اهلي بغرب عافوني والمرض غيّر لوني
عگب البدور البل بيت
وحدي وعليله ظلّيت
والمرض غيّر لوني .... ..
......................................................
انه العليله آني ــ
فاطمه بكهف احزاني ماشافت عيوني النوم
ريت الاجل وافاني ــ
يوم المشو ولياني ــ ولاعيشن الهذا اليوم
بلحظة وداعه جاني ــ
ردت امشي ماخلاني ــ اوياهم منعني المظلوم
* يابويه بالهم ناديت
چني بيتم شو حسّيت
وتصب دمعها اعيوني والمرض غيّر لوني
.....................................................
ياويلي ذيچ الّليله ــ
من طلع ضعن العيله ــ چنّه دليلي اتفسّر
اعيوني دمعها اتسيله ــ
و همي العَلَي شيشيله ــ لن بالگلب ضل يسعر
حسين الرّحت اشچيله ــ
واعدني گبل ارحيله ــ امن اوصل اودّي الاكبر
* يالواعدتني وماجيت
بسمك يخويه اتنخّيت
لا لا تخيــْب اضنوني والمرض غيّر لوني
………………………………………………..
هذا الّي زيَّد حزني ــ
لاجه علي الواعدني ــ ولاعمي راعي الرايه
واني الّي چان بظنّي ــ
راعي الفضل يحضرني ــ والكربلا امشي برايه
غدر الدهر دوهنّي ــ
بفگد الاهل مرمرني ــ تاهت علّيه الغايه
* المهد الطفل من هزّيت
ولگيته خالي وحنّيت
من الطفل حرموني والمرض غيّر لوني
…………………………………………………….
بعد الولي وانواره ــ
هم مثلي تنحب داره ــ وبيهه اني اعيش بهمي
بحزن والم محتاره ــ
ماعرف شنهي الچاره ــ وماكو ولي الضّل يمّي
حسين العشت بكتاره ــ
منهو اليوَصْل اخباره ــ لا رد علي ولا عمي
* وينه ارد اﮔلّه اشخلّيت
چم ونّه بعدك ونّيت
جمر البُعد بمتوني والمرض غيّر لوني
…………………………………….…………… .
بعد اهلي شلّي بعمري ــ
ونار المرض هل تسري ــ بيّه إواظل اتناهم
وحته الصبر مل صبري ــ
وچم دوب اناطر و ادري ــ مااسعد ابملگاهم
لانفع حزني وقهري ــ
ولانفع دمعي اليجري ــ من ردت اروح اوياهم
واتنطّرت و تمنّيت
رايِحه اوياهم ياريت
ماظن بعد يلفوني والمرض غيّر لوني

@@@@@@@@@@@@@@@@@
كلمات خادم الحسين
حسن الجحيشي