بسم الله الرحمن الرحيم

[ ياضحكتي ونوحي ]

ياضحكتي ونوحي ... ياصديق جروحي
الله خالق روحي ... تخدم بعزائك

ياحليف ونيني ... ياشموع سنيني
إنته ساكن عيني ... مو كربلائك
_

رغم حَر الشمس والعطش أثّر بيك
أتبلل بإسمك سيّدي من احجيك
دمعي وراسي ينزل مِن يُمُر طاريك
حبيبي وبيك أحيه وآنه اموتن بيك

ياحياتي وموتي ... ياسكوتي وصوتي
يانحولي وقوتي ... أرفع لوائك

مجلسك يحييني ... ذكرك يبجّيني
إنته ساكن عيني ... مو كربلائك
_

يحسين ومثيلك ماكو أي إنسان
يذل ماي الفُرات وجبده ظَل عطشان
مو بس دم .. نِزَفْت آيات عالتربان
لإن عايّش بذاتك محتوى القُرآن

هذا دمّك جاري ... بي كلام الباري
وسفة جسمك عاري ... سلبوا ردائك

عبدك وتدريني ... مالي غير حسيني
إنته ساكن عيني ... مو كربلائك
_

تنصّب عالرمح راسك يلِب احشاي
واخافن مِن يُمُر وقت الصلاة اهواي
إذا سجديت راسك ينلجم مولاي
لإن مَيّت عطش بَعدَك كرهت الماي

يافُراتي الضامي ... ياربيع ايّامي
إكَبالي اشوفك دامي ... تكَطر دمائك

جرحك يداويني ... عَطشَك يروّيني
إنته ساكن عيني ... مو كربلائك
_

يا أوّل قصيدة تجسّد الإحساس
يا أوّل عذيبي يداعب الأنفاس
أذا يَم شجرة تكَعد تنسه طاري الفاس
هنياله اعله خوتك سيّدي العبّاس

خوّتك ندريها ... الله يحلف بيها
روحي نجمة احويها ... تغازل سمائك

بحُبّك مغذّيني ... بخيرك مغطّيني
إنته ساكن عيني ... مو كربلائك
_

يظَل حزنك جديد شما تُمُر اعوام
شلكَت بيك وأجتّك هاكثر الاسهام ؟!
صرت كلّك جرح مِن الجِدَم للهام
ونارك بالخِيّم شبكَت شكَد ايتام

والرمح والخنجر ... باسك من المنحر
وانته صوتك كبّر ... يعلن فدائك

يا أفاضل طيني ... صيتك معلّيني
إنته ساكن عيني ... مو كربلائك
_

أشوفك مو فقط صورة جرح ومصاب
يَمَن صورة جمالك تسحر الألباب
نمليت بدمّك ونورك أبد ما غاب
نَعَم بالجَنّة اشوفك إنته أجمل شاب

ياجمال عيونك ... حقهم يحسدونك
زادي مِن ماعونك ... رايّد عطائك

دنيتّي وي ديني ... بمأتمك ربّيني
إنته ساكن عيني ... مو كربلائك


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي