الشاعر حسين صادق العقابي

قصيدة للزهراء ع

يكلبي. الليله سافر
على جناح المنابر

لعالم الخدمه إتعنه واتوضه بدمع
واعلك العشره للزهره بالمجلس شمع
……

لا تتكاسل بس ياكلبي. انطيني چفوفك يله وكوم
ومن ليل اسود مابي كمره. كون تفصل منه هدوم
بشريانك ياكلبي اتحزم. مايتعوض هذا اليوم
عايش من خيرات ام زينب. بالك تتسجل محروم

الليالي الفاطميه
امانه من الزچيه

اجزع الليله للزهره مكسورة ضلع
واعلك العشره للزهره بالمجلس شمع

………

بالك ياكلبي من الدنيا. ميّز واعرف وافهم زين
لاتبرد خليك بنارك. خلصانه الدنيا وماشين
انبض للزهرا والخدمه. هاي الخدمه تگر العين
چف اليلطم باچر يفرح. والعين التبچي اعله حسين



غرورك مايفيدك
تفيدك. لطمة ايدك

باچر الحسره متفيدك وعضت الصبع
واعلك العشره للزهره بالمجلس شمع

……

عاشرنه هواي بهالدنيا. شفنه الناس اشكال اشكال
وعاشرنه الزهره وكل خادم. لا ماطحنه بأي اشكال
كالو طاحت امكم زحمه. ومن العصره المدمع سال
شلال وطايح جاوبنه. ويحله من يطيح الشلال

سلاماً. ام ابوهه
شمسنه وماطفوهه

وي خدمهه مثل نسمه وي ريه انجمِع
واعلك العشره للزهره بالمجلس شمع

………

ابنادم ينحب اعله الفطره. مو كوه يحبونه الناس
الموقف لو مابي روحيه. بلسانك لا ماينقاس
يالكلبك صخره من الدنيا. الزهره تعلمك عالاحساس
احنه نحب المجلس تدري. چي بي طعم من العباس

المجالس. علمتنه
على الله. وافتهمنه

لو عمر ثاني اخدم ابد ما اقتنع
واعلك العشره للزهره بالمجلس شمع

……

لتلوم الخادم يتجنن. من يخدم امه الزهراء
وداعة هالمنبر تعرفنه. واحد واحد بالاسماء
تعلمنه الحب والروحيه. كلما ندخل هالاجواء
هذا العام احنه تعاهدنه. نقيم لفاطم عاشوراء

الخدمهه. عن قناعه
اله صك الشفاعه

الخدمه ماي الله تجريله من اطهر نبع
واعلك العشره للزهره بالمجلس شمع

………

حسين صادق العقابي

قصيدة لشهادة الزهراء ع

من گلبي صحت.. يمج شيبت
اكتب عالگبر.. ماتت من وكت
……..

بخنكة الصوت.. صحت ياعافيتي بعدج هالعمر ضاع
بخنكة الصوت.. آه وايام الحبايب يكضن بساع

بيه حسره وسالفه ومابيه انعه
راح اسولفهن يروحي دمعه دمعه
ياخسارة كلبي ما ادري شكبرهه
كلشي يرجع بس اليموت شيرجعه

ريتي بلا هوه. وعيني بلا ضوه
تسولف دمعتي. ماتت من وكت
.....................

بيت مهيوب. يصير للفقره وطن لو دكو الباب
بيت مهيوب. ومن عتبته مراد اخذو كلهم تراب

دارت الدنيا علينه والله صعبه
ياهظيمه لبيتي طبت ناس غربه
18 نبضه انتي عمرج ليش اذوج
والقصد چان النبي يشلعون كلبه

مذبوح الامل. دك بابي الاجل
وناده ياعلي. ماتت من وكت
...................

اسمع الاه. من وره الباب وضلع للزهره مكسور
اسمع الاه. وانه اجرع بالصبر يالزهره مجبور

طايحه طيحت نده بحسره شكبرهه
ظلوعج مكسريهه واعله الباب اثرهه
الله يدري الحسره البكلبي بغيابج
كومي يابعد اليشوفن يانظرهه

يرويحة علي. ياناسي وهلي
ما اسمع ردت. ماتت من وكت
.....................

بيه تدرين.. الليل من ايمرني اخلصه بدمعة العين
بيه تدرين.. ضهري محني من فركتج يم الحسين

ذبل عودي والحزن خيم عليه
مامصدك دافنج اني باديه
للمكابر امشي الج محتار حيره
وعل كبر اغفه ودمعتي تضل جريه

اصحه امن الألم.. فراكج جن سهم
وكلشي ايصيح الي.. ماتت من وكت
........................

كلبي مشلوع. بلايه كواك الله لمن ادخل البيت
كلبي مشلوع . هواي وادم بس احس لوحدي ظليت

هواي كبرتيني من عفتيني وحدي
الليل يكضي بدمعتي وايدي اعله خدي
ردت كلمة ياعلي بلسانج انتي
اه ياكبرج اخذ كل فرحه عندي

اوصل بالدمع. بقرآن وشمع
ويرد الكبر. ماتت من وكت


حسين صادق العقابي

قصيدة لاستشهاد الزهراء ع


التاريخ شاهد قبل. وعدنه ادلة عقل
عن ما جره لفاطمه. نثبت ظلم لو عدل

……

ما نروي عن اهل البيت. ولا نستدل من عدهم
اربع مذاهب يروون .ناخذ الشاهد منهم

كتاب المصنف بي خبر. ابن أبي شيبه يكول. الثاني چان المسؤول. هدد الزهره

بانساب الاشراف انذكر. بالجزء الاول والصار. نفس الشخص جاب النار. هدد الزهره

من نستدل بالخصم. شاهدنه مابي ظلم
بس ردنه نوصل الى . نثبت ظلم لو عدل

………

بهاي الرواية التأكيد. من تروي عن الزهره
المحسن عله اعتاب الباب. من طاح من العصره

فاطمه يكلوله اجت. وكفت تره خلف الباب. كلهم وإن والاسباب. يرضي الخليفه

هواي المصادر والكتب . بس ردنه هالناس تشوف. كيدو چم مره چفوف. اهل السقيفه

واليروي هذا الحصل. كتاب الملل والنحل
للعنده شگ بالامر. نثبت ظلم لو عدل

…….

العقل مصدر تشريع. يهل العقول اسألكم
فاطمه بلا مرقد ليش. وضايع كبرهه انشدكم

الوارث الشرعي للنبي. اخذو فدك منهه شلون. العاقل عرف والمجنون. نحلة محمد

من كيدو چف الوصي. ظل صابر وچان الراي. يحفظ الاسلام بهاي. والدنيا تشهد

وصت علي وبحزن. بالليل كون اندفن
عالشيخ ما راضيه. نثبت ظلم لو عدل

………

والد محمد بالنار. عدكم خبر متواتر
وما كفرتكم تروون. مات ابو طالب كافر

ويوم الرزيه لو كلت. ظلمو الزهره الشيخين. كافر اصير وموزين. لا مو عداله

مو حادثة تاريخ ابد. فاطمه صارت ميزان.
للباطل وللايمان. ورب الجلاله

بين الوعي و الجهل. اختارينه خير العمل
لا مو تعصب ابد. نثبت ظلم لو عدل

……….

من عنده مثل الكرار . من عنده مثل الزهره
من عنده مثل العباس. من عنده مثل العتره

نحب الصحابي بس شرط. لازم يحب الكرار. مثل ابو ذر وعمار. ومالك الاشتر

يتساوه عدنه لا ابد. القاتل ويالمقتول. يحتاج هالامر عقول. يالسامع احذر

لماشاف حيدر شمس. كلبه يدك بالعكس
وبالحشر من نلتقي. نثبت ظلم لو عدل

………

نسألكم الدعاء
حسين صادق العقابي

كون يطلع كلبي كدامي واشوفه شلون فرحان بخبرهم ❤️

اما خيبرٌ سنعيدُ فيكم
واما كربلا ستعادُ فينا
ففي الامرينِ يُكْتَبُ انتصارٌ
وللامرينِ نحنُ العاشقينا

#لبنان_الصمود

( قصيدة 14 نور ) متباركين بولادة الاقمار المحمدية

صلو على محمد

يا طه يا بو الزهرة
يا اصل نور العترة
بيك الله تمم امرة
والكون بسمك ردد / صلو على محمد

حيدر يحماي الجار
العالم بوصفك محتار
كرار لا مو فرار
بموقفك خيبر تشهد/ صلو على محمد

فاطمة يا ام حسين
يا شافعة بيوم الدين
يالشيعتچ مفطومين
من النار امر مأكد. / صلو على محمد

الحسن ثالث رحمة
بالكرم واضح اسمة
مشكورة هاي النعمة
ما تنحصي ولا تنعد. / صلو على محمد

يحسين يابو الاكبر
للشمس انت المصدر
يا ماي نهر الكوثر
حبيتك ومدري شكد. / صلو على محمد

السجاد في كل سجدة
للشيعة تنحل عگدة
اليگصدلة لا ميردة
للباري بي نتودد. / صلو على محمد

هيكل قداسة الباقر
يجبر بذكرة الخاطر
بگلوبنه يضل حاضر
باقر العلم الاوحد. / صلو على محمد

يبقى الامام الصادق
قرآن بالحق ناطق
يا جبل عالي وشاهق
نور البقيع الغرقد. / صلو على محمد

يدور الفلك وابراجه
بكاظمنه باب الحاجه
واللي مشة بمنهاجه
ما يجري دمعة اعلة الخد/صلو على محمد

يا شمس مدفونه بطوس
يالتنحني گباله الرووس
لكل المعارف قاموس
مشهدك شرف مشهد. / صلو على محمد

تبقى الجواد انواره
شمعة بدرب احراره
ترست الدنيا انصاره
وشعت انوار المرقد. / صلو على محمد

يا علي الهادي محلفك
تلزم ادينه بچفك
بحبك درينه وعطفك
نار الله تطفة وتخمد. / صلو على محمد

يا جود ماي الجنة
يالعسكري انته المنه
اطاك الله ما تتمنة
المهدي اللي بي نتوعد. / صلو على محمد

اسال الرايح والرد
جزتهه هالدنيا الحد
لبسهه بيدك چرغد
يالمهدي يا. سر. احمد. / صلو على محمد

الشاعر حسين صادق العقابي

مولد النبي ص

ياروحي روحي لحضرته وشمي هوه الجنه نذر انتي اله
محبوبي عايش بالكلب وادري جمال الله بشر ما اجمله

صلو على محمد النبي. صلو.

……

لاجمل بشر. وجه الكمر. هاي الولاده بفرحه نحييهه
كلب المحب. بسمه يدك. هالدنيا وجه النبي محليهه

رباني . واضح جماله كل خصاله وبصفاته والله رباني
خلاني. الهج بأسمه كل نهاري ويه ليلي اني خلاني

يسري بشراييني. هوه النبض بيه
فدوه اله فدوه. عمري وطواريه
عالامل عيشني. باحلام ورديه

رب الذين امنو. عالمصطفى صله. عظيم المنزله

محبوبي عايش بالكلب وادري جمال الله بشر ما اجمله

صلو على محمد النبي. صلو.

……..

ما اجمله. ما اكمله. يارحمة الله الساكن بروحي
نسمة هوه. ذكره دوه. لو كلت بسمه تنشف جروحي

من عيونه. اشراقه ضوت. بالمحنه. چنهه جنه تضوي بعيونه

خيعونه. طير الحباري. چنه كلبي. للمدينه. يروح خيعونه

من ايتامه يحسبني. امنيتي وحساسي
وبچفوفه اتمنه. يمسح على راسي
وبعطفه يشملني. اغلى واعز ناسي

من عنده بالدنيا مثل والد ابو الزهره. بشر نتقبله

محبوبي عايش بالكلب وادري جمال الله بشر ما اجمله

صلو على محمد النبي. صلو.

…….

الكل تنتظر. يوم الحشر. وامة محمد بيك مرحومه
من نرتجي. شافع تجي. هذا الشفيع الاعظم ويومه

خدامك. احنه الكضينه كل عمرنه. وافتخرنه. نصير خدامك

خدامك. وحسين يدري. ويعرفنه. من عشكنه. احنه خدامك

ياسيدي ارزقنه. هالليله لو نظره
وكلوبنه ترفرف. طير وعلى الحضره
شكراً اذا تقبل. ياوالد العتره

شمس الله ضوت بالسمه. بميلادك وانته تقود القافله.

محبوبي عايش بالكلب وادري جمال الله بشر ما اجمله

صلو على محمد النبي. صلو.

……….

نسألكم الدعاء
حسين صادق العقابي

مولد النبي ص

……..

سلامي. حبيبي . يامحمد
هيامي. غرامي. يامحمد
صوت جبرائيل غرد هالمسيه
الليله ميلاد الرساله العالميه
يامحمد
……..

مولد الحنين. الصادق الامين.. ياضوه السنين. ياحبيب الله وبدر شع بجماله
ياهو الشمال. ياعذب زلال. مظهر الجمال.بيك دين الله تمامه واكتماله

حبك يسري ويكبر. بالشريان الابهر. ومضوي السمه
يامفتاح الرحمه. بيك اتمام النعمه. يابو فاطمه
شمس الله الماشافك. وتمعن بوصافك. بعيونه العمه

لاح. بدرك ويضوي بسمانه
لاح. تارس الدنيا بحنانه

دعائي. رجائي. يامحمد
شفيعي. ضماني. يامحمد

ياجمالك ياحبيب الله ونبيه
الليله ميلاد الرساله العالميه
يامحمد.

…….

الرحمه والسلام. منقذ الانام. مبدد الظلام. يا امان الكره الارضيه بحياتك
السيد الرؤوف. النبي العطوف. موحد الصفوف. من صفات الله طبع تاخذ صفاتك

چفك خبز الفقره. تسير يمهم كمره. يانسمة هوه
لوما وجهك ضيه. تضيع الانسانيه. وظلمه بلا ضوه
شكراً يابو الزهره. الحصل منك نظره. بالحب ارتوه

شوك. ابعث بليلي ونهاري
شوك. وي جنح طير الحباري

حياتي. هويتك. يامحمد
اماني. نجاتي. يامحمد

نور وجهك تارس عيون البريه
الليله ميلاد الرساله العالميه

يامحمد

………

للكلب وداد. نعمه للعباد. رحمه بالمعاد. الله صلى اعليك واملاكه وعباده

هادم الذنوب. مالك القلوب. بعشكك اليذوب. حبه عذري ويبقه كل يوم بزياده

جاء الحق بچفوفك. يتوسل بحروفك. ياخير العمل
الدنيا انته مضويهه. من اولهه لتاليهه.
بس انت الامل
شكراً جد الساده. بحسين واولاده.
دين الله اكتمل

صار. حبك يصحي الضماير
صار. احلى نغمه اعله المنابر

نبينه. ولينه. يامحمد
قبولك. علينه. يامحمد
انته فرحتنه الچبيره الدائميه
الليله ميلاد الرساله العالميه

يامحمد.

……..

حسين صادق العقابي

فرحة الزهراء

هوسات

…….

اليوم الزهره تلبس المهدي. إلتاج وفرحانه هوايه
يشبه عمه ونفس رسومه. العباس البيمينه الرايه
هوه ملوحة كل العشره. وننطيه احنه اليوم حچايه

للموت ويا كم وفايه

…….

يمنصب من الله القائد. ياهيبتنه ويا كشختنه
يكلولك ارجع من تظهر. لا ما تحتاجك دولتنه
واحنه نكلك يبن الزهره. تفضل واهلا كل صيحتنه

جنود الله احنه وانته الايه

…….

شامه بخدك وجهك كمره. وعيونك جنه بصف جنه
يابعد الما شافن طولك. يايوم نشوفك نتمنه
شاغل كل عقول العالم. وچم چف امن دموعه اتحنه

سوالف عندي وياك هوايه

…….

كل متغرب رد لأهله. وما نعرف احنه بأحوالك
بديوانك ياشيخ العالم. يايوم نعزب بدلالك
لاتنسانه بداعة زينب. دوم تخلينه احنه ابالك

منك منتظرين حچايه

……

هوسه الدنيا وبيدك انته . تحلهه وانته اللي تصفيهه
رجع الوادم لله التاهت . عن دربك ماندري شبيهه
بدونك صرنه شجره بصحره. والحيره شلون بتاليهه

بچفك يمته ادك الثايه

…….

نسألكم الدعاء
حسين صادق العقابي

قصيدة لاستشهاد الامام العسكري ع


بداية غيبتك بيهه ابتدت رحلة غيابي
بأمان الله رحت وانه اكتبت قصه عذابي

اعله دهري شكد اعاتب.
انه الفاكد كواكب

………

ماظال كلشي من الدمع. ياوالدي وروحيتي
بينك وبين الطف كضت. من ضيمي كل عافيتي
بسامره ذبحولي حلم. وبكربله امنيتي
اعله كبوركم صحت بهضم . يادنيتي شخليتي

طواريك تهد خيل واحس بيهه بضلوعي
وماي دموعي خلص وبدمه تنزل دموعي.

انه الشابع مصايب. انه الفاكد كواكب

……..

ياهو الغريب بدنيته. مثلي ومثل احزاني
لا والد ولاعندي اخو. هيج الوكت خلاني
البكّاء من كثر البچي. والدنيا دار احزاني
من مثلي عماته انسبن. ومتغيرات الواني

انه العرفو اسم عمته وحبل خلو بديهه
انه ابن العايله الحركو خيم عزهن عليهه

صرت من ضيمي شايب. انه الفاكد كواكب

……..

يابيت اهلنه بلا ابو. ولاصوت للحنيه
هالليله ميتلي وطن. ودعت الانسانيه
خليتني بعمر الورد. بس الله يدري شبيه
نعشك احس هودج سبي. وروحي المشت مسبيه

كضو اهل الله والباقي انه وغربة زماني
مناره بديره مهجوره ومنو اليسمع اذاني

اعيش بلا حبايب. انه الفاكد كواكب
………

فوك الجتاف جنازتك. وكل خطوه عثره بدربي
مااحس حفرولك كبر. يحفرون احس بكلبي
جوه الترب صار الضوه. والهوه الچان بگربي
صحت ان وعد الله حق. يادمعه بالخد كتبي

انه وعمري ووجع روحي وعشرتي وذكرياتي
الثامن من ربيع اول. حضر موت امنياتي

شفت بيه العجايب. انه الفاكد كواكب

……..

الدنيا شكبرهه والبشر. يابويه ادري هوايه
هل من مناصر لو صحت. ياهو اليشيل الرايه
محد يجاوب صرختي. بس اسمع اني حچايه
لبيك يامهدي اعتله. صوت الخدم وفايه

صبراً ياخدم راجع واعيد الغاضريه
وعله الرايه اخط بدمعي. ياثار الزچيه

مع الوقت المناسب. انه الفاكد كواكب

………

نسألكم الدعاء
حسين صادق العقابي

كدامك كل يوم. مفتوح الگلب
تفضل يامولاي بيتك من تطب

عاشرتك اني من سنين.
ولا صاحب مثلك يحسين. دلاني الدرب
.....................

بسمك ابديهه.. روحي اخليهه.. نذر يم بابك.. يالمنطيني هواي
يانبض گلبي.. وبس الك حبي.. عايش بخيرك.. منك اخذ راي

يابشر مثلك وحتى ترابه ينحب
الكره الارضيه مدينه وانت كوكب
ونحرك اليحچي الصدك والدهر چذّب

دنيا بلا طاريك.. ماتحله الي
حبك ويه الروح.. اي يابو علي

انته أقرب ليه امن العين..
ولا صاحب مثلك يحسين. دلاني الدرب

.....................

يوسف الزهره. ملوحة العشره.
يابعد حيلي. يحله العمر وياك
انته ابو اليمه. لو ابو الرحمه
لو ابو جروحي. محتار بمعناك

كل جمال الدنيا ما خلاني لاهي
حسين بس انته اللي تلفت انتباهي
بوصلة حبي عليك واتجاهي

قبلة كلبي الصار. ذايب بالعشك
عشرة جرف وماي. لا مانفترك

مثلك مولاي الكه منين..
ولا صاحب مثلك يحسين. دلاني الدرب

....................

ياكهف روحي. واهس جروحي
شكراً لكلبك. يمسويني انسان
فدوه لعيونك. اني ممنونك
لولا حنيتك. ابقه بلا عنوان

كلشي بالدنيا ملل الا الخدامه
بدون عاشورك اصير من اليتامه
منبرك يبقه صديقي وللقيامه

كلبي يصير تراب. لوما مأتمك
يمضويه الافلاك. شذرة خاتمك

معاشر عدلين وميتين..
ولا صاحب مثلك يحسين. دلاني الدرب

........................

مني اخذ كلمه. وداعة الخدمه
صدري دكيته. وياك لحد الموت
خادمك اني. قنبر الثاني
ابقه اصيح اسمك. لو جثه بتابوت

من كلب ولسان والعباس احبك
طلب عندي ورايده من عرش كلبك
كون اظل لآخر انفاسي اعله دربك

بظلمة روحي تصير. اشراقة شمس
من كلب امي هواي. حنيتك احس
هواي معاشر واعرف زين..
ولا صاحب مثلك يحسين. دلاني الدرب

........................

كاتب بعيني. قل هو حسيني
اليشرك بحبه. مايعرف معناه

كلبي من شافك. احتار بوصافك
بالعشك ناده. شكد سبحان الله

حسين ياهيهات وتهز المسامع
يا اذان بكل منارات الجوامع
اخذ بيدي لعالمك لا ابقه ضايع

ماتتعوض دوم. خدمه من العمر
وتجدد كل عام. رايات النصر

كلمه ولا متصير اثنين.
ولا صاحب مثلك يحسين. دلاني الدرب

………

نسألكم الدعاء
حسين صادق العقابي

قصيدة لاستشهاد الرسول ص

البگه براسك بهاي الليله مهدينه
بحزن نرفع الك خالص تعازينه
...................

نعزيك بحزن ياخاتم العتره
عله المختار جدك بالگلب جمره
چم مقتل الك يبن الحسن نقره
شبع كلبك مصايب الله اليعينه
.....................

بس انته الوحيد الكسرته بروحه
التتلاشه فرحته وتكثر اجروحه
يمهدي امنياتك كلهه مذبوحه
وعمرك بالهموم اتخلص اسنينه

………..

من يوم اربعين حسين والدمعه
بعدنه بثوب الاسود والحزن ينعه
اجه مصاب الرسول وصوتنه تسمعه
ونظل وياك ماتخلص بواچينه
......................

غريب ومن غربتك گلبك اتفطر
ويوميه عزه لهلك تجي وتحضر
وهلليله اعله جدك ينحب المنبر
محمد غاب نوره وغمضت عينه
........................

الليله نواسي اجينه عيونك الحمره
ونواسي الزجيه الطاهره الزهره
محتاجتك ماي كلبونه الصحره
عله دروبك نريد اللي يدلينه
.....................

دلينه اعله دربك وين نتعنه
يمهدي هل وكت كل خير مامنه
هل دنيه بوجودك احله من جنه
يكل الخير يملوحة محاچينه
..................

خسارتنه الچبيره بفكد ابو القاسم
ويظل هذا العزاء بنظرتك دايم
الى ساعة ظهورك سيدي القائم
من ترفع الرايه وانته تحدينه

………

نسألكم الدعاء
حسين صادق العقابي

قصيدة لاستشهاد الرسول ص

صوت بعبره وآه
ماتَ رسول الله

منبره.. الوحشه هدت حيله
والوحي..ينزل اخر ليله

وامحمداه
........................

ماشفته صح بدنيتي. بس سامع اخباره
حب عن روايه والكلب. شافه وصبح داره
اهل العقول تحيرت. ماتعرف اسراره
منقذ الناس من الجهل. بقرآنه وافكاره

رحمه لكل الناس
منبع للاحساس

الموت اجه.. للسفر يوميله
والوحي.. ينزل اخر ليله

وامحمداه

.........................

بسيرة حياته ماشفت. بس الانسانيه
متعوب من الدنيا بس. تارسهه روحيه
هوه الامان من السمه. عالكره الارضيه
احرار صرنه برحمته. وعفنه العبوديه

من فكر المختار
نعيش نموت احرار

بمصحفه.. المحكم وتأويله
والوحي.. ينزل اخر ليله
وامحمداه

.......................

محد تأذه من الرسل. مثله وخلص عمره
كالو الابتر والله كال انطيتك الزهره
وانطاه حيدر والفقار بيمنته السمره
وتستاهل اكثر گله هاك حسين والعتره

سبحانه السواه
طاريه شمحلاه

يانبي. الكون صاح دخيله
والوحي.. ينزل اخر ليله
وامحمداه

.........................

هالليله حيدر چم گلب. ينراد لحزانه
ويشوف روح المصطفى. من المرض خلصانه
والزهره خاطرهه انكسر. وهوايه تعبانه
كلشي اختلف حتى الهوه. متغيره ألوانه

بس دمعه بلا صوت
دك الباب الموت

فاطمه.. امن اليتم تشكيله
والوحي.. ينزل اخر ليله
وامحمداه
.......................

قرآن مشيول بنعش. آيه بأثر أيه
وبفراگه صار المرتضى. يتمايل هوايه
دعوه يمهدينه تجي. وتحضر بالقرايه
خدام نبقه اعله العهد. منطينك حچايه

ياصوت الآذان
ياروح القرآن

نودّعه. بدمع دم نبچيله
والوحي. ينزل اخر ليله

……….

نسألكم الدعاء
حسين صادق العقابي

قصيدة للامام الرضا ع

السلام على السلطان الرؤوف
الذي هيج احزان الطفوف

ياعلي الرضا. ياعلي الرضا

……….

ياسلام الله على الحبل المتين
يا انيس ارواح خدام الحسين
بنفس ثوب الاسود من الاربعين
بالدمع لمصابك احنه معتنين

اقبلت ارواحنا نحو العزاء
وننادي ياغريب الغرباء

ياعلي الرضا. ياعلي الرضا

……..

انته تحقيق الحلم والامنيات
يل كضيت العمر آه ونايبات
بغربه انت ودم دموعك تجري دوم
عالذي عطشان مات اعله الفرات

ايها القلب الذي عاش المصاب
وقضى العمر بحزنٍ واكتئاب

ياعلي الرضا. ياعلي الرضا

……….

وصل لانفاسي عطر من حضرتك
وهيّج بكلبي عشك لزيارتك
اعقد النيه واجي اشتم هواك
راحه نفسيه من اشوفن كبتك

ايها المدفون في احضان طوس
يا اماناً للقلوب والنفوس

ياعلي الرضا. ياعلي الرضا.

…….

ماترد سائل واعرفك من اجيك
بحاجتي من اجي واوكف بين اديك
كبل ما احچي البكلبي تكلي هاك
ياسلام الله وملائكته عليك

انني والله فيكم مهتدي
ارتضيني خادما ياسيدي

ياعلي الرضا. ياعلي الرضا.

……..

خدمتي عندك امانه يالحبيب
يارجائي ولو صبح موتي قريب
الكبر غربه ولا عرف الكالي غاد
سيدي وحگ الغريب اعله الغريب

انني ذلك المسكين الفقير
راجياً مولاي تقرير المصير

ياعلي الرضا. ياعلي الرضا

…..

حسين صادق العقابي

قصيدة لرجوع الضعن. الاربعين


منهو يتلگاهه يحسين. اجت لگبوركم
والدمع ظل يحچي بالعين. تريد تزوركم

لسانهه يمك نطق
إن وعد الله حق

.....

لاحت ام عون اعله الدرب
بكسرة الخاطر والكلب
وحدهه تبچي ولايصح. چف يمسح دموع

شمت ترابه وبي عطر
من الناگه طاحت عالگبر
والوحشه ترس المكبره. ولاصوت مسموع

خويه صاحت جبت راسك كوه من فوك الرماح
وعالگبر آنه وينحرك. ياهو كبل الثاني طاح

ضعن الهواشم باقي نسوان. بدموعه ونوحه
وبس العليل ويانه تعبان. جبيره جروحه

لچن حكم الله سبق
إن وعد الله حق

......

متكوم من گبرك ردت
يحسين بيك توسلت
غافي عله صدرك طفل. خافنه ايطيح

انته بحصيره منجمع.
لو كمت يوكعلك ضلع
ويضيع خافن خنصرك. وجروحك تسيح

كلشي ضايع من اديه. وعمري هم لازم يضيع
بس عبايه ومن رقيه. وبيهه غطيت الرضيع

وصتني كالتلي الرمل حار. خطيه وليده
گليله ماتت بيهه اثار. وابوهه تريده

بالسبي عاشت قلق.
إن وعد الله حق

......

بالخير دومك تنذكر.
عباس خوه من العمر
جيتك واخبرك من طحت. مر بيه چم عوز

مخنوگ چفي بالحبل.
كوه اصعد ظهور الهزل
لو شفت اديه تنهظم. ترسوهن حزوز

شكد صحت خويه دخيلك. يابو فاضل بس تعال
انفلت عمامه حسين وطاحن خيام الدلال

شال الشمر راسك يعباس. يراوي سكينه
ونسد اذنه من حچي الناس. تره اتأذينه

وآنه اقره بالفلق
إن وعد الله حق

........

راح ارجع آنه لياوطن
ماظل اخو بهذا الضعن
لأم البنين شأعتذر. عن اربع خوان

والگه العليله بيا وضع
بالانتظار وبالدمع
منتظره عبد الله يرد. وتشوفه كبران

ضامه لعبد الله اخوهه. چم دللول وحنين
وعدهه ترچيه لختهه من ترد ويه الحسين

بس النفس من ارجع وياي. من ارد لبيتي
سبعطعش مني راحو هواي. اموت امنيتي

حلم ظل اعله الورق
إن وعد الله حق

.....

لا راحه لا موكب خدم
يحسين لا رفت علم
يوم اربعينك ما شفت. بس ذاري التراب

هالسنه يابن فاطمه
خدام الك متحزمه
داسو على الموت واجو. ياخويه الاحباب

الف شكراً يالنشامه. وحده ماظل الغريب
بشرو يالمشايه كاتب. كل اساميكم حبيب

كل خطوه چنهه صيام الف عام. اجرهم باچر
كربلا انترست والله خدام. هلا بكل زاير

صاح تطبير المشق
إن وعد الله حق

......

حسين صادق العقابي