Next Step Agency | Rasmiy kanal

#foydasi_tegib_qolar

Assalomu alaykum kanal a’zolari,
mendan ko’pchilik Germaniyadagi bolalar bog’chalari haqida ham post yozishimni iltimos qilishadi. Bugun men internetdan va bir qancha saytlardan to’plagan ma’lumotlarimni post qilib yozmoqchiman.

✅ Hozirgi kunda Germaniyada 59 000 dan ortiq bolalar bog'chalari mavjud bo'lib, ularda 3,9 milliondan ortiq bola bor. Ammo eng katta muammolardan biri, bu bog’cha va tarbiyachilarning yetishmasligidir. Hozirda 100 000 ( 2030 yilda 230.000 ta bo’lishi kutilmoqda) ga yaqin tarbiyachi yetishmaydi va bu o’z-o’zidan bog’chalarda bo’sh joy topishni juda qiyinlashtiradi. O’zbekistonda bitta tarbiyachi bitta 20-25 talik katta guruhni eplashi mumkin, Germaniyada esa kichik yoshdagi 4 ta bolaga bitta, katta yoshdagi 8-10 ta bolaga bitta tarbiyachi qarashi kerak. O’z-o’zidan tarbiyachi qancha kam bo’lsa, shunga qarab bola qabul qilish ham kamayib ketadi. Bunday bo’lishiga sabab, Germaniyada tarbiyachi bo’lish uchun 3-3,5 yillik Ausbildung qilish kerak va bu Ausbildunglarning 80 % shu yaqin muddatgacha faqatgina maktabda dars sifatida o’qitilgan va oylik maosh to’lanmagan.

✅ 2013 yildan boshlab, Germaniyada har bir kichik yoshdagi bola bog’chaga joylashish huquqiga ega. Ammo bu faqat qonunan shunday, amalda, hozirda bog'chalarda 384 ming o'rin yetishmaydi:
Germaniyaning g'arbiy qismida joy yetishmasligi 362,400
Sharqiy Germaniyada - atigi 21,200 ekan.

✅ Odatda, Germaniyada bolalar bog'chasiga borish uch yoshdan boshlanadi. Eng kech 7 da tugaydi.Qonunga ko'ra bu yoshdagi har bir bola bog'chaga borish huquqiga ega. Keyin maktabga borishi kerak bo’ladi. 3 yoshga to'lgunga qadar, nemis bolalari bolalar bog'chalariga (Kinderkrippe) yoki "kunlik onalar" (Tagesmutter) deb ataladigan bolalar bog'chasiga borish huquqiga ega. Ammo maktabdan farqli o'laroq, bog’chaga berish majburiy emas.

1⃣ Kinderkrippe - uch oylikdan ikki yoshgacha bo'lgan bolalar uchun.

2⃣ Kindergarten- ikki yoshdan olti yoshgacha bo'lgan bolalar uchun mo'ljallangan.

3⃣ Kita - toza havoda o'yin va mashg'ulotlar uchun sharoit yaratadigan yaxshi himoyalangan hovlilar 0 yoshdan 6 yoshgacha bo'lgan bolalar uchun.

4⃣Dachkita - ko'p qavatli uylarning tomlaridagi guruhlar, odatda 3 yoshdan 6 yoshgacha bo'lgan bolalar uchun.

5⃣ Bauernhofkindergarten - bu bolalarni fermadagi hayot, hayvonlar va tabiat bilan yaqin aloqada bo'lishni o'rgatadigan ferma bog'lari.

✅ Germaniyada bog’chalarning ko’pi pullik, lekin ba’zi shaharlarda tekin ham bor ekan. Masalan Düren shahrida tekin ekan.
Bolalar bog'chasidagi narx xar-xil omillarga bog’liq:
- bolalar bog'chasining turi va xususiyatlari,
- davlat yoki xususiy,
- bola qancha vaqt guruhda bo'ladi,
- bolaning yoshi,
- oziq-ovqat miqdori,
- ota-onalarning daromadlari.

Germaniyada har bir oiladagi moddiy ahvolga alohida qarashadi.

Bolalar bog'chasi narxi oyiga 800 € gacha bo’lishi mumkin. Ota-onalarning maoshi va bog’chada qolish muddati qancha ko'p bo'lsa, xarajat shunchalik yuqori bo'ladi.
Bolaning yoshi ham katta rol o'ynaydi. Odatda bolalar bog'chalari uchun narxlar juda yuqori. Kuniga bir necha soat uchun ular oyiga 100-200 evro to'laydilar. To'liq kun uchun oylik to'lov 1 000 evroga yetishi mumkin. Uch yoshli bola uchun oddiy bolalar bog'chasi arzonroq - oyiga 20-100 evro.

#foydasi_tegib_qolar
Assalomu alayakum kanal a’zolari,
Quyidagi post Germaniyada har bir chet ellik albatta duch keladigan idora – Ausländernehörde (immigratsiya idorasi) va Viza haqida bo’ladi. Avvalambor bu idora o’zi qanday idora va uning vazifalari haqida to’xtalib o’tamiz.

✅ Germaniyadagi immigratsiya organi Germaniyada turlicha nomlansada, masalan- Ausländerbehörde ( ABH) , Landesamt für Einwanderung (LEA) , Landratsamt (LRA) - aslida chet el fuqarolari bilan bog'liq masalalarni boshqarish uchun mas'ul bo'lgan davlat muassasasidir.

Ushbu tashkilot Germaniyada yashash va ishlash uchun ruxsatnomalar, vizani uzaytirish, oilani birlashtirish va chet el fuqarolariga tegishli boshqa masalalarni ko'rib chiqish uchun javobgardir.
Bundan tashqari bu tashkilot Germaniyadagi chet elliklar uchun qonunchilik bazasi, shuningdek, zarur hujjatlar va tartiblar bo'yicha maslahat va ma'lumotlarni ham taqdim etadi.

Immigratsiya organining yana bir vakolati, qo’pol qonun buzish holatlarida vizangizni bekor qilib, mamlakatdan chiqarib yuborish huqugiga ega.

Yurtdoshlarimizdan deyarli har kuni – Vizam qachon chiqadi? Topshirganimga 1-2-3 oy bo’ldi, hali ham elchohonadan xabar yo’q? - degan savollarni eshitamiz.

✅ Siz elchixona yoki Visametric ga ariza topshirib, to’lov qilganizdan so’ng Sizning hujjatalaringiz Germaniyadagi Ausländerbehörde ga rozilik olish uchun jo’natadi. Shu sababdan Sizning Vizangizni kechikishiga elchixonani aloqasi yo’q, bu yerda Ausländerbehörde asosiy ro’l oynaydi.
Sizning Vizangizning kechikisihi quyidagi sabablardan biriga bog’liq bo’lishi mumkin:

✅ Butun dunyodan kelgan hamma ariza o’sha shahardagi bitta idorada ko’rib chiqiladi. Har bitta ariza batafsil ko’rib chiqish uchun uchun vaqt kerak bo'ladi.

✅Agar sizning viza arizangiz oʻta murakkab boʻlsa yoki qoʻshimcha hujjatlar yoki dalillarni talab qilsa, bu koʻrib chiqish vaqtini oshirishi mumkin, chunki bu qoʻshimcha tekshiruvlar oʻtkazishi kerak boʻlishi mumkin.

✅ Ba'zi hollarda biron narsadan shubhalansa immigratsiya idorasi qo'shimcha xavfsizlik tekshiruvlarini o'tkazishi mumkin.

Eng asosiy sabablar esa quyidagicha:

1⃣ Asosiy sabablardan birinchisi, Germaniyadagi Ausländerbehörde xodimlariga arizalar kishi soniga qarab emas, balki arizachining familiyasi boshlanadigan harf bo’yicha taqsimlanadi. Bu degani, agar Ausländerbehörde da 5-6 xodim ishlasa, shu xodimlar alfavitdagi harflar bo’yicha bo’lingan bo’ladi. Bitta xodim A, B, C, D, E harfi bilan boshlanuvchi familiyalarga javobgar bo’lsa, ikkinchi xodim F,G,H, I, J va hokazo ga javobgar bo’ladi.

Masalan, Z harfi bilan boshlanuvchi familiyalar kam bo’lsa yoki o’sha harflarga ma’sul bo’lgan xodim chin dildan ishlasa, arizalar 1 haftadayo ko’rib chiqilishi mumkin.

‼️ Agarda Sizning familiyangiz boshlanadigan harfga ma’sul xodim kasal bo’lib qolsa yoki otpuskaga ketsa, o’sha xodim qaytib kelguncha ariza ko’rib chiqilmay turadi.

2⃣ Ikkinchi bir katta sabab, milliy vizaning deyarli barcha turlari uchun Agentur für Arbeit – Mehnat Agentligi ning roziligi kerak bo’ladi. Mehnat Agentligidan rozilik kelgach, endi Ausländerbehörde ning navbati boshlanadi, ular ham ko’rib chiqqach elchixonaga yoki rozilik berishadi yoki rad qilishadi. O’z navbatida elchixona ham Sizga telefon qilib javobni yetkazadi.

✅ Aslida umumiy jarajon shunday davom etadi. Lekin Sizning milliy vizaning qaysi turiga topshirishingizga qarab, elchixonadan viza chiqishi farq qiladi.

1⃣ Ishchi viza- Fachkraft/Blaue Karte EU ( § 18a,§18b, §18g, §19 c) vizasi, eng tez javob chiqadigan viza turi. Mening bir hamkasbimga 1 haftada, mening o’zimga esa 5 kunda viza chiqqan.

2⃣ Oila birlashtirish vizasi – Familienzusammenführung, (§ 29, § 30, § 32) bu yerda turli faktorlar ro’l oynaydi. Ba’zilarga 1 haftada viza chiqsa, ba’zilarda 7-8 oygacha cho’zilishi mumkin.

#foydasi_tegib_qolar

✅ Assalomu alaykum kanal a'zolari,
ishlarim biroz ko'payib ketganligi sababli post yozishga vaqtim bo‘lmay qoldi. Quyidagi post umumiy mavzulardan biroz chekingan holda, NEMIS TILI  haqida bo‘ladi.

Hozirda O‘zbekiston va Germaniya o’rtasidagi aloqalar shiddat bilan rivojlanib ketyaptiki, eng boshlang‘ich daraja nemis tili bilan ham Germaniyaga kelish imkonlari bor edi va kundan kunga hamma uchun imkoniyatlar eshigi ochilmoqda. Lekin bularning barchasiga nemis tilini o’rganish orqali erishish mumkin.

Masalan:

1⃣ 2-3 oy nemis tili o‘rganib, A1 daraja bilan  AuPair dasturi orqali Germaniyaga kelish mumkin. (Bu va keyingi dasturlar haqida internetda ma’lumotlar yetarli)

2⃣ 3-4 oy nemis tilini o‘rganib, A2 bilan FSJ/BFD dasturlari orqali kelish mumkin.

3⃣ 5-6 oy nemis tili o‘rganib Ausbildung dasturi orqali kelish mumkin va hokazo.

Kuni kecha Prezidentning bir gapini eshitib qoldim. Tushunishim bo’yicha 6 oylik til o’rganish xarajatlari va imtihon chiqimlari ham qoplab berilarkan. Tashqi Mehnat Migratsiyasi har kuni e’lon bilan chiqyapti, 50 000 Germaniya uchun bo’sh ish o’rni bor va talabgorlar bizga murojaat qilsin deb. Ushbu dasturlar mutlaqo tekin bo’lib, Sizdan faqat nemis tilini bilish talab qilinadi holos.

✅ A1 va A2  darajani (sertifikatni)  va umuman nemis tilini o’rganish olish aytishga oson bo‘lgani bilan, nemis tili o‘ziga xos til bo‘lib, sabr-toqat va muntazam shug‘ullanishni talab qiladi.
Men o’zim 20 yildan ortiq tajribaga ega nemis tili o’qituvchisiman va men deyarli nemis tilini qanchada o’rganish mumkin, nima uchun nemis tili bunchalik qiyin, osonroq yo’li yoqmi, qaysi kitobdan oson o’rgansam bo’ladi degan savollarga duch kelaman. 
Buning javobini quyida biroz yoritishga harakat qilaman:

✅ Bizning o‘zbek tilimiz oltoy tillar oilasining turkiy tillar guruhiga kiradi va agglyutinativ til xisoblanadi. Bu degani bitta so'zga boshqa qopshimchalar qo‘shilib boraveradi.

Masalan: uyimizda -degan so‘z ichida, 3 ta so‘z bor.

1.bizning    2. uy  3. da.

Nemis tili esa hind-yevropa tillar oilasining german tillar guruhiga kiradi va flektiv til xisoblanadi. Yani asosiy so‘zga tegishli qo‘shimchalar  qo’shilib ketmasdan, aloxida yoziladi. O‘zbek tilidagi yuqoridagi ishlatgan -uyimizda- so‘zi bir qismli bo‘lsa, xuddi shu so‘z nemis tilida 3 ta qism bo‘lib ketadi.

uyimizda = in unserem Haus

(in=da, unserem = bizning, Haus = uy).

Bundan tashqari o’zbek tilimizda umuman mavjud bo’lmagan mujskoy, jenskiy va sredniy rod kabi tushunchalar nemis tilida bor va  bular der/die/das/die(ko’plik) artikllari bilan ifodalanadi.

Masalan eng oddiy oshxona buyumi bo’lgan – qoshiq, pichoq, vilka – ni olsak, qoshiq- der Löffel, pichoq – das Messer, vilka – die Gabel holatida yoziladi.

Ko’rib turibsizki, uchta buyum 3 xil jinsga(rod) tegishli. Ana endi o’zingiz xisoblab olavering, agar nemis tilida misol uchun 100 mingta ot bo’lsa, har bir otning artikli yuqoridagilardan biri bo’lishi mumkin va bularni yodlab chiqish kerak bo’ladi.

Bundan tashqari yuqorida aytib o’tilgan 4 ta artikl, 4 ta kelishikda turlicha shakllarda o’zgarib ketadi va Siz 16 ta artikl ga duch kelasiz. Bundan tashqari yana 12 ta noaniq artikllar ham borki, ularni ham yodlash va kerakli holatlarda ishlata bilish kerak.

✅ Yoki yana bir misol:

uning – ihr (ayol kishi)
unga  - ihr  (ayol kishi)
sizlar    – ihr (ko’plik)
ularning – ihr
Sizning – Ihr

Ko’rib turibsizki, o’zbek tilidagi har bir so’z boshqasidan ajralib turibdi, nemis tilida esa bu so’zlar 5 ta bir xil so’z bilan ifodalanyapti.

✅Quyidagi misol ham ancha qiziq:

Men kecha supermarketdan sotib olgan paltoni qaytarib berdim.

Ushbu gap o’zbek tilida bir qismli gap bilan ifodalansa, uni nemis tilida ikki qismli gapga aylantirish kerak bo’ladi.

Ich habe den Mantel zurückgegeben, den ich gestern im Supermarkt gekauft habe.

Assalomu alaykum kanal a’zolari,
Germaniyada nafaqat bir-ikki, balki bir necha yillardan beri yashab, hali ham maqsadiga yeta olmayotgan yoki o'z yo’lini topa olmasdan yurgan yurtdoshlarmiz ham bor. Ularning ko’pchiligining qo’lida O’zbekistonda olingan oliy ta’lim yoki o’rta maxsus ta’lim haqidagi diplomi bo’lsada, bu diplomni kerakli tashkilotlar orqali Germaniyada tan oldirib, ishchi vizasiga erishish mumkinligini bilishmaydi.
Aslida esa biroz sabr va kerakli jarayonlarni to’gri tashkillashtirish orqali, buni amalga oshirsa boladi. Quyidagi post bir singlimizdan keldi. Singlimiz ham o’sha jarajonlarni bosib o’tdi va Germaniyada tan olingan tarbiyachi diplomini qo’lga kiritdi.

#foydasi_tegib_qolar

✅ Assalomu alaykum kanal a‘zolari,
ushbu post Germaniyaga yangi kelganlar va kelmoqchi bo‘layotganlar uchun qiziq bo‘lgan
GERMANIYADA QAYERDA YASHASH YAHSHI mavzusi.

Tarixni o‘qiganlar biladiki, 2-jahon urushidan so‘ng Germaniya 2 alohida davlatga, Amerika, Angliya va Fransiya nazoratidagi Germaniya Federativ Respublikasi (GFR) va Sovet Ittifoqi nazoratidagi Germaniya Demokratik Respubikasi (GDR) bo‘linib ketadi.
1949 yildan 1990 yilgacha ikkala davlat boshqa boshqa tizimlarda faoliyat yuritadi. GFR da xususiy mulk va biznes gullab yashnasa, GDR da sotsializm va davlat mulki hukmronlik qilgan. 1990 yil ikki davlat birlashadi. Ammo oradan o‘tgan 50 yil umuman boshqa boshqa odamlarni tarbiyalab ulgurgan edi. Shu sababdan Germaniyaga kelayotganlar ba‘zi narsalarni bilib kelsa yahshi bo'ladi.

1950 yildan boshlab GFR urushda vayron bo‘lgan shaharlarni tiklash va ko‘mir konlarida ishlatish uchun Turkiya va Italiyadan ko‘plab Gastarbeiterlarni jalb qiladi. Ularning hozirda 3-avlodi yashamoqda va yillar davomida nemis halqi ularning borligiga ko‘nikib ketgan.

GDR esa sotsialistik davlat bo‘lgan Vetnamdan ishchi olib kelgan. Lekin ular aholining 1 foizini ham tashkil qilmagan.

Germaniya muhojirlarning eng ko‘p boshpana so‘rydigan davlati hisoblanadi Yevropada. 2015 yilda Suriyadagi urushdan qochib 1 millionga yaqin muhojirlar va 2022-23 yili yana 1 milliondan ortiq Ukrainadan odamlar kelgan. Davlat ularni ma‘lum qoidalar asosida joylarga taqsimlaydi.

Men o‘zim yashayotgan o‘lka Sachsen bo‘lib, Sachsen-Anhalt, Thüringen, Brandenburg, Mecklenburg-Vorpommern o‘lkalari bilan birga GDR tarkibida bo‘lgan.Biz tomonlarni hozirgacha Ostdeutschland yoki Ost (Sharqiy Germaniya) deb atashadi. Ikkala Germaniya qo‘shilib bitta Germaniya bo‘lgan bo‘lsada, hozirgacha ikkala davlat hududida farqliliklar bor.

1⃣ Ost dagi nemislar West dagi nemislarni ko‘p hollarda yoqtirishmaydi, arrogant (kekkaygan) deb. West dagi nemislar Ost dagi nemislarni unzufrieden/pessimistisch (doim hayotdan noliydigan va pessimistik kayfiyatga ega) deb o‘ylashar ekan.

2⃣ Ostdeutschland da yangi neonazist partiya bo‘lmish AfD partiyasi eng kuchli partiya hisoblanadi. Bu partiya nemis qadriyatlarini saqlab qolish, bir jinsli nikohlarga qarshi, Germaniyaga kelayotgan muhojirlar oqimini to‘xtatmoqchi va burka(qora hijob, faqat ko‘zi ko‘rinib turadigan) ni taqiqlamoqchi, va Germaniyada Islom dini yoyilishini hohlamaydi.

3⃣ Ost da oyliklar West ga qaraganda ozroq va ish imkoniyatlari kamroq. (vrach, o‘qituvchi, IT, hamshiralardan tashqari). Lekin uy ijara narxlari arzonroq. Masalan, men 3 xonali uyga hamma chiqimlari bilan 475 evro to‘laganman.

3⃣ Menga Westdeutschland dan kelgan tanishlarmining aytishicha, Ostdeutschland dagi odamlar turqi va muomalasi sovuq emish. Turli xil idoralarga borganda qo‘pol muomala qilisharmish. Chet elliklarni yomon ko‘rishadi deyishadi. Men o‘zim birinchi kundanoq faqat nemislar bilan ishlaganim va nemis tilim yahshiligi uchun ochig‘i shahsan o‘zim duch kelmaganman.

4⃣ O‘zbekistondan kelgan yurtdoshlarimizning ko‘p qismi GFR Westdeutschland yoki West (G‘arbiy Germaniya) da yashashni ma‘qul ko‘rishadi. Sababi oyliklar ko‘proq va ish imkoniyatlari ham. Bundan tashqari chet elliklar ham juda ko‘p. U yerlarda o‘zingizni boshqacha his qilsangiz kerak.

5⃣ Ost dagi ko‘p shaharlarda katta katta binolarni bo‘m-bo‘sh yotganini ko‘rish odatiy hol. Sababi bu yerdagi aholi va yoshlar yahshi hayot va ko‘proq pul topish ilinjida München, Hamburg, Stuttgart kabi West dagi katta shaharlarga ketib qolishgan. Men yashagan Altenburg shahrida 1990 yilgacha 50 ming odam yashagan bo‘lsa, hozir 33 minga atrofida odam qolgan. Ko‘p binolar bo‘sh yotadi, shu sababdan ijara narxi arzon va uy topish muammo emas. (Uy topish azobini West dagilar yahshi biladi😊)

#foydasi_tegib_qolar

✅ Assalomu alaykum kanal a’zolari,
Men o’zim Germaniyadagi integratsion til kurslarida dars berganim uchun,

INTEGRATION TIL KURSLARI va KIMLAR BU KURSLARDA O’QISHI

haqida yozmoqchiman.

Germaniya Federativ Respublikasi o’zining bag’rikenglik siyosatini Konstitutsiya darajasida mustahkamlab qo’ygan. Bu degani Germaniyada o’z yurtidagi siyosiy ta’qiblardan yoki urushlardan qochganlar Germanyia davlatidan boshpana so’rashi mumkin. Yiliga 100 minglab kishilar Germaniyaga kelib, kerakli idoralarga borib boshpana so’rab ariza berishadi.

Masalan hozirda 1 Milliondan ortiq Ukraina davlatidan kelganlar Germaniyada yashashmoqda. Bundan oldin esa yana 1 Millionga yaqin inson Suryadagi urushdan qochib kelishgan edi.

✅ Germaniyada BAMF degan tahskilot, har bir insonning arizasini ko’rib chiqib, yoki Germaniyada qolishga, yoki o’z davlatiga qaytib kelishiga qaror qiladi. Agar ariza tasdiqlansa, Sizni va oila a’zolaringizni Germaniya ozi istagan shaharga yoki qishloqga jo’natadi. U yerdagi chet elliklar idorasi Siz uchun ASYL (qochoq) degan Viza beradi. Bu Viza turi bilan Siz Germaniyada ishlashingiz va yashashingiz mumkin. Bu bir qarashda jozibali va yahshi ko’rinsada, o’ziga yarasha muammolari ham yetarli.

‼️ Eng katta minusi – Siz Germaniyadan boshpana olganiz evaziga, o’z Vatanizga borish huquqidan mahrum qilinasiz, ya’ni Vataningizni bir umrga yo’qotasiz.

✅ Germaniyada JobCenter deb ataluvchi tashkilot bo’lib, bu tashkilot Germaniyadagi qochoq va ro’yhatga olingan ishsiz insonlarga oyiga o’rtacha 500 evro atrofida va bolalar uchun har biriga 250-300 evro atrofida pul to’laydi. Ish topguncha uy-joy ijarasi va issiq-sovuq suvlar xarajati ham qoplanadi.
Evaziga Siz o’zingiz hohlamagan ishlarga va nemis tilini o’rganishga majburlanasiz. Agar Siz yosh bo’lsangiz, 2-3 yil ichida o’rganib ketishingiz mumkin. Lekin katta yoshli odamlarga yangi joy va yangi til juda qiyin bo’ladi.

✅ Germaniyaga uzoq muddatga kelgan har bir odam, hoh u qochoq bo’lsin, hoh oila birlashtirish vizasi bilan kelgan bo’lsin Integrationskurslarda nemis tilini o’rganishi mumkin. Bu kurslar paket sifatida taklif qilinadi.
Siz darsga har kuni 3 soatdan 6 oy davomida qatnashingiz shart va A1 dan B1 gacha nemis tilini o’rganasiz, kurs ohirida B1 imtihon topshirasiz.
Kurs aslida pullik bo‘lib, oyiga 450 evro atrofida to’lov qilinishi kerak. Lekin Siz va turmush o’rtogingizning umumiy daromadlari yillik 40 ming evrodan oshmasa, Agentur für Arbeit (mehnat agentligi) dan maxsus ruxsatnoma olish orqali, tekinga o’qish mumkin. Yoki Siz uchun 50 % chegirma beriladi va shu chegirma bilan ham nemis tili kurslarini arzonroq o’qishingiz mumkin.
Bu ayniqsa oila birlashtirish vizasi bilan kelganlar uchun yahshi imkoniyat.

Bundan tashqari Germaniyada uzoq vaqt qoluvchilar uchun Leben in Deutschland kurslari ham bor bo’lib, keyinchalik Germaniya fuqaroligini olmoqchi bo’lgan har bir inson, ushbu kursni qilishi kerak.

✅ Hozirda Germaniaga ko’p so’nli chet elliklar kirib kelayotgani sababli, men kabi Integratsion kurslarda dars berishni hohlayadigan nemis tili o’qituvchilarga ehtiyoj katta.
Agarda Sizda nemis tilidan C1 til sertifikati bo’lsa, integratsion kurslarda dars berish uchun Germaniayaga kelishingiz mumkin.

Kanalga a’zo bo’lishni unutmang:
https://t.me/next\_step\_agency

Murojaat uchun: @azimjon_ibragimov