ماتبحتش على قيمتك عند الآخرين؛ لأنَّ ببساطة مش حتلقاها!! إنْت بالنسبة لشويَّ ناس إنسان ناجح، وبالنسبة لناس ثانية شخص فاشل، وناس يشوفوا فيك قدوة، وناس ماتشوفش فيك أصلًا، ناس تشوف فيك إنْسان حقاني، وبعضهم يشوفوا فيك شخص وهمي...الخ.
قيمتك الحقيقة في ذاتك ورضاك على الشيء يالِّي ادير فيه، قيمتك الحقيقة في شخصيتك وإقتناعك بالحاجة يالِّي تبيها، ماتخليش حد يقيّمك في الدنيا ولا يقف في طريقك طالما الشيء يالِّي ادير فيه مش حرام وضميرك مرتاح، لو تبي تخالط؛ خالط ناس تعرف تقدرك وتدعمك، بناس إيجابيَّة تشوف لنصف الطاسة المعبي وتنسى إنَّ نصْفها الثاني فارغ، ولو ملقيتش يامرحبًا بالوحدة.
الخط الوحيد يالِّي لازم ترسمه في حياتك هو (الجانب الشرعي) بحيث إنَّك متفوتاش وتحته تسبح زي ماتبي.

2022|3|10