. حتى كومنت صغير من شخص معين ممكن يفرح قلبك و مرات لايك ممكن يفرق معك بيومك .

هاد غير عن شوية جمل بمرقوا بسرعة بس بقعدوا بالقلب قعدة أبدية "بموت لو بصيرلك إشي"، "احكيلي مين زعلك خليني أدبحه"، "ما بعرف كيف الحياة ممكن تكون حلوة بلاك"، "الله يرضى عليك" ..

أشياء صغيرة ؟ آه .. أشياء تافهة ؟ يمكن .. بس كلنا بننبسط فيها و بدونها الحياة مش حلوة .. لأنه لما بنتدايق و يخطر على بالنا هيك إشي صغير بنحس إنا ارتحنا حتى لو شوي .. عالأقل ما بنحس إنا لحالنا..

مين حكى عنها تفاصيل صغيرة ؟؟
والله إحنا الصغار إذا لسه بنشوفها صغيرة ! 😍💚