کە مێژوونووسێ ئەنووسێ
لە شەڕێکدا سەد کەس کوژران و
بە ئاسانی بە ناویاندا تێئەپەڕێ،
تۆ ڕاوەستە و ورد بەرەوە:

سەد کەس، سەد ڕۆح، سەد ڕووبار،
سەد شەقام، سەد پەنجەرە،
سەد ژن و سەد گەڵاڕێزان،
سەدان خەون و سەدان مناڵ،
هەزاران ماچ، هەزاران باخ.

ئەوە هەر چاوی شاعیرە لەو سەد گیانە کوژراوانەدا
سەد شمشاڵ، سەد گۆرانی،
هەزار زەردەخەنەی گوڵ و
هەزار ئاوێنەی شکاوی خۆرەتاو و
هەزار دڵۆپەفرمێسکی خوا ئەبینێ.

شێرکۆ بێکەس
ئەسپێک لە پەڕەی گوڵاڵە (۲۰۱۲)

@BeshiKurdiZanistgayKurdistan