هذا الهلال خله الدمع يجري دمه
هذا الهلال احمر صبغ لون السمه
هذا الهلال عاشور اجه يا فاطمة
هـــــــذا الــهـــــلال
ـــــــ ـــــــ ـــــــ ـــــــ ـــــــ ـــــــ ـــــــ
عاشور اجه شهرالحزن يافاطمة اجري الجفن هاي المسية
كَلبج نعرفه ما هجع من راس الحسين انكطع و الغاضرية
كل يوم مأتم ناصبة والدمعه من دم ساجبه لهاي الرزية

يوم الحسين ظل يبجي اله حته الحجر
يوم الحسين وسط السمه انرسمت صور
يوم الحسين كل شيعي ناصب مأتمـــــه
ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــ
يافاطمة بهذا الشهر وسط السمه نرسمت صور نار ومصايب
سبعين نجمه من السمه طاحن سوه يافاطمه فوك الترايب
ظل الكمر يبجي الكمر من طاح دامي ع النهر بدر الغوالب

هذا الكريم الضحه ابجفوفه للأخو
هذا الكريم و يستاهل انكَله كفـــو
هذا الكريم بي يفتخر حامي الحمه
ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ــــ
كلما يجي شهر الألم عالفاطميات ابجي دم وجروحي ناحن
ياويلي سحكن عالجمر مسلوبه ربات الخدر عالهزل راحن
طلعن سبايا ابلا ولي الحكنه ياحيدر علي الحكنه صاحن

وين اليصيح يا كربـــــــلا يا كربـــــــلا
وين اليصيح عندج سبوها العايلـــــــه
وين اليصيح زينب سبوها بلا حمى
ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ــــ
كل شيعي يافاطم علن لابس سواد ودم بجن من عنده العيون
كل هيئة كل موكب بده هذا الشهر حل موعده مأتم يقيمون
عفنه كلام اليعترض عدنه العزاء احنه فرض خلهم يلومون

امره عجيب كلمن حجه يا فاطمة
امره عجيب ضربة صدرنه تألمه
امره عجيب جاهل وليش انكلمه
ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ــــ
يافاطمة ونكتب عهد منعوف ابواليمه ابد رغم المعاناة
صح بينه يندار الزمن ونشوف لوعات ومحن ماننسه هيهات
يبقه الحسين وموقفه محفوظ بكلوب الوفه خالد ولا مات

كل العصور شمعة يظل ما ينطفي
كل العصور من الحزن ما نكتفي
كل العصور لا ما تهمنه اللايمه
ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ـــــــ ــــ
حسن بشير السوداني
https://telegram.me/joinchat/C0L9qUBUHKWM3eHf6Vo0Kg