قصيدة رئيسية ليلة الوحشة 2020

ياعلي. ليش ما تحضر اليه
ياعلي مو بعيده الغاضريه
ياعلي راحو خواني منديه

وحشه يابويه وخطر
ليلة الحادي عشر
.......................

حاضر الشدات تحضر لليندبك
ماتعوفه بهمّه حاير هذا دأبك
عجب ماتحضر لزينب من تطلبك
ماتجي تشوف الجره بعزاز گلبك
يالطويت بمعجزه لسلمان دربك
ليش ما تحضر لبوالسجاد جنبك

ياعلي. حرگو علينه خيمنه
ياعلي بلاذنب ذبحو زلمنه
ياعلي بس علي السجاد يمنه

بالمرض ظهره نكسر
ليلة الحادي عشر
..........................


عيلتك يابالحسن صعبه وهضيمه
عالتراب الحار نمنه وگاع هيمه
كل خيمنه احترگت وماعدنه خيمه
بس حرم وايتام ظلت ياحريمه
چم يتيم الماغفت عينه ويتيمه
الليل مظلم يرعب بخوفه ونسيمه

ياعلي ليلة الوحشه علينه
ياعلي ننخه بسمك ماتجينه
ياعلي ولية يابويه انولينه

مارحم بينه الدهر
ليلة الحادي عشر
.....................

احضر وشوف الجره بهاي المسيه
ذاك اخويه حسين ذبحوه ال اميه
بويه داست صدره خيل الاعوجيه
گطّعوا جسمه وتوذر عالوطيه
وراسه من فوگ الرمح ينظر اليه
يگلي يازينب احفظيلي رقيه

ياعلي فرّت ادوّر ابوها
ياعلي ال اميه عذبوها
ياعلي عالتراچي وسلبوها

لسّه بالطفله الاثر
ليلة الحادي عشر
........................

لو گلت عباس ابني الغالي وينه
عالنهر يابالحسن صابوا جبينه
بويه گطعو يسرته وگطعو يمينه
بلا چفوف وبالسهم مطفيه عينه
منهو من بعد الگمر ينغر علينه
بس علي السجاد بويه مچتفينه

ياعلي دلهم الليل بضلامه
ياعلي بعازتك هاي اليتامه
ياعلي مابعد تحصل سلامه

بيها آلام وقهر
ليلة الحادي عشر
......................

الليله ظلمه وموحشه وردناك يمنه
تحرس الايتام وتخفف ألمنه
خيمه ماعدنه بعباتك بويه لمنه
والله من الخوف عالتربان نمنه
من حنان حسين يابويه انحرمنه
هوه ذبحوه ياعلي واحنا نظلمنه

ياعلي نادتك تسمع رقيه
ياعلي والحرم صاحن سويه
ياعلي كافي نتحمّل اذيه

نبچي بدموع السهر
ليلة الحادي عشر
.....................

من جهة وادي الغري حيدر اجاهن
زينب وكل الحرم يبچن لگاهن
سلم عليهن علي وگطعن بچاهن
امّنن من سمعن بحيدر لفاهن
لا تخافن يابناتي كلماهن
بليلة الوحشه حضر حيدر حماهن

ياعلي شاهد بعينك وضعنه
ياعلي عكب اخوتي الليله ضعنه
ياعلي يجري ماينشف دمعنه

لا خيام ولا گمر
ليلة الحادي عشر

سيد زيد الفحام
@zaidzai
______________________________