مسلم بن عقيل
⁦▪️⁩⁦▪️⁩⁦▪️⁩⁦▪️⁩⁦▪️
اليوم انصار واتباع
باچر وسفه تنباع
حاير وغدروك وابگلبك صبُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
ها يمولانه ويبو روح النقيه
ها يهيبة حيدره حامي الحميه
اليوم أنصارك بقوا هاي المسيه
وباچر ابوحدك تواجه آل أميه

ظلمه الكوفه واتحير
باچر وحدك اتصير
باچر ايعوفونك ابأصعب أمُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
بالجمع مسلم يصلّي وحزنه هالي
والصلاه كمّلها شاهد ظهره خالي
يمشي مسلم حاير ابضيم الليالي
حاير ابليل الهضُم ماعنده والي

يمشي وگلبه مقهور
من الكوفه مغدور
مسلم ابهالحال حاير منكسُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
يارسول احسين ياروح الصميده
يا حبيبه ويا أبن عمّه وعضيده
ياهو بالكوفه الزلم صاروا عبيده
لجل ابن عمه الولي ضحّه ابوريده

يالناذر حياتك
فرحان ابمماتك
لجل ابو السجاد ضحيته العمُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
يا نزيل الكوفه ماعرفت تقدرك
وسفه والكوفه يبو طاهر تغدرك
ما تذل الراس عالي شكبره صبرك
لجل ابو اليمّه ابفخر ضحّيته عمرك

روحك شافت البين
يستاهلها الحسين
ترجف العدوان لو بيهم تمُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
ضنّوا ابقتلك يبو طاهر نصرهم
رادوا ايذلّوك واتوضّح أمرهم
وجهك الكلش وفي بيّن كسرهم
وابصمودك سيدي اتهزهز قصرهم

يالعزمك تمرجل
والظالم تخلخل
بينت ابوجهك ترافه ابيا كثُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
صعّدوك اعله القصر والدمعه بالعين
تبچي لجل احسين عينك مو عله البين
گلبك ابهاي الرزيه ايشيل جرحين
خاطرك مكسور واتفكّر بالحسين

لجل احسين صابر
يالمكسور خاطر
سيدي وهذا الكسُر ما ينجبُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
يالرعبت الجيش وانته ابهايه تحله
زود عمك حيدره ابچفّك تحمله
كل سلامك للحُسين اهنا توصله
يالطحت من القصر وابهايه تعله

من قصر الاماره
سلّمت ابطهاره
للحُسَين اهنانه قدّمته العذُر
باچر الطف يبتدي من القصُر
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣