لسان حال السيدة رقيه ع


اركض من الخيمه للخيمه وارد
مدري اظل وي الحرم مدري ابتعد

واحسيناه... واحسيناه

*******
ابتدي باول مصيبه تمر عليه
من ركبت الفرس وعيونك اليه
عيونك اتكلي وتكظك بالخطيه
يا رقيه حسين رايح يا رقيه

روحتك جابت الم... هيمتني بنص خيم... راعيها مفكود
ما محسبه لفركتك... من تروح بسفرتك... حسبالي اتعود

حيرتني وانت صعبه تنفكد
مدري اظل وي الحرم مدري ابتعد

واحسيناه

**********

زغيره ومعلمني اصيرنلك اميره
شلون اروح وي الغرب ديره اعله ديره
ابد ما فكر بشر زينب اسيره
كوم كامت تنظرب عمتي الجبيره

هاي محنه من المحن... زينب اطر جم وطن... وبلايه خوان
وانه رجلي من الجمر... بابا كامت تستعر... ما جنه نسوان

عيونهم صلفه وغصب لينه تصد
مدري اظل وي الحرم مدري ابتعد

واحسيناه

***********

يالمدللني عمر واغفه اعله طيبك
دارت عليه الغرب ومنين اجيبك
عالتراجي اتغالبو بويه بمغيبك
وبالخرايب كعدوا عمتي وحبيبك

احنه وين وهاي وين... عايشات بلا حسين... بس يا عجيبه
العليل يصيح اخ... والحزن يم كلبه ناخ... بهالمصيبه

بعد وجهك ما حله بعيني الورد
مدري اظل وي الحرم مدري ابتعد

واحسيناه

*********

غافيه وعطرك عبر مثل السرابه
وفجئه افز واتذكر الليل وعذابه
صعبه من حظنك انام اعله الترابه
والصعب عمتي وي سكنه بنص خرابه

بينه سواها الزمان... كعدانه بنص مكان... ذوب املنه
احنه جلمات النبي... شجابنه لدرب السبي... جاوين اهلنه

صعبه تقرا الفاتحه بلايه الحمد
مدري اظل وي الحرم مدري ابتعد

واحسيناه

************

هواي محتاره لجن زاد النياح
من شفت كل روسكم فوك الرماح
ردت لحظه ارتاح لكن شستراح
انت كلبي وكلبي فوك الكاع طاح

طاح كلبي وانثلم... من شفت ماكو العلم... يعني طايح
اركض واعثر واطيح... عمي لو الاكبر اصيح... انت رايح

مدري افكر اركض لجثتك واهد
مدري اظل وي الحرم مدري ابتعد

واحسيناه

**********

سيد احمد الميالي

تم بفضل الله والسيده رقيه


https://t.me/ahmed_sa6