الشاعر احمد رزاق الأعرجي

لقضاء الحوائج


مــرفـوعــات اديـنـه
صوب ارض المدينه
ونـدعـي يـا الهـي عدنه حاجـات
ابـجـاه ام البـنـيـن أم اربـع آيـات
اگـضـيـها الـحـوائـج

مـعـراج الـخــدم يـارب دمــعـه بـمـجـلس الـزهره
حـوائج عدنـه يــامـولاي بخـجل نـطـلبـها وبعـبره
بـعـزاء الــزهــره تـنـظـرنـه ومـحـله منـك النـظـره
يـــاربـنــا الـــغـنـي انــتـه واحــنـه ابـابـك الـفـقـره

حوائج عدنه مولاي
مثـل عطشـان للماي
يـالـرافـع بــلا عــمـد الـسـمــاوات
ابـجـاه ام البـنـيـن أم اربـع آيـات
اگـضـيـها الـحـوائـج
____1____

بجـاه الــسـيد الـسـجاد شـافي وعـافي كـل مـعـلـول
يالجاعـل عـزاء حـسـين مـسـتـشفـى وتـريـح اعـقول
عقـيده عدنه بالمـجـلس يـطيب ويمـشي كل مشلول
لو يبچي لمصاب حسين السحگن فوگه عشر خيول

ياربي برحـمتـك
أرزقنا بـنظـرتـك
وارزقـنــا الـمـجـالـس والـزيـارات
ابـجـاه ام البـنـيـن أم اربـع آيـات
اگـضـيـها الـحـوائـج
____2____

بـــجــاه الــمــا شــــبــع مـــنّـه گـــاروكـــه ولا أمّــــه
عــبــد الله الگـضـه ضـامي بـجـاهـه علـيـك وبعـمّـه
كـلــمــن راد ذريـّــة ارزقـــه وانـــتـه ابـو الــرحــمــة
حـتـى يـكــبــر اولــيـده ويــتربــى عـلـى الـخـدمــة

عـــبــدك رافــع ايـده
ويدعي بكل قصيدة
وأنته الْتسـمع بصـوت المنـاجـات
ابـجـاه ام البـنـيـن أم اربـع آيـات
اگـضـيـها الـحـوائـج
____3____

كـلـمن عـنـده حـاجـه الـيـوم يـارب كـون تـگـضـيـهـا
بــجـاه الّــي مـشـت لـلـشـام واعـلـه الرمح حـاديـهـا
كـلـمـن عـنـده طلـبه شـلـون يـحـچـي لـو يـخـلـيـهـا؟
يـالنـمـلـه بوسـط الابـحـور وعـمـيـة وانته منـطـيهـا

يالـما تنـسى عـبدك
الحوائج كلها عندك
أقـرب مـن دمـانـه ابـلا مـسافـات
ابـجـاه ام البـنـيـن أم اربـع آيـات
اگـضـيـها الـحـوائـج
____4____

كلـشي انطيـتنه وشكـراً الـك حد گطـعت الانـفاس
منطـينه الـجـزع والـنـوح والـحـرگـة علـى العبـاس
مـطـالـبـنـه أتـعـرف بـيـهـا ومـانطـلبهـا مـن الـنـاس
نـطـلـب وانـت تنـطـيـنه الـغـيـرك مـا حِنينه الراس

يارب الوسـيـعه
ارزقـنا الفـجيعه
لحسين ومُصـابه ابـكـل الاوقـات
ابـجـاه ام البـنـيـن أم اربـع آيـات
اگـضـيـها الـحـوائـج
____5____

#رزقهم_سلام_الله_عليهم
#احمد_رزاق_الاعرجي

" مواكبنا نصبناها "



يـبـو صـالـح مـواكـبـنـا نصـبناهـا
ورايـة لـخـدمـة الزايـر رفـعنـاهـا
اچفوف بحب ولائية
للخدمة الـحـسـيـنية
مـواكـبـنـا نـصـبـناهـا

گـضـت أيـام مـجـلـسـنـا وبـدت أيـــام خـدمـتـنـه
تـحـزّمـنـه بـــ ابـو فـاضـل وعـلّــگـنـاهــا رايـتــنـه
ويـاسـيـن بـحـزن يـقـره قـصـيـدة وبـيها غايتـنـه
( يـحـسـيـن بـضـمـايـرنـه صـحـنـه بـيـكم آمـنّـه )


يالمهدي أتعرف خدام ابو الاحرار
خـطـار الله عـدهم حـضرة الزوّار
الزايـر نـسمـة للـريـة
للخدمة الـحـسـيـنية
مـواكـبـنـا نـصـبـناهـا
____1____

بـدرب حـسـين شـفـنـه أزغـار واحـد گـال للثاني
الــزايـــر ذاك الــك أخـــذه وهـالـزايـر اِلِــي انــي
وشـفـنـه كـبار بـالاعـمـار بـديـهـم شـالـو صـواني
يـخـدمـون الـعـراقـيــيـن ويـخـدمـون الايـرانـي

مـيـفـرقـون بـالجنـسـية تـعرفـهم
والـفرّق وحـقّـك أحـنه مـو مـنهم
وهايه خالصه الـنـيّه
للخدمة الـحـسـيـنية
مـواكـبـنـا نـصـبـناهـا
____2____

يالـتمـشي بظــهـر محـنـي وبيـدك رافـع الرايـه
ودمـعك من دِمه مولاي يالمهدي وحچي هوايه
بيا مـوكـب تجـي وتـرتـاح لـمّـن تمشي مـشـاية
ومـنـو ينطـيك شربـة ماي من تعطش يـمولايه

هنياله التجي ومن چفّه تآخذ ماي
يـرادلـهـا دعـوة مـن الـزچـيـه هاي
وحگ الغالي ابو ارقيه
للـخـدمـة الـحـسـيـنية
مـواكــبـنـا نـصــبـناهـا
____3____

بـالـمـــشـايــه گـدامـــك زاد ومـاي اكــو كـــثـــره
وبـالـك گــلّـه يـــالـــمـهـدي يـم زيـنــبـكـم الـحـره
أجت واعيونها اعله ارمـاح من الـشـام بالـحـسره
ومــا لاگـاهـا أي مـوكـب ولا رايــة تـرف خـضـره

وبهذا الزمن مـوكب بـصف مـوكب
هـلا ومـيّـة هــلا بـالـزايــر ايرحـب
ابـدمـعـة كـربـلائـيـة
للخدمة الـحـسـيـنية
مـواكـبـنـا نـصـبـناهـا
____4____

بـهـاي الـدنـيا مـانـعـرف لـو مـا أنـتـه دمـعـتــنـه
مثل گطرة مطر ضعنه وگـاع الخدمة جـمـعـتنـه
يــالـتـعـرفـنه كـلـــش زيــن يالـتـقـراهـا نـيّـتـنـه
شمس ذنوبنه وتچوي وتضمنه الخدمة خيمتنه

ثـوب الخـدمـة يامـحـلاه سـاتـرنه
ومـن أجــلـه تـره الــوادم تـقـدّرنه
فخر للـكرة الارضـية
للخدمة الـحـسـيـنية
مـواكـبـنـا نـصـبـناهـا
____5____


#رزقهم_سلام_الله_عليهم
#احمد_رزاق_الاعرجي

وصتني امي بهاي الاحجايه
لو رايـد الله امـشـي مـشايه
ودمع ... بعد
لحسين أهمل وارفع الرايـه

يـولـيـدي اوصـّيك ... گالت خادم ادريك ... ربـيـتـك بـديــه
كل خطوة عبادات ... لتـهم بالـمـسـافـات ... هم لابن الزچيه

يــبـنـي الـعـمـر مـثـل الـسـهـم مـابـي ابـد رجـعـه
أمـشـي مـشـي وأدعـي الـي وخـل تنـزل الدمـعه
ولا تـمـشي بـالْـفـي وانـچـوي للـمـنطـحن ظـلـعه

گـالتـلـي يـمُّـه أخلص بَعبَره
مارايده اتفشّل اويه الزهره
نـذر ... تـره
ناذرتـك آنـه لخـدمة العـترة
1

گـلتلهـا شـتـوصّـيـن ... أغـلى منـچ حـسين ... علمـتيني انـتـــي
أمشي وحيلي وياي ... حد ما يحني مگفاي ... ماابطل خدمتي

فـوگ الـمـتـن ويـلـوگ ألـي زنـجـيـلـي حـضـرتـه
وبـصـوت يـاسـين الـرمــيـثـي جـروح سـمّـعــتـه
لا بــاعــنـي مـــن زغــري يــمّــه ويــاي لا بـعـتــه

بهـدومي هاي السودة اتباهه
بـيوم القيامة هناك يم طاهه
وشرط ... بـعـد
بالجـنة يُـمّـه هـنـاكـه الگـاهه
2

گالت يمُّه هـيهات ... تتــرك هـالزيـارات ... وادريبك تحبها
خادم الهم ادريك ... بس أمك تهم بيك ... هذا الام گـلبـها

مـاتـســتـراح وادري يـبـنـي الـراحـه مـن تـتـعـب
الـمــهـدي يـمــشـي بـهـالـزيـاره ويـلـهـج بـزيـنـب
وبــگـلـبـه نـار الــطـف ابــد مـاتـنـطـفــي تــلـهـب

وآنه اسمع الها ودمعتي تجري
وتـگـلّـي يـمُّـه مـابـقـى بـعمري
وأبـو ... عـلي
امنيتي يحضر من اطب گبري
3

من زغري آنه وياچ ... امشـي ويّـه مـمـشاچ ... والـرايـه بِـدِيـنــه
قـرآن نـقـره ونـزور ... من نمشي الدمع نور ... يام روح الحنينه


صــورة ال عـلـي تـآخـذهـا امـي ومـاتـهـد چفها
طـول الـدرب بـالـصـورة تـنـظـر والـدمـع حـفـها
واســوالـف لـصــورة عـلـي بـفـطـرة تـسـولـفـهـا

وتـگـلّه جـبـتك يـاعـلي ويـانه
من بيـتـنه لـكـربـلـه مـمـشـانه
وعـلي ... ابـد
طول الدرب متگول عطشانه
4

الموكب يا هلا يصيح ... وأمي تگلّي تسبيح ... هالچلمة العجيبة
ماي وكلشي موجـود ... واخيام وهلا وزود ... بس زينب غريبة

گـالـت غـريـبـة مـن أجـت زينـب ومـحـنـيـة
بـهـذا الـدرب مـآذي الـعـطش علـويه علـويه
وصـلـن عـبــي وبـيـهـن جـمـر بـالاربـعـيـنيه

وتـگلّي مـآذيني الـوجع بيه
بهذا الدرب مارجعت ارقيه
صعب ... تــره
الوالد يلچمة افراگ الابنيه
5

شافت صورة لحسين ... هملت دمعـت العين ... صاحتله أجيناك
بـالطـف انـت مـولاي ... بس شو تمشي وياي ... واهنانـه لـگيناك

باست الصورة ومسحت الصورة اعله فطرتها
وگــعـدت وزارت صـورِتـه وكـمـلـت زيـارتـهـا
والـفـاطـمـة الـزهـــراء قُــربــه لـلــه أهــدتـهـا

تعبانه بـس بالمشي تسبگني
واتگـلّـي لاتـتـعـب ابـد يبني
العزم ... جبل
عدها وابد هالجبل مايحني
6

#رزقهم_سلام_الله_عليهم
#احمد_رزاق_الاعرجي

لسيدي ومولاي زيد ابن علي الشهيد " عليه السلام "

صلْـبـوك واتضل رايه شيعية
ياصـاحـب الـثورة الحسينية
يازيد الشهيد

يـاثــائـر بــوجـه الــظــلـم يـاصـرخـة فـاطـمـيـة
يــاســيـف يـاحــق يـاعــدل يـارحـــمـة ربـانــيـه
يـالـمـــاقـبلـت اعـلـه الـظـلـم يـالـثـورتـك حـريـة
سـيــفـك بـچــفـك صـاعـقــه بـنـحـور آل امـــيه

يالرايتك مرفـوعـه بالحـكمه
والـمايـفـهـمك نـاقص بعلمه
يازيد الشهيد
____1____

صـلــبـوك لاچــن مـــادرو قـــــرآن ذكــرك دايــم
للشام راسك من وصل سيف اصبح اعله الظالم
چــنـك حسـين بـثـورتـك يـاشـمـس بـين الودام
العبـاس چـنـك مـن تـطـب بـالركب سيفك هايم

چنت بخشوع اتطيّح ادموعك
بـس الاحسـين وآله موضوعك
يازيد الشهيد
____2____

ذبحوك بس تبقـى جـذر أصـلـك سـمه وتـتفرع
والـشـجـره لـمّـن تنـگطـع بـاقـي جذرهـا ويطلع
حـرگـوك لاچـنك ذهـب بـالـحـرگ تـبــقى تلـمـع
جـسـمـك انـذر بـس وعـلي عالـماي هيل اتوزع

بيرغ عشـيرة يـناطح الغيمة
يالعايش بروحك جمر خيمة
يازيد الشهيد
____3____

جـيـنـه اعـله بـابــك سـيـدي ودمـوعـنه همّـاله
والمـهدي هـسـه بمـرقـدك يبچي ويون شـحاله
يبـچـي لـمـصـابك والـدمـع يـنـزل دمـه ويبراله
امـصابـك رسـم رمـح ونحر للـسـحـگته الخياله

شـايل جـروح الـعاشـر بگلبـه
ودموعه ترسم أحـرف الندبه
يازيد الشهيد
____4____

الله يـعـين الـمـنـتـظـر عـايـش ونـيـن وحـسره
جرحين صوبله الجذع جذع الصلُب والـعصره
شايل بگلبه شگد حزن وانفاسه تچوي الجمره
مـحـني مثـل مامنـحنـي حـيدر بـيـوم الزهـره

ويـرحــّـب بـزوارك بحـرگـة
مـحبـوبـنه مشتـاگ للمـلگـة
يازيد الشهيد
____5____

#رزقهم_سلام_الله_عليهم
#احمد_رزاق_الاعرجي

#عالبساطة خدمتي عايشها دوم
ياحسين وانت أدرى #ابهالامر
ما أهم #يقرالي ذاك وذاكـه لا
المهم #تسمع اليقرالي الشعر
آني مااعرف بدنياي اعيش
والله دونك چان ضيّعت العمر
يبو سكينه وياك #ماادوّر ثواب
ولا ادوّر من بشر چلمة شِكُر
كون #ترضى عليه كلشي مااريد
وكون خادم ابقى الك ما اندثر
وأول وآخر #أمنيّة بهالحياة
هيّه تحضرني اذا ضمني #الكبر

#خادمكم_يا_ابو_علي
#احمد_رزاق_الاعرجي

موكب الأنبياء



مــوكــب تـشــيّــد
مــــن آدم الــحـــد
طــــــه مــحــمــــد
وفـايـه وفـايـه

بعالم خيالي شفت موكب خدمه
مـن آدم لآخـر نـبـي مـتــحـزّمـه
نوح النبي عاف السفـينه وهـمّـه
يركب سفينة الحُسين الضـخمـه

هالموكب .. بالمُجمل
يخدم بي .. كل مرسل ... وعـيونه ابراحـه
كــل رايـه .. اترف غيره
وآدم عـاش .. ابـديـره ... تـسـوه التـفـاحـه

يـا أهـلاً ايـصـيـح
وهالچلمه توضيح
كل خطوه تسـبيح
وفـايـه وفـايـه
____1____

آدم وچــن يــــزرع ورد بــالـمــوكــب
والـنـبـي مـوسـى بــالـغـراض ايـرتّـب
وادريـس شـال الـقـلم بـيده ويـكـتب
ابموكبنا تلگه ان شاء الله شي يعجب

بــس آمـر .. يـالـزايــر
تسمع بس .. الـحـاضـر ... اسرع من آصف
يالـگـاصـد .. مـتـهـــنّـي
للـــجـــنّـه .. مـتـعــنّــي ... والأهـلك عـايف

صوت السـماوات
محلاهـا خطـوات
هــاي الـعـبــادات
وفـايـه وفـايـه
____2____

يحيى النبي للخدمه شـد أحـزامـه
من الاحسين وللاحــسين ألــهـامـه
والْــنـبــي إبــراهــيـم لــن گــدامـه
بـــالـرايه سوه بيده احلـه اعمـامـه

والـزهـره .. مـن مـرت
بالموكـب .. چن نظرت ... يوسف مبتسم
ويــنـادي .. حـــيـاكـم
عـين الله .. تــرعـاكـم ... منــكم والـنِـعِـم

وبالـموكب تـشـوف
مـا تـتعـب أچـفوف
عــالــزايـر اتـطـوف
وفـايـه وفـايـه
____3____

اي طفل يبچي وماكو واحد يـمه
عيسى النبي يركض عليه ويكلمه
والـنبي داوود وشـعـيـب وعـلـمـه
صاحـو هـلا بـزوار راعـي النعـمـه

اعله الموكب .. مر موكب
كــل هـــودج .. متحـجّـب ... متغطي ابرايه
چــن زيـنــب .. بـت حيدر
مـــوكــبــهــا .. بـــي خـدّر ... گـاصـد مشايـه

ضـعــن الــفــواطــم
مــن غـــربــه قـــادم
كـــل خـطـوه راســم
وفـايـه وفـايـه
____4____

والنبـي يونـس چن يـرف بالرايـه
وبالدرب شـاف المهـدي بالمشايـه
والضوه بعـيـونـه يـغـطّـي اولايـه
مشتاگلك يالمهـدي صـاح اهـوايـه

والــكــافـل .. مـن الــطـف
گــاصـدهم .. چن مصحف ... ويـوّصـل چلـمه
كـل واحــد .. خــطــواتــه
محــسـوبه .. ودمــعــاتــه ... ابديوان الخدمـه

يالتـمـشـي مــشـّــاي
وجـروحـك اهـــواي
شــوفـتـكــم الـمـاي
وفـايـه وفـايـه
____5____

#رزقهم_سلام_الله_عليهم
#احمد_رزاق_الاعرجي

يـخـدام العـقيـله
الى الله الوسـيله
شـعـائـرنــه ... شـعـائـرنــه
الـخِدامه علينه خيمة
نـهـر والـدنـيـا هـيــمة
شـعـائـرنــه ... شـعـائـرنــه

اليعيش بهالخدامه ... يعيش بـكل كرامة
والـملائك بالـقيامة ... بـي تفاخـر بـي تفاخر
فـخـر عـز ومـهـابه ... الخِدم أهل النجابه
دمْعِـته التهدل نِگابه ... بي تفاخر بي تفاخر

مجـالسنـه مـدارسـنه وتـخرّج اجـيال
وطن عبد الرضا وحمزه وعلي التلال

وخدم عدنه شكثرها
فــنـت الـهــا عــمـرها
شـعـائـرنــه ... شـعـائـرنــه
خـدامـتـهـم عـظـيـمـة
نـهــر والـدنـيـا هـيـمـة
شـعـائـرنــه ... شـعـائـرنــه
____1____

الحـسيني بگلبـه مـأتم ... بـمـجالـسـنه ايـتحـزّم
يحترك حـرگ المـخـيم ... كـل عـزيه كـل عـزيه
اليدگ ايده اعله صدره ... وحمل بچفوفه جمره
اتسـجل بدفـتر الزهـره ... كـل عـزيه كـل عـزيه

الرفع چفه وذرف دمعه بعزاء حسين
ربح دنيا ووربح دينه ونجى بداريـن

الخُلص نيته بعزاءه
الدمع يـصبح رداءه
شـعـائـرنــه ... شـعـائـرنــه
ولا ضـيـم اليـضـيـمه
نـهـر والـدنـيـا هـيـمة
شـعـائـرنــه ... شـعـائـرنــه

____2____

لــطُـمـنـا والــمـواجـع ... وألـمـنـا والـمدامع
للحسـين ابلا مـنـازع ... يدري بينه يدري بينه
نبض عاش ابگـلـبـنـه ... نحبه وهم يحـبنه
الحسين اصبح دربنه ... يدري بينه يدري بينه

منو مـثله خـيم عنـده وخـذتـها النـار
ورغم ذبحه شرق صبحه ابو الاحرار

بدماءه ضحه النـه
ورسم بالدم وطنّه
شـعـائـرنــه ... شـعـائـرنــه
ابـو الروح الـكـريـمه
نـهـر والدنيا هـيـمـة
شـعـائـرنــه ... شـعـائـرنــه
____3____

تـضــل صرخـة ضـمايـر ... الا هل من مناصر
لبيك من فـوگ المــنـابر ... صوت صحنه صوت صحنه
نـضـل نـخـدم عُـــمُـرنـه ... بـزغــرنـا وبكـبرنـه
انموت بس يبقى ذكرنه ... صوت صحنه صوت صحنه

ذخـر والـلـه تضـل الـنـه المـجالس هاي
مثل ضامي ومشه بهيمة ويلاگي الماي

متاع النـه بحشرنه
خِـدامــتـنـا سـتـرنه
شـعـائـرنــه ... شـعـائـرنــه
الـعـزا لـمّــن نـقـيــمـه
نـهـر والـدنـيا هـيـمـة
شـعـائـرنــه ... شـعـائـرنــه
____4____

ضـوه ومـاي ومـحـنه ... المـجالس احـله جـنّه
والطلب حاجة وتمنّى ... يـلـگـه والله يلگه والله
اليجي وشـايل ذنوبـه ... ودموعه امغرگة ثوبه
ورايـد ايحـصـلّـه توبه ... يـلـگـه والله يلگه والله

الدمع يشرح دمع يمسح ذنوب الناس
اذ الدمـعـه لابو اليـمه وعــلـى العباس

عقـيدتنا القـويـه
تضـل النـه هوية
شـعـائـرنــه ... شـعـائـرنــه
الـعـزاء الله يديـمـه
نـهـر والـدنـيا هـيمة
شـعـائـرنــه ... شـعـائـرنــه
____5____

الحـياه والبـيـها كـلــها ... بـلطـمنا خـل نگلها
هالمجالس احنه اهلها ... احنه اهلها احنه اهلها
تـِـدور الــدنـيـا بـيـــنـه ... ودمـعنـا مفـصلينه
ويضل ثابت كل حچينه ... احنه اهلها احنه اهلها

ضوه بظلمة لابو اليمه علگنه ارواح
التعب يسوه لابو النخوه عطر قداح

لابو سكينه نعاهد
يضل عليـنه قـائد
شـعـائـرنــه ... شـعـائـرنــه
اليضدها شكد جريمه
نــهـر والـدنـيا هـيـمة
شـعـائـرنــه ... شـعـائـرنــه

____6____

#رزقهم_سلام_الله_عليهم
#احمد_رزاق_الاعرجي

يوم الظهور العالمي


يـوم الـظـهـور العـالـمـي ... منـتـظرينه منتـظرينه
نـور الـغـلام الـهــاشـمـي ... منتـظرينه منتـظرينه
وبيده ايأسس كوكب كوكب
ويخـلّـي الأنـسـب بالأنـسـب
مـنـتـظـريـنـة

بلحـظة ظـهور المنـتـظر ... أيعم الامان اعله البشـر
وتتكـحّـل ابواب البـصر ... بالمهدي
والـصيحه باجر بالسـمه ... تشفي الجروح الـفاطمة
وتشفي نحر ذابح ضمه ... بالمهدي

باجر ابو صالح ... من يظهر ينادي
ياثار ابو ارقيه
والحگ ابد ميضيع ... مادام طلاّبه
بالكرة الارضيه
من يظهر القائم ... هالارض تتسمى
الكرة الشيعية

اتلوگ السـياده بـس اله ... فـدوه لعينه فـدوه لعينه
وبصوته يخطب عالمله ... فـدوه لعينه فـدوه لعينه
كلشي اعليه لا لا مايـصـعـب
ويخـلّـي الأنـسـب بالأنـسـب
مـنـتـظـريـنـة
____1____

كل الـكواكـب من يهـل ... أياسسها بـچفوفه العدل
والفرگة يذبحها بشـمل ... من يظهر
أيأسس مـدارس للعِلِـم ... أتـخرّج شبــاب المتـلزم
وما يبقى شي ماينفهم ... من يظهر

والغايب امن ايرد .. يلگـاها مـفـتوحه
ابوابها السهله
مشـتاگـه لعـيونه .. راعيـها من يرجـع
يا مرحبا اتگله
والناس لو عمـيه .. هم تعرف المهدي
من عطره تندله

يـلـفـينـا هـوّه ورايـِتـه ... محتاجينه محتاجينه
عـجّـل الـهـي بطـلعِـته ... محتاجينه محتاجينه
نـنـتـظـره سـنـيـن ومانتـعـب
ويخـلّـي الأنـسـب بالأنـسـب
مـنـتـظـريـنـة
____2____

مـحـلـه الـبـهـيّـه طلـعِـته ... لله مـبـاشــر دعــوتــه
أباذن الله يحيي وقدرته ... مـهـديـنـه
ينصـب عـزا ابـن الحـسن ... ويرفع چفوفه بالعلن
ويـدعي ويـرد مـلا وطـن ... مـهـديـنـه

من يدعي ابو صالح ... يحيي القبل ماتـو
والعـاشـو بـذكره
ويــرد شـعـر عــبـود ... وي كاظم المنظور
ايكتبون عالفطرة
والمهدي يبچي دموم ... من گلي يالميمون
حمزه يِرد يـقـره

كل خـادم ايـرد والـدمع ... عايش بينه عايش بينه
وياسين صوته المنفجع ... عايش بينه عايش بينه
بعشگ المهدي الواحد شيّيب
ويـخـلّـي الأنـسـب بالأنـسـب
مـنـتـظـريـنـة
____3____

خــدام ابـو صـالـح كـثـــر ... بإيـديهم احتـضنو جمر
وبيهم جروح الطف خضر ... بالخدمة
بكل مجلس المهدي بوفـه ... يحضر حـنين وعـاطفه
يـعـرفـنـه حـق الـمـعــرفـه ... بالخدمة

سلام يـامـهـدي ... نـحچـيهـا وبحرگه
ماغيـره قـائـدنــه
انحبـنه ويحبنه ... والـشـوگ ذابـحـنه
مجلسـنا شاهدنــه
مثل الهوه بينه ... نـخـتنــگ مـن دونه
تـشهد قصـايـدنــه

مرجعنـا دنـيا وآخـره ... الحب مهدينا الحب مهدينا
والّي نسـى خـ نذكّره ... الحب مهدينا الحب مهدينا
لـلـه الــمـهـدي درب امـرتـب
ويخـلّـي الأنـسـب بالأنـسـب
مـنـتـظـريـنـة
____4____

باجر يجي وينصب خيم ... ويم الخـيـم ينصـب عـلم
وشاطي يصيروله الخدم ... من يعطش
راعـي الـسـيادة لـو ظهر ... يصبح ترف حتى الحـجر
حـنّـيـه يـنطي الـكل نـهر ... من يعطش

ونشوف ابن مريم ... قـائـد الــقـواتــه
والفرحه بـعيونه
كـما صُبـح عابـس ... مجـنون بحـسينه
وعاشگ يسمّونه
عيسى ابن مريـم ... عاشگ تره المهدي
والمهدي مجنونه

باجـر يـشـگ ثـوبــه الـلـطم ... ويماشينه ويماشينه
ويسحگ على راس الخصم ... ويماشينه ويماشينه
وتـسبـيح الـمـهـدي يـازينـب
ويخـلّـي الأنـسـب بالأنـسـب
مـنـتـظـريـنـة
____5____

#رِزْقهُم_سَلامُ_اللّه_عليْهِم
#احمد_رزاق_الاعرجي

كل خطوة ياهلا ... يازاير كربله ... وصوت الخادم عله ... حياكم

يـاهـلا وميـة هـلا بـزوار الحـسيـن
گلوبنه گبل الدرب مفتوحه والعين
يـاهـلا ومـية هلا نحچـيهـا مرتيـن
والمواكب تنـتظر نصبـَو صـواوين

كل موكب ينتظر ... وبـفـارِغ الصبر ... والخادم مستمر ... حياكم
____1____

أبو فـاضل ينتـظر مشـتاگه عـينه
والحسن مـشـاي أجه مـن المدينه
حسين ناده منـفتـح باب السـفينه
الراد يصعد ياهـلا بروحه الحنينه

والشايل رايته ... يامحله مشيته
تلگه احساس خطوته ... حياكم
____2____

يلا حـي اعلـه الـعزا صـوت المـواكب
درب ابو سكينه ذهب والـ بي كواكب
الخدم كلها محزمه شاب اويه شـايب
وأجـت حـتـى قـافِـلـة ام الـمـصـايب

وكل موكب بي صده ... موعدنه أبتده
واصواتهم للنـده ... حياكم
____3____

حسين للعالم جمـيعـاً جرحـه نــازف
حسين مو للشيعه بل كـل الـطوايف
ياهلا بكل الأجه اتصـيح المـضـايـف
اوبالخـدامـه هاي يامحـله السـوالـف

عاشگها خدمتي ... مسميها أمّيمتي
وتسولف دمعتي ... حياكم
____4____

بهالدرب يمشي أبو صـالح يـشاهد
وأحنه غير المهدي لاماعـدنـه قائد
مسجل أسماء الزغار وأنت صـاعد
والْــيـَوزع مـاي والـلـطــام واحــد

والأسمه بدفتره ... هنيالـه آجره
ويشرب من كوثره ... حياكم
____5____

چلمـة الگـواكـم الله تنــتـظـركـم
والخدم شدت عزمها وي عطركم
عام كامل ننـتـظـر رفـّت علـمـكم
فدوه كلنـه نـروح زوار لأسمـكـم

خدمتكم مو تعب ... واليخدمكم ذهب
والخادم أنكتب ... حياكم
____6____


#رزقهم_سلام_الله_عليهم
#احمد_رزاق_الاعرجي

أجت لخوتها ... بعد سفـرتـها ... مشي بحسره
أجت مشايه ... وبديها الرايه ... تــرف خضره

الحره تمشي وصاح كلشي ياحلمنه
والمـواكب گالــتـلهـا أكعـدي يـمـنــه
بالـمـدامـع والــمـواجـع والـمــحـنـه
زينب انتي امنه وأنتي هـم وطـنّـه

تشوّف الخدمه ... چبيره ونعمه ... عـله الـفطـره
أجـت مـشـايـه ... وبـديها الرايه ... تــرف خضره
____1____

اجـت زيـنــب للـمـعـتـب بـأربـعـيـنه
تصيح وين حسين آنه أخته الحـنيه
تـگـول مـن الـشـام مـشــايـه أجـيـنه
وللـمواكـب بالـدرب مرفـوعـه ادينـه

وتطيّب الخاطر ... تفـضّـل زايـر ... عله الـسُــفره
أجـت مــشـايـه ... وبديها الرايه ... تــرف خضره
____2____

ماي شافت يمه طـاحـت والمـصيبـه
خذت طاسة ماي بــأيـديـها الـغريبـه
تريد تروي حسين وتغـسل له شـيـبه
بــيوم ماصـار العـطـش قصـه رهيـبه

تــون وتـنـــادي ... يـروح الهادي ... أنـه الـــحـره
أجـت مــشـايـه ... وبديها الرايه ... تــرف خضره
____3____

خطوه خطوه تمشي گـوه بالمسـيره
وشافـت بهـذا الـدرب طـفلـه زغـيره
تـصـيـح ياگــواكـم الله بـهـالـشعيـره
والدموع اعله الوجـن صـارت أسيره

هـلا وحـيــاكـم ... يمن مـلگـاكم ... وفـه الــزهـره
أجـت مــشـايـه ... وبديها الرايه ... تــرف خضره
____4____

هيه تمشي تـشوف كلشـي صار خدمه
والـمواكب كـلـهـا صـاحـت هـاي نعـمـه
المايـخدمك يـاحـسيـن عـيونـه تـعـمـه
شـافــت الـعــباس واگـف گــال كـلـمـه

هـلا بـالـجـايـنه ... أختنه وراينه ... بـدمـع كسـره
أجـت مــشـايـه ... وبديها الرايـه ... تــرف خضره
____5____

#رزقهم_سلام_الله_عليهم
#احمد_رزاق_الاعرجي

ها ياموت ... أنـظـرلك محني ودم تهمل عينـك
ها ياموت ... دورتـك بـالـطـف ماشفتك ويــنك
أقبض روحي وشوف شـبيها
ارماد الخـيـمة تلـگـه علـيـهـا

السجاد أنه وآلامي
من الـنـهر لخـيامـي
كـل ذكـره يـاعــزرائــيـل ... تـوجعـني حيـل ايامـي

مـن اطــلـعـت بـالهـيمـة
وشفت الحسين بضيمة
عـمّه صحـت سيـفي ويـن ... وجبرتني ارد للخـيمة

روحي أطلعت والحسرات ... تـنهـش بگـلبي وعـيـني
بعيـوني يـنـشـافـن شيـب ... كل حسره لجل حسيني

وحده يصيح ... هـل مـن ناصـر يـنـصـر ديـن الـعـتـره
وحده يصيح ... وعينه الصوب الشاطي يدير بحسره
والــروح التفـگد غـالـيـها
ارماد الخيمـة تلگه عليها
____1____

من طـاح أبـويه شفـته
روحي اطلعت بالسكته
اتـمنـيــتـك بـذاك الـيـوم .... والمـوت يحـله بوگته

ياموت حيلي اتطـشر
من شفت طايح بالبـر
والــد رقـيـــه اعــالـگـاع ... بخـيالي گـمـت اتـعثّـر

شـمـا رايـد اوصـلّه الـخـيل ... توصل اله شو قـبلـي
ومن تسحك بصدر حـسين ... تطـلع الآخ من اهـلي

ماكو خيام ... كـلـهـن حـرگـوهــن شـفـت الـسـلّابـه
ماكو خيام ... راحـو لــحـســـين وبـاگـوهـا اثـيـابـه
وضل چثته الذاري امغطيها
ارمـاد الـخـيمـة تلـگه عـليها
____2____

إلـنـوگ مـن جـابـوهـا
وگــبـــالـنــا خـلّــوهــا
و سكينه أجـوها الـشمات ...گمـاط وخـرز راوهـا

وارمـاحهـم شالـوهـا
وگـدامـنـه رفـعـوهـا
ومن عدها دم طاح وشيـب ... من گامو ايهزّوها

وعبد الله اخوي ازغيرون ... والـرمـح عـذّب راسـه
ماشفت جسمه بيا صـوب ... يـمـكن الـحافر داسـه

ماضل حيل ... وصارت مـثـلي هـم معلوله انـفاسي
ماضل حيل ... والضل بـس الـشيب اليمشي براسي
وجروح الطف صعبه احچيها
ارمـاد الخــيـمة تلـگـه علـيهـا
____3____

بضعن السبايا نـشاهد
فــوگ الـرِمـاح الـوالـد
واخواني واهلي ابلا روح ... واعزاز واحـد واحـد

كل روسهـم مدميـه
اتشابــه إذان ارقيه
وعـيون عـمــي الـعـباس ... تـوجـعنـي كـل شـوية

اخـذتـنه عالـشـاطي النـوگ ... ويـاريت ما اخذتـنه
كل صـوب شـفـنه العبـاس ... يـاموت واهـنا مِـتنه

والچفين ... شـفـنـاهـن مـبـتـوره وسـايـح دمـهـن
والچفين ... وجود الغيره شـفـنـاه طـايـح يـمـهـن
وشفنه الرايه ابلا راعيـها
ارماد الخـيمـة تلگه عليها
____4____

بدرب السبي ولوعـاته
واحــبــال والـشـمّـاتـه
راس الاحـسـيـن الــمـذبـوح ... يـنـظـر عـلى بنـيـاته

للــكـوفـه مـن طبـينـه
والــنـاس تنـظـر ليـنـه
والعـطـش يــآكل بـالـروح ... ومحد رضـه أيـروّيــنـه

جــارت عـلــيـنــه الايـام ... يــامـوت والــهـم ديــره
وبناس طحـنه مـو نـاس ... مـابـيــهــا ذرة غـــيــره

كلها تصيح ... وشـامـت يـم راس الـعـبـاس اتـدنّــه
كلها تصيح ... يـنـظـر ويـگـــلّـه چـفـــوفـك مـاهِـنّـه
ومو انته ضعـونك حاديها
ارمـاد الخـيـمة تلگه عليها
____5____

للــشـام من دخلـونـه
بـحـجـارهـم لاگـونـه
وبماي حـار اعـله الـروس ... مـن السـطح شـمرونه

الجـامعه شخلت بيـه
تلـچـمـني كل شـويـه
أشما التفت الگه السوط ... أيـطـگ بـمـتن علـويـه

حبل الله مـچتـوف احـبال ... للقــصـر مـن طـبيـنه
واحد حـچـه بقـصـر يـزيـد ... يشتري يريد سكينه

هاي الموت ... خل نسـولفـها وكـلمن يحچيها بخته
هاي الموت ... ياهـو اليرضـاها لنفـسه ايـبـيع اخته
روحي انذبحت شيداويها
ارماد الـخيمة تـلگه عـليها
____6____

سوالف هظيمة وتـذبح
ياموت دمعـي اليـشرح
الشــام ذبحـتنـي الـشـام ... من ذكـرياتي اشأمسح

بذاك القصر وجروحـه
وعالي الرمح شيلوحه
وانظـر الـراس الـعـبـاس ... تـرجـع وتـطلـع روحـه

بـديـوانـهـم زيـــنـب نــار ... وخـطبت عليهم خُطبه
والراد سكنه من الخـوف ... روحه اطـلعت وي گلبه

نطلب ثار ... زينـب گـالت والــشامـت ضـل يـسـمـع
نطلب ثار ... ويـجـيـبـه الـمـهـدي الـنه الثـار امـربـع
ثورة حـگ هـاي نسـمـيها
ارماد الـخيمة تلگه عليها
____7____

#رزقهم_سلام_الله_عليهم
#احمد_رزاق_الاعرجي

حلات الخدمة الك يحسين يحسين

لـو ما انـتـه يـامـولاي لا مـا صـرنه كـل احـنه
قرينه الجنه عنها هواي وشفنه مجلسك جنه
بدفتر خدمتك يحسين تحطنا هوايه نتـمنى
يالمنطينه خيـر وخـير وسـمعه ابـين وادمـنا

حلات الخدمة الك يحسين يحسين

يالماخذ عطش واسهام وضلت چثته مرميه
وانطانه السلوك الزيـن والـخـدمة الحسـينية
نعيش احساس بي نرتاح صدك يا ابو ارقيه
( يحـسيـن بـضمـايـرنـا ) مـن نـقـراها لطمية

( يحسين بضمايرنه ... صحنه بيك آمنه )
عـقيـدتـنـا وأبو الكل راي
قـريب عـلـيـنه يـامـولاي
وأقـرب حـتى مـن دمـنـه ( يحسين بضمايرنه )

حلات الخدمة الك يحسين يحسين

خيمة الخدمـة يامـولاي مثلها ماكو اي خيمة
صارت لليتيم احضان وصارت للعطش غيمة
ياكـوثر رسـول اِللّه يبـو الغـيره ويـبو الشيمة
لو ما انته چـا يحسين الـودام ضايـعه بهـيمة

حلات الخدمة الك يحسين يحسين

عميان البشر يحـسـين وانته عـيون صـرت الـها
احـمـول الـــوادم هـــوايـه ولـو مــالـت تِـعـدّلـها
واصعب مشكلة بالكون نلـگه چـفوفـك اتـحلـها
وقصيدة ( گلّي يالميمون ) تعيش بروحنه كلها

( گلّي يالميمون ... وين والينا )
دوم نــقـــراهـا ... وانت تدرينه
عشـنـه ويـاهـا ... وعايشه بينه

حلات الخدمة الك يحسين يحسين

يا اول شـمـس متـغـيـب ويـا أول وطــن للـناس
من گد الكرم والـجــود يـبو الحـنّـية والنـومـاس
انطـيت چـفوف للـشـاطي لا بـل قـدّمـت عـباس
وعشنه بصايتك مولاي وجم حافر بصدرك داس

حلات الخدمة الك يحسين يحسين

مو كل عام بـل كـل يـوم نـنـصـبلك عـزاء الـنوح
بگلبنه المهدي يبچي دموم ومحزّمنه يالـمـذبوح
اذا مانگعد ابـفيـيـك الشمس تحرگة ويـن نـروح
يالتعـرف شـنو الـبـينـه وبــابــك للخـلگ مـفتوح

حلات الخدمة الك يحسين يحسين


#رزقهم_سلام_الله_عليهم
#احمد_رزاق_الاعرجي

#شور

عالمهره للنهـر گـاصـد ... لـخيامه بـماي متواعد
بخطواته كربله مالت ... والشاهد رايته الشاهد
وينادي حـسين متـفائل
بالحومة بس ابو فاضل

ير الخيل ... الجيش ضل يفتر
ير الخيل ... تــركـض وتـعـــثـر
ير الخيل ... بـيـده ابـو فـاضـل
ير الخيل ... وعـالـــعـدا شــمّـر

وعيونه تتجادح غضب
وبـسيـفه تتـوسل رِگـب
عاشت يمـناه

وجبرائيل اينادي بعزم
يا حيّ الله شيخ الزلم
ما شاء الله

يا نور الله
____1____

بعيونه كل غضـب شايل ... سجيله طاح عالعايل
العساكر نظرته وصاحـت ... دخـيلك يا ابو فاضل

والارگاب كلها گدامه
يلگّط بيها صمصامه

على الخيل ... الخيل طشّرها
عله الخيل ... دم مـنـاحـرهــا
علّه الخيل ... صــارت اعلـيها
عله الخيل ... شوارب يجرها

للشاطي گاصد منتفض
يازلمة البيهـم يعـتـرض
درب العـباس

واليشرد دخـان الحرب
والعسكر مذبوح الگلب
مخنوگ انفاس

يانور الله
____2____

بسم الله داخل الحومه ... محلاها مرجله اعلومة
والـعـسـكـر حـار گـدامه ... والـكافل هالأجـه يومه

سل سيفه وهوسه سواها
چـن خـيبـر عـلـي طـبـاها

خبر هام ... حومـته طبهـا
خبر هام ... وراد يـگــلبـهـا
خبر هام ... هذا ابن حيدر
خبر هام ... الـگـاع شـيّـبها

امن اخـيامة والحد الـنهر
سيف ابچفه مدري الـقدر
والحيره هـواي

ويـقاتــل مـايعـرف تـعب
خـزراته نار بنـص حطب
وبخيامة افياي

يانور الله
____3____

يازلمة اليوصل احدوده ... والرايه اترفرف ابزوده
للـشـاطي براحتـه نـازل ... وبـراحه يترس بجوده

بـعـيـونـه شـايل الـغـيـره
قمر حوگ وحده لا غيره

شفه الماي ... يرجـف بحسـره
شفه الماي ... اصبحت صفـره
شفه الماي ... والـــدوه چـفّــه
شفه الماي ... برايته الـخضره

ياعـسـكــر يازلمـة وكـفـو
يـسـويـهـا سوايـاته مـنـو
يمـشـي ومـرتاح

وآلاف گـبـالـه يـرجـفــون
واحتارو ويـن ايـشـردون
وبالسكته صياح

يانور الله
____4____

نده يطيح من رمش عينه ... ترف حيل عمها لسكينه
والاغـصان كـلشـي مابيهـا ... العـصافير تهـوه چـفينه

على الخير خيره متبدي
والافـعـال بالـكمـر تبـدي

مثل ماي ... نظرته الحلوه
مثل ماي ... صـار لـلـخــوّه
مثل ماي ... واحلى بهوايه
مثل ماي ... للـعـطش هـوّه

بالخـيمـة افـيـاي ومــي ورد
وبالحـومـه حـيدر مــن يهـد
معروف بهاي

طـلـسـم ويـــحـل الـــشـدات
واصعب شي فوگ الصعبات
سيد عالماي

يانور الله
____5____

#رزقهم_سلام_الله_عليهم
#احمد_رزاق_الاعرجي

قصيدة [ أمــام الـدمـع ] ....
لمولاي السجاد عليه السلام


عـمـرك ضِـمـه يـالرايح وجـاي
نعـشك سِـمـه يمْـزاعـل الـمـاي

يا أمـام الـدمـع لا اهـل لاربـع
________

الـواحـد امّـن ايِموت لازم يمه خـوّانه
حـتى بالتـشّيـيـع كلـها اتشـيل جثّمانه
مـو اخـوتـه مـفـارگـيـنه ويــمه دفّـانه
يـالـمّـعـزب يـالـمّـبـچـي أدلال ديــوانه

يــا بـو الـهلا يــالـعاشـرتــهــا
بـس كــربــلا أكـثـر گــلـتهـــا

يالدموعك شـمـع لا اهـل لاربــع
___1____

ياعـلي السجاد شـيبـك حتى بعيونك
شگد ثكيل الناس ماگدرو يشــيلـونك
بيك ريحة حرگ خيمة وفاگد شلونك
من اثر ذيـچ السياط امـشيـبّه متونك

بثـوبـك حـرگ من طف الاحساس
ياابـو الـصدگ يــبـن أخــو العباس

وحـدك بـهالـوضـع لا اهـل لاربـع
___2____

اتسولف الناس بسـجودك والبـچي ابحرگه
شـگـد يـسـألـونـك علــيمـن گلـبـك اتحرگـه
مـادرو بـيـك المــصـايـب نـــار مــحـتـرگـه
الشاف اخوته ابلايه رووس يفارگ الشبگه

حتــى الهــوه يــخنگ رئـاتــه
الشوفه حـوه حــالـة خـواتــه

ووالـده منصرع لا اهـل لاربـع
____3___

نــوح يتــعـجب لـون يـسمـعها سـالفتك
تبچي عمــرك للحـسـين وعــلى قافـلتك
انــت قــران الجـراح ودمـع فـاتــحـتـك
يالحــزين الدنــيا ظلـمه وحيل فاگدتك

ســجـّـادتــك تـســأل تنـاديك
يـالــتـربـتـك گـامـت تصـلّيك

تدعي ماتـنفجع لا اهـل لاربـع
____4___

لــو قــريــت الـمقــتل بحــسرات ترتيـلـه
تــوصـل الـحد الچــفوف وتـذكر الشـيلـه
حيلـك بگطـعت الخنـصر منـگـطع حيـلـه
لـو گــعـد يـمـك بـشر عـن شنهو تحجيله

بـدمـعك نحر يــرسـم يـتـيمه
اليكسـر ظـهر مـاعدهـا خيمه

وونــتـك تنسمع لا اهـل لاربـع
____5___

فـاگـد شـچم يـوسـف ويـاثوب تنـتظـره
البيـر هنــيـاله اذا ضــم يـوسـف الـزهـره
أعتــذر خـايـف أجرحك تـدري بالحسـره
يـوسـفـك ذيـچ الـحـوافـر كـسـّرة صدره

كلـشي شـفـت ويـْعيـنك الله
وشــگــد ردت تستشهد وياه

وينكسرلك ضلع لا اهل لاربع
___6____


#رزقهم_سلام_الله_عليهم
#احمد_رزاق_الاعرجي