قتلگاه

آمدن حضرت زینب کبری به قتلگاه

مرحوم استاد مشهدی علی اصغر #ذهنی

اگر چه کعبه ایوی محترمدی حرمتی وار
و لیک کرب و بلانون اونا شرافتی وار

بو کعبه بیتِ مجازیدی ، لیک کرب و بلا
حقیقی کعبه دی ، هم باطنی هم حقیقتی وار

اودور که کعبه ایوی فخر ایدنده یتدی ندا
که کعبه ، کرب و بلانون سنه فضیلتی وار

گر اولماسیدی او یر ، سن بنا اولونمازدون
که علّت اصلدی ، معلوله افضلیّتی وار

بلی او بُقعه که سلطانِ عشقه مدفن اولا
حقیقتا" او یرون اوزگه بیر جلالتی وار

آدی گلن کیمی یاقوتِ تر نثار ایلر
او گوزلریکه اورکده حسین محبّتی وار

(آی اولاری که کربلا آدی گلنده اورگوز داریخور سیدالشهدانون مبارک آدی گلنده گوزلروز دولور ان شاءالله وعده میز حرمی اولا بوجمعینن باهم یاخنان دیروخ یارالاریوا قربان اولاخ حسین)


او پاک قان که توکولدی او پاک صحرایه
نقدر مدح اولا زیبنده دور لیاقتی وار

توکنده شمر همان قانی تتردی یرلر
گورن دییردی بو گون رستخیز علامتی وار

دوتولدی گون یوزی ، آفاقی چولقادی ظلمت
باخوب او ظلمته زینب بولوب نه علّتی وار

چیخوب خیامدن اوز قویدی قتلگاهه طرف
یتوب نه گوردی که شمرین بیر اوزگه حالتی وار

النده خنجر حسینون چخوبدی سینه سینه
او نورِ حقی خموش ایلماقدا سرعتی وار

دئدی اماندی دایان ای شقی الون ساخلا
سنون مگر نقَدَر قلبوین قساوتی وار

پیمبر اوغلونی ئولدورمه بو حقارتله
عزیزِ فاطمه دور شأن و جاه و عزّتی وار

چیخوب او سینیه عرشِ خدانی تترتمه
او اوخلی سینه نون عرشِ خدایه رفعتی وار

تمام اولور اوزی ، سن باتما قانینه ناحق
بو صون نفسده داخی قاتله نه حاجتی وار

او یر پیمبر اوپن یردی ، بیر حیا ایله
او پاک حنجریله خنجرین نه نسبتی وار؟

اذیّت ایلمه جان اوسته دور چوخ اینجیتمه
یارالیدور گوروسن جسمده جراحتی وار

گون ایسّیسی ، اوزی تشنه بو قدر قانی آخوب
نه اختیاری قالوب نه توان و طاقتی وار

یارالی سینه سینی جان ویرور آغیرلاتما
ندندی بیر دیموسن شارعین شریعتی وار

چکیل کناره آلوم باشینی دیزیم اوسته
یارالی قارداشیمون بلکه بیر وصیّتی وار

او قدر ویر منه مهلت که باغلیوم گوزینی
یانیندا یوخدی آناسی گوگلده حسرتی وار

ترحّم ائت منی بو چولده قویما قارداشسیز
علاوه بیر بولوک اهل و عیال و عترتی وار

چکوب حسیندن ال شمر الینده بیر قمچی
دیمم نِدوب دیلمین بو مقاله لُکنتی وار

آچوب او حالیده گوز پادشاهِ بی یاور
گوروب که زینبینون قارداشا حمایتی وار

دئدی باجی بو ستمگردن التماس ایتمه
نه رحمی وار نه بیر انصافی نه مروّتی وار

عبث بو ظالمه یالواراما ، مندن ال چکمز
گرک بروزه ویره دلده هر شقاوتی وار

خصوص اوزیمده رضایم که تئز خلاص ایتسون
نقدر تئز کسه ، اوز قلبیمون رضایتی وار

کسوب علاقه سین آیریلماسا بو باش مندن
وصالِ شاهدِ اصلین منه صُعوبتی وار

منم که باش ویرورم ، باش کسنده لازمدور
کیمون بو شمردن اوزگه بو امره جرئتی وار

اگر چه قاتلِ بی رحمه العطش دیورم
بو العطش دیماقون سرّی چوخدی حکمتی وار

فراتی ایستمورم ، جامِ عشقله مستم
دگل سو ، دلده مِی وصلِ یار نیّتی وار

نه سلسبیل نه کوثردی نه شرابِ طهور
او مِی که آختارورام اوزگه بیر حلاوتی وار

حلاوتیله اگر اوز بوغازیمون قانین
بو بزمِ عشقده من ایچمسم نه لذّتی وار

بلا پیاله سینی سنده شوقله نوش ائت
بلالی باشوین عالمده چوخ مصیبتی وار

علاج صبردی ، صبر ائت بلایه اول تسلیم
باجی بو امرِ مقدّردی حق مشیّتی وار

باش آچما زلفوی یولما یوزون خراش ایتمه
چکوب سس آغلاما دشمنلر شماتتی وار

قایت خیامه یغ اهل و عیالیمی باشوا
سکینه نازینی چک ، گر چه چوخ مشقّتی وار

تسلّی ویر اونا مندن صورا چوخ آغلامسین
او آغلیاندا منیم روحیمه اذیّتی وار

یتیم اوشاخلاریمی قویما دشمن اینجتسون
نقدر زحمتون اولسا حسینه منّتی وار

صَفیّم عاتفَم عالمده نازینَن بویویوب
رقیّم هاردا گوروب دشمنین اسارتی وار

وحید قارداشی جلّاد الینده قویدی باجی
قایتدی ، گوردی امام امرینون اطاعتی وار

الی اورکده گوزی یاشلی خیمه گاهه طرف -
گیدور ، نه دلده قراری نه دیزده طاقتی وار

اوزی گیدور ولی قارداش محبّتی قویمور
کسنمور عُلقه نی قارداشدان ، آخر الفتی وار

گیدنموری نگراندور عزیز قارداشدان
نه گیتماقا نه دونوب باخماقا جسارتی وار

عجب نظم ویرورسن کلامه ای (ذهنی)
حسیندندی که طبعون بیله مهارتی وار.


کانال عاشقان امام حسین (ع)

🆔@aseganemamhoseyn