​​
БАРЧА ЎҚИТУВЧИЛАРГА БАҒИШЛАНАДИ


ТАЪЗИМ СИЗГА УСТОЗЛАР

Гарчи бугун синовда очун,
Кўрсатдингиз билимнинг кучин,
Сизга ҳамма - ҳаммаси учун,
Таъзимдамиз устоз, муаллим!

Билим олмоқ динимизда фарз,
Сиздан асло узилмайди қарз,
Жонфидолик - бу онлайн дарс,
Таъзимдамиз устоз, муаллим!

Чин инсонлик ҳадисин ўқиб,
Гоҳи чарчаб, гоҳи мириқиб,
Дарс ўтдингиз томларга чиқиб,
Таъзимдамиз устоз, муаллим!

Зар қадрини билган заргарсиз,
Мўъжизасиз, сиз сеҳргарсиз,
Сиз биолог, сиз кимёгарсиз,
Таъзимдамиз устоз, муаллим!

Онлайнга боғлаб ҳаётни,
Ёдлатдингиз шеъру-баётни,
Ўргандик тил - адабиётни,
Таъзимдамиз устоз, муаллим!

Ранжиманг ҳеч биздан илтимос,
Шўхлигимиз қийнади бироз,
Сиз тарихчи, сиз ҳуқуқшунос,
Таъзимдамиз устоз, муаллим!

Ҳаёт лавҳи эмас битиксиз,
Битикларда мудом етуксиз,
Сиз физиксиз, математиксиз,
Таъзимдамиз устоз, муаллим!

Кўнгил - китоб, сўз - тарбиячи,
Сиз ҳамиша яхши ниятчи,
Илмий мудир, маънавиятчи,
Таъзимдамиз устоз, муаллим!

Касблар ичра аъло, мумтози,
Бўлсин сиздан Аллоҳ ҳам рози,
Сиз бошланғич таълим устози,
Таъзимдамиз сизга муаллим!

Кўрдингиз сиз, этмай сира кам,
Жуғрофия сирларин баҳам,
«Дунё кездик» карантинда ҳам,
Таъзим сизга устоз, муаллим!

Уйда қолиб, дунё сирини,
Ва ўргандик олам элини,
Рус, инглиз, олмон тилини,
Таъзим сизга устоз муаллим!

Соғлом танга соғ ақл ато,
Жисмоний машқ бўлмади хато,
Онлайнда тўп тепдик, ҳатто,
Таъзим сизга устоз, муаллим!

Қалбимизда ажиб бир титроқ,
Бугун биздан дийдор хўб йироқ,
Чалинмайди сўнгги қўнғироқ,
Таъзим сизга устоз, муаллим!

Бўлса ҳамки синовда очун,
Кўрсатдингиз билимнинг кучин,
Сизга ҳамма - ҳаммаси учун,
Таъзимдамиз устоз, муаллим!

@maktabda_kimyojurnali