مسير السبايا الى الكوفة 2020


ها يخوي عالهزل اختك مشت مچتوفه
ها يخوي شلون لو مرّونه سوگ الكوفه
اشد من سهم المنية
نظرة الشامت علية
ها يخوي ها يخوي
.................................

يابوفاضل ما اريد اجرح شعورك
والنعم ما قصّرت اديت دورك
لكن اسمحلي يمن مايطفه نورك
اشكي همي ومن عله الناگه ازورك

يالكفيل. المن اشكي يابوفاضل حالي
يالكفيل. ترضه من بعدك شمر يبرالي
اكلف واعظم اذية
نظرة الشامت علية
ها يخوي ها يخوي
...............................

ارد اخبرك يابوفاضل سلبوني
بالحبل عباس بعدك چتفوني
خويه لبن زياد للكوفه خذوني
عالهزل بغياب طولك طلّعوني

مادريت. زينـب بيـاحـــال ياواليــهه
مادريت. تشگف سياط الشمر بيديهه
مثل بسمار الزچية
نظرة الشامت علية
ها يخوي ها يخوي
...............................

من مشه ظعن السبي مر عالشريعه
خويه من عالناگه شاهدت الفجيعه
راسك المصيوب وچفوفك گطيعه
دمعي سال وضاگت بعيني الوسيعه

لا تگول اختي عافتني ونست ايامي
لا تگول بالغصب عنك رحت بآلامي
ماطفت جمرتها بية
نظرة الشامت علية
ها يخوي ها يخوي
...............................

صعبه ياعباس امشي بلا كفاله
بناگه هزله تميل وي ميل الثكاله
والشمر ياخويه يجرحني بسؤاله
وين كافل خدرج وراعي البساله

دمعي سال اسمع واسكت يراعي الغيره
دمعي سال بيش اجاوب يابوفاضل حيره
تبقه چويتها خفية
نظرة الشامت علية
ها يخوي ها يخوي
...............................

من وصلنه الكوفه ياعباس متنه
كلـها تـتـفـــرّج علينه وشتّمتنه
بالحجاره الناس خويه ستقبلتنه
ابشـع حچـايـات مُـرّه سَمّعتنه

ياعجيب. زينب الماچـانـو يعرفوها
ياعجيب هسه كل الوادم يشوفوها
تعتقـدنـي خارجية
نظرة الشامت علية
ها يخوي ها يخوي
...............................

هذا ياخويه الخفت منّه وعرفته
مجلس ابن زياد بالكوفه دخلته
خويه فرحان اللعين هواي شفته
وبية يتشمّت يبوالغيره سمعته

مات اخوچ. هذا راسه البالطشت گدامي
مات اخوچ اليوم احله واغله كل ايامي
شبيدي ياخويه سبية
نظرة الشامت علية
ها يخوي ها يخوي

سيد زيد الفحام
______________________________