يالچنت بحضاني غافي نايم ونومك عوافي
حضني عفته... يالتركته... يالچنت بحصاني غافي
*******
رحت للماي وترد ادري للشم الورد
محد يذبحه بسهم
گلب ماعدهه العده انته يالچنك نده
وينك وين الالم
السهم غمض عيونه عرف عمرك
مستحي منك ييمه وباس نحرك
والشمس غطت وجهه ذبل ثغرك
والهوه والنسمه ماتن فوك صدرك

من السهم يمه صحت بحضن ابوك وفرفحت
ماي ضنك... تروه منك... شرب من نحرك يصافي
*
صافي شفاف وترف وينك وين النزف
يالنزف نحرك ضوه
الورد منك خجل والنده بعينك نزل
عليك مخنوگ الهوه
صوتك بليل السهر صوت البلابل
وكل صباح بشفتك النده نازل
الليل كحله ع الجفن بالظلمه شاتل
والگمر بخدودك الترفه يغازل

الورد وكت الفجر منك يجيب العطر
چان عطرك... يمه ذكرك... يطيب العله ويشافي
****
بين عيني والرمش تنام وفرشلك فرش
وانه اظلن بس نفس
لاتفز ابقه انتضر يبين بخيطه الفجر
وتطلع عليه الشمس
اشعل عيوني شمع لجلك ضوه
وچنت اخاف عليك يبني من الهوه
دموعي ودموعك اذا نزلن سوه
وشوفت عيونك ألي چانت دوه

اعز من روحي وحياتي چنت اغطيك بعباتي
حيل اشمك... ليه اضمك... ونومك يصير بجتافي
****
من تنام وانتضر ارسم احلام شكثر
روحي تحچيلي اماني
باجر ايام واعد اكعد بسده الولد
تجوه عبدالله لزماني
چنت احسب للكبر انته التجيه
عون تصبح للزمن لودار بيه
ماحسبت احساب يوليدي المنيه
دواي موجرحي حسبتك تبقه اليه

احلامي وايام السهر راحت وراح العمر
احلامي راحت... چلمه طاحت... تبدت بطارف شفافي
**
جلمه وحده ماگلت شكثر يبني اتأملت
تگلي يايمه انتضر
ردت اسمعه اشكثر وانطرلهه ع الجمر
تبدت وماي بنهر
ردت منك بالعمر اسمعلي چلمه
وحسره ظلت بالگلب چلمه ييمه
ياشمس عمري عفتني بدنيه ظلمه
مايمر بعيوني طيفك حته ألزمه


يمه احلفك باللبن مرني لورمشت جفن
مرلي طيفك... احسبني ضيفك... من الهجر يايمه كافي
****
زغير بعدك عالحرب چانت عيونك تصب
ورحت للماي الگصد
ماي بس ماي اطلبت تالي نبله حصلت
والوعد صار الوعد
انه بالخيمه واحسن بالالم زاد
لحظه رديت واصدلك لاچن شراد
رگبتك ترفه ييمه والسهم حاد
وادري المثلث عليه شينفع ضماد

يبني سابح بالدمه ريت بعيوني العمه
بحيره اصدلك. ... ونتحبلك... وركضت يايمه حافي


علي الجناحي

@Ali_aLgenaih