الامام السجاد (ع) يتكلم مع جابر الانصاري



عمي جابر شحچي عن الغاضريه
عمي جابر اهلي راحوا من اديـــه
عمي جابر عمتي گادوهه سبيـــه

*------------------*----------------*

والدي داسوا ضلوعه گبالي شفتــه
انكسر ظهري بمصابه و ما حملتـه
جيتك بدمعت عيوني وابچي سكته
ريتك بعاشر محـــرم حـــاضر انته

سلبونه وحرگو اخيمنه علينـــه
سلبونه والشمر يحدي الضعينه
سلبونه وبالدمع هاليوم اجينــه

عمي جابر

*------------------*----------------*

الگمر عذبني جرحه و ذاكه حالـــه
العلم طاح بيمنه و خصمه شالـــه
حقي انوحن والجفن دمعي حلاله
هذا انه الكربله سكنت خيالـــــه

ذكرياتي سلبوا گدامي خيمــــــه
ذكرياتي بين مفجوعه ويتيمـــه
ذكرياتي دمعتي و ذيچ الهضيمه

عمي جابر

*------------------*----------------*

حرمله صوب دليلي بكل سهامـــــــه
خله عبدالله يرفرف چن حمامـــــــــه
عمي يا جابر حرام الليل انامــــــــــه
عيني تغمض و استمع صوت اليتامه

صعبه هايه عمري اخلصنه مناحه
صعبه هايه اليسهر بلوعة جراحه
صعبه هايه مظلم الليل وصباحــه

عمي جابر

*------------------*----------------*

كربله شفت العجايب اني بيهــــــه
بالحرم جرحوني عمي و شد اديهه
آه يا صرخة رقيه و هم سبيهـــــــه
ذوبت گلبي وانظر عيني ابچيهـــــه

شاهدتهه تبجي والدم بأذنهـــه
شاهدتهه طابع السوط ابمتنهـه
شاهدتهه بيه ما يطفه حزنهــه

عمي جابر

*------------------*----------------*

اصبر شلون و اشاهد عمتي تنعـه
اذكر الشتّمهه يمي وانه اسمعـــه
عمري احسنه يخلص دمعه دمعه
وحدي خلوني الغوالي والله فجعه

فارگوني واني اجيتك بالسبايـه
فارگوني و الدموع بلا نهايـــــه
فارگوني وغابو بوادي المنايـه

عمي جابر

*------------------*----------------*

الحياة بعيـني صارت كلهه مـــــــره
السبي وحرگ المخيم عندي ذكــره
حرّمت نومي الليالي و بيه عَبــــره
شفت الحسين وحوافر فوك صدره

والله هضمه عايش بنار المصيبـــه
والله هضمه صعبه اليودع حبيبــــه
والله هضمه اليبقه بدموعه ونحيبه

عمي جابر

*------------------*----------------*

✍ بقلم خادم الحسين ع
الشاعر رعد الچريخي