قناة قصيدة كربلاء ...قصائد محمد دعبل النوري

يا علي ،،،،، ياعلي يكرار
يا علي ،،،،، انت سر الإسرار



اكبر وثيقه يا علي چانت بالاسلام
مايوم نزلت هامتك سجدت للاصنام
كتبت عليك اهل الشرك بسموم الاقلام
ما لگوا نقطه بسيرتك بس عزه واقدام

يا علي ،،،،، حيريت الافكار
يا علي ،،،،،، انت سر الأسرار



شگد حاربوك اعلى المنابر ما نفعهم
ما گدرت تغطي الشمس كثرة بدعهم
عدوانك الشك والشرك ضدك جمعهم
سيفك يقتال العرب حق وصرعهم

يا علي ،،،،، صولتك يفقار
يا علي ،،،،،، انت سر الأسرار


ما لك شبيه بهالبشر ما صح مثالك
يردوني اترك ملتك واترك جلالك
دورت ماكو بهالخلق يشبه خصالك
يردوني اترك جنتك واترك جمالك

يا علي ،،،،، ياعميد الاطهار
يا علي ،،،،،، انت سر الأسرار


حربك تظل حربي رغم انف النواصب
وابقى على دربك ياعلي للموت احارب
يردوني اترك هالدرب وامشي اعلى جانب
لو ما علي كل معضله منهو اليجاوب

يا علي ،،،،، باب علم الأنوار
يا علي ،،،،، انت سر الأسرار



انت الوصي انت الولي يا نور العيون
ماكو نبي بعد النبي بس انت هارون
قائدنا تبقى يا علي رغم اليضدون
لو ردنا مثلك يا علي وين اليشبهون

يا علي ،،،،،، انت نفس المختار
يا علي ،،،،،، انت سر الأسرار


يالحيرتهم بالمواقف والبطولات
ربك علي وانت علي يا كل الايات
مكتوبه بفراش النبي بس حيدر يبات
غيرت والله بموقفك كل الحسابات

يا علي ،،،،،، يارعب للكفار
يا علي ،،،،،، انت سر الأسرار



محمد دعبل النوري



قناة قصيدة كربلاء /قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

شنكل لليتامه .....ماحصلت سلامه
رايح ياعلي


ابابك كعدت هاي ايتامك تتنطر جيتك
واليهم والخيمه اعليهم يردون مروتك
يم الباب اولادك تنطر وياهم بنتك
أمها الزهره يوم الراحت بيها امكلفتك


ماكمل تمامه نوحو ياليتامه
رايح ياعلي
****************
زينب تنتظرك ياحيدر لاتكطع بيها
بيك ارجاها وانت الخيمه رد ياواليها
وحيده بنيتك بعد الزهره عالهم مابيها
لو توليها اهموم الدنيا منهو يواسيها


زينب و الملامه بين أهل اللئامه
رايح ياعلي


********************
يهلال الفقره ينطرونك لتغيب وترحل
تفتح بيك اورود الدنيا وخلافك تذبل
كالو محرابك ضل خالي والمحراب انذل
مهلا ياحيدر لاترحل من غيرك شيضل

لا رحمه وكرامه ولا تبقى ابتسامه
رايح ياعلي

****************
بصوت الاحزان الكل تصرخ وينك يالوالي
دورنا اعليك وفجعونا محرابك خالي
يالمحراب الوالي شحاله شو بس دم هالي
كال بحظني ساجد حيدر وانصاب الغالي

صابوه اعلى هامه ماتمم صيامه
رايح ياعلي
****************
هجمت ليك جيوش الظلمه بالسم غداره
يدرونك ياحيدر مشعل ماتخمد ناره
بليلة ظلمه بوكت السجده شنوها الغاره
معذور السيف اللي خافك حكه ويتداره

صابوك بحمامه ياتاج الامامه
رايح ياعلي



************************



محمد دعبل النوري




قناة قصيدة كربلاء// قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

علي بس بالصلاة ايداوي اجروحه
لان ساجد كدرت بسيفك اتلوحه.؟؟؟

*************************
حيدر بالحرب كلمن اليدناله
مشهوده بفقاره تطيح خياله
بالمحراب اجيته بسيف تغتاله
بالهامه طبرت الدين وصروحه

*************************
شيمتها الرجال اتلاكي بالميدان
مو بالظلمه تسطي وتقتل الشجعان
اشكد زارع رعب بالمشرك الايمان
علي العلك اركاب الشرك مرجوحه

**************************
ترى الايمان كله بهامه صوبته
حبيب الله يظالم ليش ماعفته
علي الإيمان كله والكفر أنته
علي حتى العرش لجله انسمع نوحه
**************************

علي بكل المعارك تشهد اخصومه
على ظهره الدرع مالبس من يومه
تشهدله الحرب عدوانه مهزومه
من يدخل حرب بيه تفتخر سوحه
**************************

ماتوصل علي بالحرب واتلاكيه
قتال العرب ماواحد ايلاويه
علي بأرض النزال الدنيا لاذت بيه
من سيفه الزلم بالحرب مطروحه
*************************



محمد دعبل النوري




قناة قصيدة كربلاء//قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

إلى الإمام علي بن ابي طالب عليه السلام

(تقرا لطميه او نعي)



جينا وكعدنا ابابك أيتام
كالو علينا مصوب الهام
كلي الزمان شخبى واشضام
بعدك يحامي دين الإسلام
**************************

شمضموم النا يامصيبه
ياوصي الهادي وياحبيبه
كالو علي آيس طبيبه
وصي وصيتك ها يضرغام

وصي يبو الحسنين الأولاد
كلهم يبويه حان البعاد
بعدي عليكم فتن تزداد
ورايح عليكم تقسي الأيام

بويه كتاب الله احفظوه
وبيت الله بعدي لاتهجروه
دارو اليتيم ولاتضيعوه
يابويه احنا اخلافك أيتام

ياعيد ريتك لاتجينا
والبيت خالي من ولينا
مصوب ابونا وتدري بينا
مايحلى عيد بغير الايمام

ياعيد يحلى بعد أبو حسين
ومن لليتامى يبو الطيبين
رايح يبويه وتهمل العين
لاحلى بعدك عيشنه او دام


محمد دعبل النوري


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

صوت السماوات ارتفع
حيدر بمحرابه وكع
تهدمت والله أركان الهدى
تهدمت والله أركان الهدى

**********************
صوت الفجيعه بالفجر
حيدر علي بهامه انطبر
عالمرتضى العادي جسر

وبالحداد للوصي الكون ارتدى
تهدمت والله أركان الهدى
**********************
بالحرب محد قابلك
مهزوم كلمن قاتلك
الحرب تحلى بس إلك

يامن رددت الحق ممن اعتدى
تهدمت والله أركان الهدى

**********************
سيف النبي الباترو
هذا علي الثائرو
في قتله تباشرو

قتل الكرار في سيف العدا
تهدمت والله أركان الهدى

**********************
اصابوا نفس المصطفى
هذا الوصي المرتضى
هذا علي والقضا

فزت ورب البيت قد كان الندا
تهدمت والله أركان الهدى

**************************
وكت الفجر وتروعو
اولاده ركضه اتسارعو
كالو علي طاح اسمعو

الكون من خطبهه مغبرا غدى
تهدمت والله أركان الهدى
************************



محمد النوري



قناة قصيدة كربلاء//قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

وين تريد ......والحزن والينا
وين تريد.... ياعلي امخلينا

دمعه دمعه ياعلي بعين اليتامه
تكول منا لو رحت ماكو سلامه
احنا مانسوى ابد لو ما الإمامه
علي رايح بعد شيضل ياكرامه

وين تريد.... والظلم سابينا
وين تريد.... ياعلي امخلينا
**********************
رحنا للمحراب نركض ياولينا
لكينه العمامه بدماها مالكينا
لاحنانك لا عطف شفنا وبجينا
ليش رايح منه ضل يسئل علينا

بويه حيدر ... لراحتك حنينا
وين تريد..... ياعلي امخلينا
**********************
اه يمحراب الولي جا وينه حيدر
ساجد بكترك تعوفه بدمه امطبر
جان يزرع بيك إيمانه وويكبر
شلون عفته وطالته غدارة الشر

تبت الايد... اللاحتك والينا
وين تريد.... ياعلي امخلينا
**********************
تدري من دونك تعيش الناس أيتام
لأن بس نهجك صحيح وغيرك أوهام
ياعلي لا لا تخلينا ويه ظلام
تدري بيها الدنيا قسوه وكلها آلام

بلايا أبو حسين... العدل جاوينا
وين تريد. ............ياعلي امخلينا
**********************
الدنيا ضجت والأملاك تنادي ويلاه
قتل الكرار والمسموم ارداه ..... فصيح
شسوى كلي يالمرادي بسيف تبلاه
جان إلك نعم الإمام وموتك ارداه

تقتل الدين. ...بهالامر تاذينا
وين تريد. ......ياعلي امخلينا
**********************

محمد دعبل النوري

الخميس
22 رمضان 1439 هجرية
7/6/2018


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

ياعلي دكيت بابك ياعلي
بالنوايب والشدايد عون إلي

ضاكت وأبواب ربك ماتضيج
ورحمة الله وياك يبنادم رفيج
لكل هدف للبشر لابد من طريج
وأني دربك ياعلي بيه أملي
******************
العنده حاجه ياعلي يلوذ بحماك
وماتضل مطروحه حاجات بفناك
اليضكه الوكت يتنفس هواك
والوصل بابك همومه تنجلي
******************
يا أخو المصطفى يالكلك وفى
وبالمكارم ياعلي أصل وصفه
ياعلي لكل داء طب انوصفه
اليكصدك يبرى من العللي
******************
لو هويت وضعت بين اللهوات
انت للغركان ياحيدر حياة
ابد ماعندي عمل بيه النجاة
حب علي ينجيني من الزللي
******************
بغير ذكرك ابد مايحلى المقام
عندي دنيا وآخره حيدر إمام
باب مدرسة الوفى وخير الأنام
واليضدك ياعلي يضد العلي
******************

محمد دعبل النوري



https://telegram.me/joinchat/EC4l_kCW7a06aa_Vh0IRkw

رايح يطر الفجر وتنصاب هامة علي
الهام منه يطر والهم فلا ينجلي

يا علي رايح صدك من لليتامى يضل
لو يطر خيط الضوى الحزن والهم نزل
ياعلي بعدك ترى رايح يخير العمل
زينب تضل ياعلي بجرحك المايندمل

ياليل طول بعد بس لايطيح الولي
الهام منه يطر والهم فلا ينجلي
**************
بعدك يحامي الحمى أحلام كثره تروح
وزينب عزيزة نفس شتكلها من تنوح
صابو ابوج ونزف بالهامه أشد جروح
بعده بصلاته علي والدم نزل مسفوح

مسموم سيف الغدر وعالراس بيه يعتلي
إلهام منه يطر والهم فلا ينجلي
**************
ابابك يتامى نضل تترجى منك ترد
الورد ينطر سكي لو رحت مات الورد
معقوله رايح صدك معقوله صار الوعد
غربه وليالي الظلم بعدك تراه البعد

بابي يريدك تجي رايد علي يمر علي
إلهام منه يطر والهم فلا ينجلي
**************
شسوى المرادي بغدر يتمنا من فعلته
محراب ضل ينتحب ضربة علي ذبحته
آيات واستاحشت لمن علي فكدته
حتى الليالي قفر بلايه علي وسجدته

لانافله بلا ولي والسجده تهتف علي
الهام منه يطر والهم فلا ينجلي
**************
ياليل ضل وحدك راح اليناجي السما
من بعده ماظل فرح الدين ينزف دما
ساعه ويطر الفجر ويروح حامي الحمه
واللي سكاه الولي أيتام نشبع ضما

أيتام بعدك علي يابعد ناسي وهلي
الهام منه يطر والهم فلا ينجلي
**************

محمد دعبل النوري
رمضان
١٦ / ٠٩ / ١٤٣٩هـ
01 / 06 / 2018


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

نعي إلى أمير المؤمنين علي بن ابي طالب عليه السلام


راح من ادينا اليوم حيدر
ولفركته كلبي تفطر
رايح ابوي اليطرد الشر
عكبك يبويه حالنا شلون

يادهر حيدر هذا ابونه
الباقي من أهلنا الفاركونه
التمو أولاده يودعونه
أيتام من بعده يصيرون

راح الولي من بين ادينا
خيمه وستر حيدر علينا
من بعد عينك ياولينا
عدوانك علينا يدورون

يادهر جنك مالك عيون
كل يوم مني تسيل الجفون
تجري دمع لاحباب يرحون
انطرهم وماظن يردون

يادهر جنك فاكد الشوف
بس موت ماشوفلك حروف
خليتني افرك بالجفوف
واندب على احبابي اليرحلون


محمد دعبل النوري


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

الجانت اتوصيه بزينب فاطمه
راح منها هسه حماي الحمه

**********************
تذكر بدفن الزجيه شوصتك
ياعلي للبيت رد اتنختك
خاف زينب ترتعب من غيبتك
شلونها بلايا علي ولا فاطمه
**********************
جم يتيمه ياعلي ضلت وراك
تمسح ايدك رأسها تبقى برجاك
حيف عالموت الذي منهم خذاك
وضلت ايتامك ابابك لاطمه
**********************
ياعلي رد اعلى زينب ياعلي
فاكده أمها وفكدت اليوم الولي
بعد أهلها شلون زينب تبتلي
راحو وخلوها زينب هايمه
**********************
بلايه حيدر زينب بيا حاله
والدهر بعده تدور احواله
بحيره دمعتها تضل هماله
والمصايب على زينب حايمه
**********************
منهو الها زينب يداريها
ياعلي والدهر لو ياذيها
انت ابوها وأنت سور عليها
لو رحت دمعتها لجلك ساجمه
**********************

محمد دعبل النوري
الأربعاء
رمضان -
٠٨ / ٠٩ / ١٤٣٩هـ
23 / 05 / 2018


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

إلى سيدي ومولای أمير المؤمنين علي بن ابي طالب عليه السلام


وين رايح ....وعايف بظهرك يتامى تون يبو حسين
وين رايح. ....وأنت مثلك بالدهر مايحصل أثنين
صعبه والله فركتك .....يتمتنى بروحتك
وين رايح. ...وين رايح
*****************************

وين مثلك نلكه والد كله نوماس
لو نظر دمعة يتيم يفيض إحساس
دورينا اعله اليشبهك ماكو بالناس
ياعلي بس إسمك أنت اليرفع الراس
***************
بظلمة الليل. ..مالكينا اللي يدور عن الأيتام
بظلمة الليل. ..كالو بمحرابه طايح ذاك أبو لثام

يللي تنزف هامتك. ...يتمتنى بروحتك
وين رايح. ....وين رايح
*****************************
ياعلي اباب الاماره اشكد وكفنا
ماطلع بيهم علي حتى يعرفنا
شفنه حاكم أبد ماهمه نزفنا
وشفنه حاكم يستدر بالذل عطفنا
****************
خادعونا.......و بعبات الدين باكو وهم
حراس
خادعونا..... اسف بالمذهب يحيدر غشو الناس

مالكينه دولتك. ...يتمتنى بروحتك
*****************************
أني شايف حيدر يوكل اليتامه
ويطعم الجوعان مايكشف لثامه
نريد مثلك ياعلي اليشهر حسامه
مو يتيم إعلان يصبح للئامه ****************
للمرائين. ...ضلت الدنيا تصفك ويه ظلام
للمرائين. ...تتبع الناس بجهلها أشباه الأصنام

شو نسينه صولتك. ...يتمتنى بروحتك
*****************************
قرب بابك شفنا لوحه وبيها مكتوب
علي في حال العباده ارويحتها تذوب
لله والهادي محمد علي محبوب
لافتى إلا علي وتهواه الكلوب
****************
ياالهي. ..علي عابد مو لجل جاه ومناصب
ياالهي. ..ولا هو خوف النار هذا بن أبوطالب

أنت أهل بعبادتك. ...يتمتنى بروحتك
*****************************
ياهو من اتكله أني الليله مقتول
ينام بفراشك ويدري القاتل يصول
هو بس حيدر فعلها وحير اعقول
العالم بوكفة علي لليوم مذهول
*****************
حيرتهم. ...يبو الحملات بجهادك وبوفائك
حيرتهم. ..جحدوا بحقك لأن شامخ بنائك

صادق أنت بحملتك. ...يتمتنى بروحتك
وين رايح. ...وين رايح
*****************************

محمد دعبل النوري
22 رمضان 1438


قناة قصيدة كربلاء /قصائد محمد دعبل النوري

https://telegram.me/joinchat/EC4l_kCW7a06aa_Vh0IRkw

قد تعالى الصوت في نهج حزين
هدم الدين من الركن المتين


*********************
اقبل القوم على أمرعظيم
عندما غالو الصراط المستقيم
معه الحق وللحق مقيم
حسبما اوصى رسول العالمين

*********************
اي فعل قام فيه الادعياء
فعلهم قد هز اركان السماء
كيف يغتالون بحرا للعطاء
وبه الايمان والحق المبين
*********************
قد اصابوالدين في وقت الصلاة
ضربوا من كان للناس نجاة
انهم موتى وقد كان الحياة
وبه كانت حياة الثقلين
*********************

قد تعالى الصوت في فجر مرير
من يتامى حزنهم جمر سعير
من لنا بعد علي والمصير
في يد الطغيان بين الظالمين
*********************

حيدر اعطى وللدين وهب
وله الاعمام قرت والعرب
كاذب من قال حيدرة ذهب
خالد بل كان تاج الخالدين

*********************
قهر الدنيا بصبر من حديد
عابد ليس لوعد او وعيد
بل لان الله اهلا للعبيد
فعلى رمزا لكل العابدين

*********************
محمد دعبل النوري
14 شعبان 1434

محمد دعبل النوري👇👇👇👇👇 /قناة قصيدة كربلاء

https://telegram.me/joinchat/EC4l_kCW7a06aa_Vh0IRkw

شما يلوموني انت إلي مثل الهوى
شما يلوموني إنت لجروحي دوى
*************
ترخص ارواح لجل الإصلاح
*******************
الحقيقه بكربلا شفنا هه با لعين
شفنه بس حسين واكف ويه الحسين
للمواقف تندهش كل الميادين
توكف و تأخذ تحيه بلايا جفين
**************
تنظر العباس جفه طابع باللوى
تنظر العباس غيره وبطف نينوى
************
قدم إيضاح لجل الإصلاح
******************
الناس لمن تعشك بنضرات العيون
وانه ما شفتك ابد سموني مجنون
ياحسين بكل زمن ابجيلك شلون
يعني انت العلمت فن اليعشكون
************
عن بعد يحسين احنه بالدمعه سوى
من هوى العباس ظهر الاكوان التوى
*************
عالنهر طاح لجل الإصلاح
*************************
فتحت عيني اعلى دنيا محمله الام
بيها ألاف الضحايا و بيها ظلام
حسين بيها العلماني ارفع الهام
وكف يوم الطف وكفته وصان الإسلام
**************
علماني شلون أرفض أفكار الظلم
علماني شلون للعدل ارفع علم
*************
اسمع شصاح لجل الإصلاح
*************************
بيني و بينك زمن لو نحسب بعيد
لمصرعك بيا جمر ما يقبل ايهيد
اتجسدت قصتي بمحبتك دون تمهيد
اللي خلاني عشكتك كطع الوريد
*************
من وريدك ذاك شفت ظالم ينكسر
من وريدك ذاك اتعلمت شنهي النصر
**************
بالدما الساح لجل الإصلاح
*************************
قدمت كل الضحايا و بيهه كفيت
وبعد كل هذا و تنادي ربي وفيت
جبت للحومه عيالك بيها ضحيت
وبعت روحك للمنايا وكل شي انطيت
**************
قائد ومقدام انت الاول بالحرب
قائد ومقدام أسست للحق درب
************
براسك رماح لجل الإصلاح
*************************


محمد دعبل النوري


قناة قصيدة كربلاء//قصائد محمد دعبل النوري
https://t.me/joinchat/AAAAAECW7a2xnxJxh0IRkw

كاظم الغيض بصفاته
بالسجن عاش المماته
المدارس بعده تنعى… وأماماه
--------------
بصوت المظلوم
الليله حزنانه الملائك والألم يرويلي
الكاظم مسموم
بقيوده صابر عالمظالم والسجن يحجيلي
اويلاه خلص عمره بالسجن
اويلاه قاسي ليله لو يجن
اويلاه شنو ذنبه ممتحن.. واويلاه
-----
الليله تنعاه الزجيه
تنادي امام الرافضيه
وزينب تنوح السبيه…. واماماه
---------
تنشد هالناس
ياغريب اعله الجسر وبالسم تكطع جبده
تنشد هالناس
هالنعش شايلته الغرب وين العشيره العنده
يبويه ...وين معصومه وعلي
يبويه ....خل يحضرون الولي
يبويه ..... نوحهم خل يعنلي ..يابويه
نلطم وننعه المسيه
ثياب سوده الكاظميه
موشحه لهاي الرزيه… واماماه
*
غربه واحزان
خلص حياته بالظلام وليش تخفى انواره
غربه واحزان
تحيطه كفار وعليه اتدير الظلم شد اسواره
يمولاي ..شفت أنواع القهر
يمولاي...تكضي ليلك بس سهر
يمولاي...مارحم ظلم الدهر ..يامولاي
بالسلاسل وبحديده
هالثگل وتجرح ايده
الطاغي منعده شيريده… وأماماه
****
يانبع النور
بالسجن ينشر علومه والفكر وأسراره
يانبع النور
يبجي سجانه عليه والناس بيه محتاره
يمظلون ..ساجد ينوح العمر
يمظلون ...كلبه مجروح الصبر
يمظلوم ...دمعه مسفوح الفجر …ياعذابه
الليله طلابه اعله بابه
تبجي وتنوح المصابه
تنادي ياسيدي احبابه…. واماماه




محمد دعبل النوري


قناة قصيدة كربلاء / / قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw

وين المسجون وين السجان
وقصر الأفراح وسجن الأحزان

**************
ياقصر هارون كل طغيانك انهار
حين قيدت الإمام بقيد جبار
التجبر بيش فادك والفجر طار
سجدت الكاظم شمس زالت الاستار

لا يا هارون حكمك خسران
لا حكم يدوم لا من سلطان

**************
بني العباس استحلو دم الإسلام
لاقرابه اللي رعوها ولامن ارحام
من محمد كلها تأخذ رفعت الهام
بس بني العباس حازو ذل الآثام

بذل يكبعون لجل التيجان
وقتل الأبرار أهل الإيمان

**************
عالجسر حطو جنازه وظلت تصيح
الظالم شما طال ظلمه حتما يطيح
هالجنازه اشكد غريبه تنادي الريح
أمه مغلوطه بحكمها تريد تصحيح

وبلايه أفكار تتبع فجار
جم ظالم صاح جم حاكم خان
**************
دورينا و مالكينا ابين الآثار
لاقصر هارون يحكم لاكو تذكار
شفنه طاموره اتفجر منها أنوار
والإمام البلسجن نور الارض صار

شفنا المظلوم أصبح عنوان
فاز المسجون ذل السجان
**************
مايصح غير الصحيح بدنيتك هاي
عاش رغم العطش ذاك الماشرب ماي
حسين والكاظم شهاده بوحدة الراي
والطواغيت بظلمهم خسرو اهواي

فاز المذبوح وين الطغيان
والساجد فاز رغم الزنزان
**************


محمد دعبل النوري




https://telegram.me/joinchat/EC4l_kCW7a06aa_Vh0IRkw

هالغريب العذباه سجانه
الدنيا ركعت خاضعه ابيبانه

**************
القيود اتكسرت يالمو رشيد
والحديد اتطوع بايده الحديد
السجين الحر فلا ينفعله قيد
والقيود اتقيد السجانه
**************
يانجم مثلك يبن جعفر يكون
وانت تربيلك صفت كل العيون
الظالمين ابابك بذل يركعون
وينه هارون الطغى بطغيانه
**************
وينه هارون اليحاجيه للسحاب
خل يشوف لمجدك اتطخ الركاب
اندثر قصره وكوخ بن جعفر قباب
والسحاب اتشرفت باحسانه
**************
ملك كل النعمه بن جعفر تراه
والمذله للحكم والوعذباه
اللا رشيد بحكمه شنو اللي جناه
سوء عاقبته جنى وخذلانه
**************
كاظم الغيط وملك اعظم منال
لا خضع للذل ولا طخ بالنزال
طغى الحاكم والإمام بفعله كال
الجمعه موعدنا ونصرنا اناله
**************
اسد في بغداد واكف مو غريب
وللعلل تلكاه إلك اعظم طبيب
الكاظم بقلب الموالي مايغيب
واللي يطلب حاجته تجراله
**************

محمد دعبل النوري




https://telegram.me/joinchat/EC4l_kCW7a06aa_Vh0IRkw

نعي إلى الإمام موسى بن جعفر عليه السلام



وحدك يبن جعفر بطامور
وسط الظلام الكمر مطمور
تخفيك رادت طغمة الجور
ماكدرت لهالنور تخفيه

بين السجون يداورونك
وحدك تعاني ويعذبونك
من الزهره اصلك يعرفونك
هذا الرحم كلها تعاديه

عدهم بني العباس غايات
لمن يجرعونك عذابات
مسموم ابن الصادق يبات
وين أهله تنهض تلحك عليه

وينك يبو الحملات تحضر
ابنك كظى موسى بن جعفر
هالحال هذا الما تغير
كل يوم هادينه نعازيه

فوك الجسر كامو يصيحون
هذا الغريب المات مسجون
وين أهله راحو مايحضرون
مسموم ابنكم شدو ايديه



محمد دعبل النوري





https://telegram.me/joinchat/EC4l_kCW7a06aa_Vh0IRkw

كلما يمر طاري النهر ياذينه
نتذكره بحاضرنه و بماضينه
يادمعة الاحزان سيلي على الشجعان

*************************

يم الفرات اشجم جرح صوبنه بالروح
يم الفرات اشجم كلب للموقف ينوح
يم الفرات اشكد دمع عالارض مسفوح
يم الفرات حسين ظلت عينه
*************************
يم الشريعه من الموده شكثر موجود
يم الشريعه من الوفاء تعدى الحدود
يم الشريعه ظل مثال الشرف والزود
عباس من جوده بذل جفينه
*************************
يم النهر راد القدر يتصوب لواي
يم النهر راد القدر مايبقه حماي
يم النهر راد القدر يتبده كل ماي
ومايرجع العباس يروي سكينه
*************************
اه يانهر جرحك ضهد زينب الحره
عيون الطفوله شكد بقت مايك تنطره
منك جرح صوب حسين وكسر ظهره
كطعت جفين الذي يروينه
*************************

اه ياعطش جنك صرت من جيش الاشرار
ذبلت نسل المصطفى جن تطلب بثار
جنه حلف وانعقد بين العطش والنار
النار احركتنه والعطش ضامينه
*********************

محمد دعبل النوري


قناة قصيدة كربلاء//قصائد محمد دعبل النوري
https://t.me/joinchat/AAAAAECW7a2xnxJxh0IRkw

طلعتك يالصدر تشبه طلعت المهدي
جيت مبعوث برساله وللبشر تهدي
***********
مثل موسى وعصته. ..ونهض يهدي أمته
جيت مبعوث برساله وللبشر تهدي
*************************
كون كل الناس تفهم ليش الحسين انتفض
حتى ماتخذل المهدي لو اجى يومه ونهض
وكون كل الناس تفهم خيل وبضلعه ترض
حتى من يطلع المهدي مايلاكونه برفض
**************
حسين نفهم غايته. . ..نهض يهدي أمته
جيت مبعوث برساله وللبشر تهدي
*************************
جان خوف وحكم ظالم لحد لحظة طلعته
وكف بالكوفه اسدها وهيبه كانت وكفته
كال لإسرائيل كلا كلها خافت صيحته
اهتزت أصنام وعرفنا اشكد عظيمه عصته
****************
وكف واعلن جمعته . ..ونهض يهدي أمته
جيت مبعوث برساله وللبشر تهدي
*************************
لمسجد الكوفه اجيت وصحت كلا للظلم
الفهم قولك يسيد فاز والظل مافهم
الحجه بيدك جانت وخاطبت بيها أهل العلم
بس آسف هارون ماكو يسندك أبين الزلم
****************
وياك يعلن كلمته ....ونهض يهدي أمته
جيت مبعوث برساله وللبشر تهدي
*************************
لو وكفتو أهناك باجر والخطاب بهالامر
باجر يحاججنه ربنا اني أرسلت الصدر
هذا ماقاله بلسانه واشر ليوم الحشر
اليخذل أصحاب الرساله بالحشر ماله مفر
**************
وكف والقى حجته...نهض يهدي أمته
جيت مبعوث برساله وللبشر تهدي
*************************
كلمه للمنتظر للمهدي يترجى لو ظهر
بالك اتغشك مصالح مثل ما غشت عمر
لجل ملك الري تخاذل ووكف لحسين بغدر
عدنه مثله اهواي باجر يحاربون المنتظر
***************
حين يرفع رأيته. ....نهض يهدي أمته
جيت مبعوث برساله وللبشر تهدي
*************************

محمد دعبل النوري

الخميس 20 تـمـوز 2017
الخميس 26 شوال 1438



https://telegram.me/joinchat/EC4l_kCW7a06aa_Vh0IRkw

إلى محرر العقول السيد الشهيد محمد محمد صادق الصدر (قدس سره الشريف )
************************************

حيرت أهل العلم يالصدر عصاتك
خوفت أهل الظلم يالصدر صولاتك

اليصول اعلى الظلم لتكول مات
انت أنت الرجعت انا الحياة

*****************************
إنت مو لحظه ابد انت الحياة
والصلاة وياك أعظم منزله
لأن قول الحق يعد أعظم جهاد
لمن عند الجور يصدح قائله
************
وكفت حسين الشهم بالكوفه وكفاتك
خوفت أهل الظلم يالصدر صولاتك
*****************************
إنت أعظم لا سمعتها الطغات
بعد لا الدووت بطف كربلا
أنت برقيه واجت من السماء
أنت موسى بعصته يقود الملا
************
وأكف بوجه العدى رافعها راياتك
خوفت أهل الظلم يالصدر صولاتك
*****************************
موسى شك البحر نصين بعصاه
كي ينجي الناس من ذاك البلا
وإنت بحر الظلم جمدته بعصاك
كي تعود الناس تلبس مرجله
*************
هزهزت طغيانهم يالصدر صيحاتك
خوفت أهل الظلم يالصدر صولاتك
*****************************
إنت من حسين شمره أعلى الطغات
إنت صوت الحق على لسانك حلا
إنت حمزه الصفع طاغوت الضلال
وترك للأجيال كلمه امسجله
**************
ناس شافت نورك وتبعت لخطواتك
خوفت أهل الظلم يالصدر صولاتك
*****************************
ماقبل فرعون تقراله الكتاب
وماقبل تقراله حتى البسمله
لكن الصدر سمعت الوجود
كل حقيقه أعلى الخلايق نازله
***************
دخلت اكلوب الغجر يالصدر كلماتك
خوفت أهل الظلم يالصدر صولاتك
*****************************
إنت احييت الجمع لمن اجيت
وكلت ماتبقى الفريضه امعطله
الجمعه من حيدر علي لبست حداد
ومن اجاها الصدر فزت زلزله
***************
بيها جن صوت الوصي يالصدر جمعاتك
خوفت أهل الظلم يالصدر صولاتك
*****************************
الجمعه قدره وخطها رب الكائنات
وهيه من الله عليك امفصله
الجمعه ثوره وكامت بوجه الجحود
بيها صوت محمد أكبر قنبله
***************
ماتخاف الموت مثل ألاسد وثباتك
خوفت أهل الظلم يالصدر صولاتك
*****************************
الجمعه تكتب بيها صولات الرجال
مو اخير أسبوع يوم اتكمله
الجمعه صلتها الزلم وكت النفاه
وامس وكت الجور كالو لاهله
***************
خاطبيت اهل العقول بكل رواياتك
خوفت أهل الظلم يالصدر صولاتك
*****************************
إنت دين الله الصحيح الحاربوه
إنت عنوان الحياة العادله
الماسمع صوتك أظن ماعنده أذان
ولاعيون ولاعقل ظل يحمله
***************
يللي مانصفوك وسفه وانظلم ذاتك
خوفت أهل الظلم يالصدر صولاتك
*****************************
خل يعضون الأصابع من جفوك
إنت صوب الجنه أخذت القافله
أنت ومضه وخطفت عيون الرجال
وماحظت بالومضه بس الباسله
***************
نقذت الناس وحيتهم ذيجه خطباتك
خوفت أهل الظلم يالصدر صولاتك
*****************************

محمد دعبل النوري

قناة قصيدة كربلاء//قصائد محمد دعبل النوري
https://telegram.me/joinchat/EC4l_kCW7a06aa_Vh0IRkw