ميمر // العباس عليه السلام

زلزل الحومه العباس. هز رايته وطب ليهه
......

شد ولكد عالمهره راعي النوماس
يبست رياگ الزلم من طب عباس.
عثّر الخيل وظل يطك راس براس

حالف نزل عالعدوان. بسيفه الگمر يفنيهه
.......

خيل وزلم عالمشرعه چوّمهه
يطشرها ساعه بسيفه ساعه يلمهه
عباس راية حيدره لازمهه

ما توگع بچف عباس. عالمشرعه معلّيهه
.......

خيّرهم البي زود من گرّب طاح
عباس هذا البالحرب بيهم صاح
يتسمّه عزرائيل قبّاض ارواح
روس وجثث يم الماي. تتطاير مخلّيهه
......

عباس هذا وبت علي ناخيته
مسرفن زنوده محزَّم بخاچيته
للشام مو للكوفه واصل صيته

بچّه الزلم بس عباس ذلهه ويدوس عليهه
.......

لوما الغدر ما خَلّه بيهم ميتين
عباس هذا بكربله وفّه الدين
اي والنعم ضعفين رد ثار حسين

بالغدر گطعوله چفوف. لعيون اخوه يفديهه
......

والرايه باجر هم ترد ثاني ردود
من ايد ابوفاضل لأيد الموعود
يظهر لثار حسين ولراعي الجود
يم النهر يعله الصوت. يا عمي زودك بيهه

سيد زيد الفحام
_________