تنويه القصيده للشاعر الشاب
(محمد باقر الكعبي)





رافعلك أديه وگلبي لهفان
طلبت العون منك يا سلطان
ياضامن اجروح الخدمه والحب
اضملي خدمتي بشهر الاحزان

سيدّ نعمتي مالك خدمتي
كلشي بيدك يا انيس اجروحي

لعشك الهواشم خليني هايم
ما اسوه اعيش ابلايه دمعي ونوحي

كلشي ما اريد بحياتي
بس رضائك مو رضاتي ..... يا ساطان

من عطائك چويّ گلبي
كلشي اخذ مني ألا حبي .... ياسلطان

******

المدد مولاي منك حيلي مهدوم
البقه من عمري بي خليني مهضوم
حرامات وندم من كل وكت فات
اعله كل لحضه المضت مابيهه ملچوم

عمري خساره دون الزياره
الدنيه ما تنطاق دون حسيني

حزمهه العيون تنحب عله ام عون
ولّيَمّ جرحكم سيدي وديني

ابلا خدمتي انا ضايع
يامهيج كل مواجع ...... ياسلطان

منك اطلبهه البواچي
انت ياكل المحاچي ....... ياسلطان

******

اليطلب جرح منك كون يرعاه
الوجع لو يبرد الحب يبرد وياه
معروفه الجرح بالطيبه ملموم
ماريدن جروحي اطيب عل اه

لاتشفي علتي وجرحي وحسرتي
ماريد اطيبن وانسه حرگ اخيامك

نسيني اسمي وبس يبقه همي
وياك ادور بل الفله اعله ايتامك

وياك ادور عن رقيه
وبچي وي دمع الزجيه .... ياسلطان

عل الهزيله كل حرمكم
اهضمني مولاي لهضمكم ..... ياسلطان

*****
كلشي يهيم بيه من يمر طاريك
يندهني العشك لو سولفت بيك
دمعتك تجوي گلبك عل الخيم دوم
خليني اعله جرح الخيمه اواسيك

اعظم مصيبه زينب غريبه
الكلمه هايه الخذة حيل اضلوعك

مولاي اواسيك لجروحك البيك
حسين همك والدمع موضوعك

عثرة الهزله اعله دربك
كل دمع مايشفي گلبك .....ياسلطان

دوم سارح ويه بالك
كلشي ماضل اعله حالك...... ياسلطان

******
تكل لبن شبيب وتحچي الجروح
رادت تطلع من اعيونك الروح
كتله حسين مات وهوه عطشان
ومن نزلت دمعتك كتله مذبوح

كتله سليب وماكو مجيب
بهيمه طاح وصاح هل من ناصر

يبن شبيب نوح لغريب
فوك صدره الخيل يوم العاشر

ياكل ابروحك مصابك
كلشي يهد اله عذابك .... ياسلطان


بعينك الدنيه محرم
و نار تلهم بل المخيم ..... ياسلطان




الشاعر
محمد باقر الكعبي