Kyaw Swar

လားရှိုး MNDAA မှ တစ်လနီးပါး ဖမ်းဆီးထားသည့် မိန်းကလေးငယ်ကို ပြန်မလွှတ်သေး၊ ကျန်းမာရေးနှင့် စိတ်ပိုင်းဆိုင်ရာ စိုးရိမ်ရ

https://burmese.shannews.org/archives/47027

စိုင်းခွမ်မိန်း၊ ၂၀၂၅ မတ်လ ၅ ရက်

သျှမ်းပြည် လားရှိုးမြို့နယ် မိုင်းယော်ကျေးရွာအုပ်စုတွင် ကိုးကန့်တပ်ဖွဲ့ MNDAA မှ အသက်(၁၅) နှစ်အရွယ် မိန်းကလေးကို တစ်လနီးပါး ဥပဒေမဲ့ ဆက်လက်ဖမ်းဆီးထားပြီး ပြန်မလွှတ်ပေးခြင်းကြောင့် ကျန်းမာရေးနှင့် စိတ်ပိုင်းဆိုင်ရာ စိုးရိမ်နေရကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလ ပထမပတ်အတွင်း လားရှိုးမြို့နယ် မိုင်းယော်တိုက်နယ်ရှိ အသက်မပြည့်သေးသည့် မိန်းကလေးတစ်ဦးကို အပြိုင်လိုက်ကြိုက်ရာမှ အချင်းချင်း ပြန်ပစ်သတ်ခဲ့သည့် ကိုးကန့်တပ်သားနှစ်ဦးနှင့် ဆက်စပ်သည်ဟု စွပ်စွဲကာ MNDAA တပ်သားများမှ ၎င်းတို့ စခန်းချတပ်စွဲထားသည့် လုံမွန်းရွာ ဘုန်းကြီးကျောင်းသို့ အသက် (၁၅) နှစ်အရွယ် နန်းယိင်းဟွမ်ကို ဖမ်းဆီးခေါ်ဆောင်သွားခဲ့သည်။

MNDAA တပ်စခန်းတွင် တစ်လနီးပါး ကြာသည်အထိ ဖမ်းဆီးခံထားရသည့် ၎င်းမိန်းကလေးကို ယမန်နေ့ (မတ်လ ၄ ရက်) နေ့တွင် မိဘများမှ တွေ့ဆုံခွင့် ရခဲ့သော်လည်း လက်ရှိအချိန်ထိ ပြန်မလွှတ်ပေးခြင်းကြောင့် ကျန်းမာရေးနှင့် စိတ်ပိုင်းဆိုင်ရာ စိုးရိမ်နေရကြောင်း ဒေသခံများက ပြောသည်။

“အထက်က ဘာမှ မပြောလာသေးဘူးလို့ပဲ ပြန်ပြောနေတာ။ မိဘတွေ တောင်းဆိုတာကတော့ နံပါတ်တစ် သူတို့သမီးကို ပြန်လွှတ်ပေးဖို့၊ နံပါတ်နှစ်က မိန်းကလေးကို ပြန်မလွှတ်ပေးခင် အခြား ဘယ်နေရာကိုမှ မပြောင်းရွှေ့ဖို့၊ နံပါတ်သုံးကတော့ ဖမ်းခံထားရတဲ့ ကောင်မလေးက ရုပ်ပိုင်းဆိုင်ရာ စိတ်ပိုင်းဆိုင်ရာ ထိခိုက်ပြီး ကျန်းမာရေး စိုးရိမ်ရလို့ အမြန်ဆုံး ပြန်လွှတ်ပေးဖို့ တောင်းဆိုထားတယ်”ဟု မိသားစုနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ယမန်နေ့တွင် မိုင်းယော်တိုက်နယ် MNDAA တပ်စခန်းသို့ မိဘများမှ သွားရောက်တွေ့ဆုံခဲ့ရာ ဖုန်းယူဆောင်ခွင့် မပြုဘဲ ဖမ်းဆီးခံထားရသည့် နန်းယိင်းဟွမ်နှင့် စကားပြောဆိုခွင့်ပြုခဲ့ကြောင်း သိရသည်။

ကိုးကန့်စစ်သားနှစ်ဦး အချင်းချင်း သေနတ်ဖြင့် ပစ်ခတ်ခဲ့သည့်ဖြစ်စဉ်တွင် ကျူးလွန်ခဲ့သည့် ကိုးကန့်စစ်သားကို MNDAA မှ မိုင်းယော်ကျေးရွာအုပ်စုအတွင်း ကနဦး ဖမ်းဆီးထိန်းသိမ်း ထားခဲ့သော်လည်း ပြစ်ဒဏ်ချမှတ်ခြင်း မခံရမီ အခြားနေရာသို့ ပြောင်းရွှေ့လိုက်ကြောင်း သိရသည်။

ထို့အပြင် သေနတ်ပစ်သတ်ခံရပြီး သေဆုံးသွားသည့် ကိုးကန့်စစ်သား၏ မိခင်မှာ နန်းယိင်းဟွမ်ကို ဖမ်းဆီးထိန်းသိမ်းထားသည့် မိုင်းယော်တိုက်နယ် MNDAA တပ်စခန်းသို့ ရောက်ရှိလာပြီး လက်စားချေရန် ပြုမူလုပ်ဆောင်ခဲ့သည့်အပြင် သေနတ်ပစ်ခတ်မှု ကျူးလွန်ခဲ့သည့် အခြားကိုးကန့်စစ်သားနှင့် ဖမ်းဆီးခံထားရသည့် နန်းယိင်းဟွမ်တို့ကို ခြိမ်းခြောက်ပြောဆိုခဲ့ကြောင်း ကျေးရွာဒေသခံများက ပြောသည်။

“သေနတ်ပစ်ခံရပြီး သေသွားတဲ့ စစ်သားရဲ့ အမေက ရောက်လာပြီးတော့ ကောင်မလေးကို လက်စားချေဖို့ လုပ်တာ ဝိုင်းတားထားရတယ်။ သေနတ်ပစ်တဲ့ စစ်သားနဲ့ ဖမ်းခံထားရတဲ့ ကောင်မလေးကိုပါ သူ့သားနဲ့အတူ လိုက်သေရမယ်လို့ ခြိမ်းခြောက်တယ်”ဟု ဖြစ်စဉ်သိရှိသူ လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အသက်မပြည့်သေးသည့် နန်းယိင်းဟွမ်ကို ဥပဒေမဲ့ ဖမ်းဆီးထိန်းသိမ်းထားခြင်းကြောင့်  ပြန်လွှတ်ပေးရန် မိဘများနှင့် ရပ်မိရပ်ဖများမှ မိုင်းယော်တိုက်နယ်ရှိ MNDAA တပ်စခန်းသို့ အကြိမ်ကြိမ် သွားရောက်တောင်းဆိုသော်လည်း အထက်အမိန့် မရရှိခြင်းကြောင့် မလွှတ်ပေးနိုင်သေးကြောင်း ပြောဆိုခဲ့သည်ဟု မိသားစုနှင့် နီးစပ်သူများက ပြောသည်။

ထို့ကြောင့် ဖမ်းဆီးခံထားရသည့် မိန်းကလေး၏ မိဘများမှ လားရှိုးမြို့သို့ လာရောက်၍ မြို့ပေါ်ရှိ သျှမ်းအရပ်ဘက် အဖွဲ့အစည်းများနှင့်အတူ UWSA ‘ဝ’ဆက်ဆံရေးရုံးသို့ ဖေဖော်ဝါရီ ၂၂ ရက်တွင် သွားရောက် အကူအညီ တောင်းခံကာ လောက်ကိုင်မြို့ရှိ MNDAA ဌာနချုပ်သို့ စာပေးပို့ထားကြောင်း သိရသည်။

“မိဘတွေနဲ့ လားရှိုးမြို့ပေါ်က အရပ်ဘက်အဖွဲ့တွေ စုပေါင်းပြီး စစ်ရေးအရ ဆက်ဆံမှုရှိတဲ့ ‘ဝ’ဆက်ဆံရေးရုံးကို အကူအညီတောင်းတာ ကိုးကန့်တပ် လောက်ကိုင် ဌာနချုပ် ကို စာပို့ပေးတယ်လို့ သိရတယ်။ မနေ့က နောက်ဆုံးသွားတွေ့ရတာတော့ ကိုးကန့်စစ်သားတွေက အရင်က သတင်းတင်ထားတာလည်း ပြန်ဖျက်ပေးဖို့ ပြောတယ်။ ဒါပေမယ့် ကောင်မလေးကိုတော့ ပြန်မလွှတ်ပေးသေးဘူး”ဟု လားရှိုးဒေသခံ ၎င်းအမျိုးသားက ဆက်ပြောသည်။

ယခုကိစ္စနှင့် စပ်လျဉ်း၍ ကိုးကန့်တပ်ဖွဲ့ MNDAA ပြောရေးဆိုခွင့်ရှိသူ လီကျားဝင်းထံသို့ သျှမ်းသံတော်ဆင့်မှ အကြိမ်ကြိမ် စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

လားရှိုးမြို့နယ် မိုင်းယော်တိုက်နယ်ရှိ လုံမွန်းရွာတွင် စခန်းချတပ်စွဲထားသော ကိုးကန့်တပ်ဖွဲ့မှ အသက်မပြည့်သေးသည့် အပြစ်မဲ့ မိန်းကလေးအား ဖမ်းဆီးထားခြင်းကို အမြန်ဆုံး ပြန်လွှတ်ပေးရန် နိုင်ငံတကာ လူ့အခွင့်အရေး လှုပ်ရှားသည့် အဖွဲ့များနှင့် ကုလသမဂ္ဂ၊ အာဆီယံ၊ တရုတ်နှင့် ထိုင်း စသည့် သံရုံးများသို့ လိပ်မူ၍ သျှမ်းအရပ်ဘက် အဖွဲ့အစည်းများမှ မတ်လ (၁) ရက်တွင် စာရေးသားပေးပို့ခဲ့သည်။crd