• أمي علمتني من وأني صغيرة إنّي ما نمشيش عند صاحبتي إللي عندها خوت شباب وهُما موجودين في الحوش ولو مشيت زيارتي ما تتجاوزش الساعة ..

ولمّا نزور حد نكون خفيفة نظيفة وما نتقّل على أصحاب الحوش مهما كانت علاقتي بيهم قوية ..
كانت تقولي عدلي تقعميزتك ، واعرفي كيف تتكلمي مع الغريب ، وإحترمي يلي يحترمك وحطيه على راسك ويلي يقدرك ضويله صوابعك شموع ..
علمتني لمّا حد يقعد معها ما ندخلش بالكلام ، ولو سمعت حد يشكيلها ننسى شن سمعت وندفن الكلام إللي سمعته بأرضه ..

ولمّا نخش لحوش قدروني أصحابه وأمنوني على أسراره ، ما نطلعش نحكي شن شفت عندهم ..
علمتني شن يعني شبع ، وغرقتني بفضلها وقالتلي لمّا تشوفي حد عنده الشي يلي ما تملكيشي ما تقوليش شمعنا أني !!
هو عنده وأني لأ ، قولي الحمدلله والله يتم عليهم ..

أمي مدرسة فاقت مدارس العالم بالفهم والإدراك
علمتني إنّي نكون أميرة زيها
وست بيت واعية ، و إنسانة مُثقفة
ومُلمة بأمور الحياة وعارفة شن يعني أصول ، لأنّه هالكلمة وزنها أغلى من الذهب في قلوب الناس يلي تربت عليها 🤍 .