მთავარი არხი • Mtavari Arkhi

თითქმის ერთი თვეა გორში, რკინიგზის სადგურის დასახლებაში არაოფიციალური კომენდანტის საათია გამოცხადებული. ადგილობრივები გვიყვებიან, რომ საღამოს 9 საათის შემდეგ პოლიციელები მათ ქუჩაში გადაადგილებას უკრძალავენ და სახლში ყოფნას აიძულებენ.

მოსახლეობა ამბობს, რომ საღამოობით ეზოში ყოფნის საშუალებაც არ ეძლევათ. ხშირად ყოველგვარი განმარტების გარეშე, ღამის საათებში ქუჩაში მყოფ მოქალაქეებს საპატრულო და კრიმინალური პოლიციის თანამშრომლები აჩერებენ, ჩხრეკენ და სახლში შესვლას აიძულებენ. ადგილობრივები ამბობენ, რომ პოლიციის მხრიდან იყო სიტყვიერი და ფიზიკური შეურაცხყოფაც.

ადგილობრივები გამკაცრებული საპოლიციო მოქმედებების მიზეზს ვერ ხსნიან. პოლიცია ბრალდებებს უარყოფს.

"ყველა პატიოსან მოქალაქეს უნდა უხაროდეს ბევრი პოლიციელი ნებისმიერ ქალაქის უბანში, ხომ ეგრეა?!" - ასე პასუხობს გორის პოლიციის სამმართველოს უფროსის მოადგილე კითხვას - რა არის გამკაცრებული საპოლიციო ღონისძიებების მიზეზი.

ღამ-ღამობით რკინიგზის დასახლებაში დაკავებულ მოქალაქეებს შსს ერთი და იგივეს - პოლიციელისადმი დაუმორჩილებლობას ედავება. საქმეებს გორის რაიონული სასამართლო განიხილავს. იურისტების მტკიცებით, მომხდარი კითხვებს მოსამართლესაც უჩენს, თუმცა მიუხედავად ამისა, სასამართლოს ხშირად ყოველგვარი მტკიცებულების გარეშე მოქალაქეებს ადმინისტრაციულ სამართალდამრღვევად აცხადებს და აჯარიმებს.

რკინიგზის დასახლებაში მცხოვრებლებმა გადაწყვიტეს, რომ სპეციალური საგამოძიებო სამსახურისთვის მიემართათ. ათობით მოქალაქის საჩივარი, რომელსაც ადვოკატები გამომძიებლებს რამდენიმე დღეში გადასცემენ, უკვე მზადაა.

ავტორი: დავით კობიძე.

ვრცლად

გაუქმების საფრთხე ბათუმის ინკლუზიური თეატრალური დასისთვის. დასმა, რომელიც შეზღუდული შესაძლებლობების მქონე პირებისთვის უკვე 5 წელია ნათელი წერტილია, შესაძლოა არსებობა შეწყვიტოს. მათი ისტორია 2019 წლიდან იწყება, დღეს ამ დიდ ოჯახში 55 წევრია - 6-დან 28 წლამდე ასაკის ადამიანები.

ბათუმის მერიის გადაწყვეტილებით, ამ დასმა შეიძლება არსებობა შეწყვიტოს. მიზეზი, დიდი ალბათობით, მისი ხელმძღვანელის სამოქალაქო პოზიციაა. ნატალია გალოგრე "ოცნების" ანტიდასავლურ პოლიტიკასა და რუსულ კანონს აპროტესტებდა და აპრილ-მაისის აქციებზე იდგა.

ტენდერში, რომელშიც დასი წლების განმავლობაში იმარჯვებდა და დაფინანსებას იღებდა, წელს იურიდიული მიზეზით დაახარვეზეს. დასის ხელმძღვანელის თქმით, გამარჯვებული კომპანია ელემენტარულ სტანდარტსაც კი ვერ აკმაყოფილებს.

კომპანია, რომელმაც ბათუმის მერიის ტენდერში გაიმარჯვა და მალე ხელშეკრულებასაც გაუფორმებენ, ოფიციალურ წყაროებში არ იძებნება. უცნობია რას საქმიანობდა ის აქამდე. დასის ამჟამინდელი ხელმძღვანელის აზრით, საგანგაშოა, რომ ამ კომპანიას კომპეტენციის პრობლემასთან ერთად, შეზღუდული შესაძლებლობის მქონე პირების მიმართ დისკრიმინაციული დამოკიდებულება აქვს, რაც მათ მიერ წარდგენილ დოკუმენტაციებშიც იკვეთება.

სატენდერო კომისიის თავმჯდომარე, რომელიც ჟურნალისტებს საქმის დეტალებში გარკვევისკენ მოუწოდებს, ამტკიცებს, რომ ტენდერი, რომელიც უკვე ხელშეკრულების გაფორმების ეტაპზეა, თავიდან უნდა გამოცხადდეს.

ავტორი: ნანუკა მაღლაკელიძე; თეა ვაშალომიძე.

ვრცლად

უკრაინის პრეზიდენტმა პირველ ლედისთან ერთად რუსების დაბომბვისგან დაზიანებული ბავშვთა საავადმყოფო "ოხმატდიტი" მოინახულა. ამის შესახებ ვოლოდიმირ ზელენსკი საოციალურ ქსელში წერს.

"დღეს პირველ ლედისთან ერთად ბავშვთა სპეციალიზიებულ ჰოსპიტალს "ოხმატდიტს" ვეწვიეთ და იმ ბავშვებს გავესაუბრეთ, რომლებიც იქ მკურნალობას გადიან.

დაწესებულებამ ყველაფრის მიუხედავად განაახლა ნორმალური მუშაობა და აღიდგინა ძალები რუსული დაბომბვის შემდეგ. მე მადლობას ვუხდი ყველას, ვინც საავადმყოფოს ეხმარება, ვინც ადგილზე იყო რუსული რაკეტის მოხვედრის შემდეგ და ნანგრევებისგან წმენდდა, მხარს უჭერდა ბავშვებს, მადლობა ყველას მსოფლიოში, ვინც ეძებდა გამოსავალს უკრაინელების მხარდასაჭერად.

ჩვენ აუცილებლად აღვადგენთ ყველაფერს და დავამტკიცებთ, რომ სიცოცხლე უფრო ძლიერია ვიდრე მისი მტერი!"- წერს ზელენსკი.

რუსეთმა კიევში მდებარე ბავშვთა საავადმყოფო 8 ივლისს დაბომბა. კლინიკის ტერიტორიაზე 31 ადამიანი, მათ შორის 8 მცირეწლოვანი დაშავდა, 2 კი დაიღუპა.

უკრაინული მედიის ცნობით, კიევის „ოხმატდიტის“ საავადმყოფო უკრაინაში ყველაზე დიდი ბავშვთა საავადმყოფოა, სადაც 620 საწოლია განთავსებული და ყოველწლიურად 18 ათასამდე ბავშვი მკურნალობს.

ვრცლად