الشاعر أبو زينب الظالمي

أبوذيــه ( درب الشام )


شِمـــاته دروبهم حاطـــــن ويمعن
وعليها الشامـي ظل يربي ويمعن
عكب عباس لن حادي وي ام عون
شمر ولهـــاي ما توصــــل رِزيــه


الشاعر : أبو زينب الظالمي

قصيدة ( من البحر الطويل )
كلام السيدة زينب ع مع جسد أخيها عندما بدأت رحلة السبي من كربلاء إلى الكوفة فالشام


هذي عيلتك يحسين طلعت والشمر حادي
جبرونه وغصب ماشين يا ريحانة الهادي

——-

يمك لو بدينه نجيم يحسين العمر يمك
ساعه ما نعوف النوح وظلع الطاهره أمك
لاچنه السفر ليزيد نووه الحرگوا إخيمّك

وما كفه گطع نحرك
ولا كفه رضخ صدرك
الله يعظمه أجرك

بِعيالك لطاغي الشام مِصبِح ناده إلمنادي

——-

تعودنه الفجر نسمع بصوتك للفرض تدعي
واليوم الفجر نادوا حي أعله السبي أوّدعي
يا زينب دربنه بعيد بترچيب الحرم سِرعي

يبت حيدر دربنه بعيد
بعجل نوصل لعند يزيد
لو نوصل يجيم العيد

لجوائزنه نريد أنروح تنطرنه الخلگ غادي

——-

گضت ما بالعرب شيمه ماصح الرئف بينه
نسوان وثكاله النوب بجثثكم مرنه حادينه
نودع زحمه ع الناگه! نجيك أمربطه أدينه !

أسره وبالچفوف أحبال
يخويه وراچبّين أجمال
ياذيكم أكيد الحـــال

مثل ضيم الجره علينه أبد ما عالبَشر سادي

——-

السده علينه يبو اليمه يشيب البالمهد بعده
ركبنه اعله الهزل يحسين وخدرنه ماي وتبده
صعدونه اعله نوك إعجاف ماعدهم كصص تنده

ولاچنه النبي جدنه
وعلوم الرسل عدنه
وعلى كل الخلگ سدنه

ينعمون بلذيذ الزاد وانه اللوعه صفة زادي

——-

ما زال التعب والخوف مرافگنه من العاشر
من وكت الهجوم ومن فگدنه نورك الزاهر
النهار إنجد غصب بسير الليل نخافه ونساهر

موحش لو يجن الليل
يهد ليل السبايا طويل
او والينه بسگم ونحيل

وسمعنه من الحچي الياذيك وعلينه بسبنه متمادي

——

تمادوا يا غيور هواي علينه وإلمن نحشم
يضربونه وتشوف الناس ولا بيهم فرد يهتم
لون هاشم تجينه اليوم ويِهِد واحدهم إمحزم

تهد إبلا سرج وعنان
عدهم بالأسر بالنسوان
وين الله وبني عدنان

يلحگون النسه والسيف يحكمونه على العادي

——-

هوايه سهام صابنه ومثل گلبك دليلي إنصاب
كل نظره اعله محملكم أشد من شچة النشاب
ياريت العمر وياك كظه وبعدك حرام إن طاب

ولا تالي الوكت يحسين
أهلك وي غرب ماشين
گبل هذا يريت البين

لفانه ولا نروح الشام وحگك صار الي مرادي


~~~

(تمت بفضل الله تعالى وبركة أم العباس الطاهرة)

الشاعر : أبو زينب الظالمي

أبوذيــه


عيوني من البچي يحسين ظلمن
عگب فيّك علينه فياي ظِل من ؟
لباجي الضعن يا رجواه ظَل من ؟
وصُبَح ضعنــك مصيره بإيد أُميّه


الشاعر : أبو زينب الظالمي

أبوذيــه
( السيدة زينب ع تكلم جسد أخيها العباس ع)


تيسرنه عگــــب عينـــك وضعنه
يخويه وما يِسِــر صاحب وضعنه
راعي الضعن چي مـا رد وضعنه
خلـص فرهود ضعنـــه بإيد أُميه


الشاعر : أبو زينب الظالمي

تجليبــة


سؤال أطـرح جوابه عليك تدبيره
صدگ زينب يكافل صارت بحيره

———

صدك عكبك يكافــل زينب الكبره
مچتوفه وتُجَـر بحبال چا الاسره
الخُبر هذا الخبر ما ينحمل أمره
ما تبرى جراحـه ولچمته أچبيره

———

صدك عگبك يكافل بت علي الكرار
من بَلــده لبلـــد بسواقهم تِنـــــدار
عن هذا الجرى هم ليك إجت أخبار
تِحمــــل لو دريت وهذي إچبيره

———

صدك عگبك يكافـــل طبّت لديوان
وأميرتكم أميــــره عالانس والجان
يكولون بخرابــــه بلا غطه وبيبان
لا تســـتر شمس مو كافيّه إزغيره

———

صدگ عگبك يكافلــها زجر يحدي
يتبختر عليـــها وفعلتـــه أتعَــــدي
مثلك يا شــهم لا ما يصـح جنــدي
عند إخته خِدمتــه وعالي تقديــره

———

أنشدك عن خبر ياذي الگلب عباس
إجتّك لنهـر تشكي البدى من الناس
وتتنخـــه بحميتـــك يا أبو النوماس
صــــدك ما جاوبتها يا أبو الغيره



الشاعر: أبو زينب الظالمي

أنت المعزى يا مولاي يابقية الله في أرضه بذكرى شهادة جدك الحسين

عظم الله أجورنا وأجوركم بمصابنا بإمامنا الحسين ع جعلنا الله واياكم من الآخذين بثأره مع وليه الإمام المنتظر عج

قصيدة رئيسية ليلة السابع من المحرم - ليلة أبا الفضل العباس ع
(الإمام الحسين ع عند حضوره مصرع قمر العشيرة ع)



عوف الماي ما يحتاج تبث أعذارك
يا عباس طحت آنه بطيحت بتارك
لا تحتار يالوفيت وعودك
ياوفاي چف وعين اشهودك

يا عباس يا عباس

———-

واگف اباب الخيم هامي رافع چالعلم
الثابت بيمنت عضيدي
مأمن وگلبي إستچن عندي أَخويه وطن
الحُبه يتجاره بوريدي
بلحظه لن مال اللوا ظهري مال وياه سوا
وأعله ظهري راحت إيدي
مال،حيلي گبله مال صحت يارب الجلال
ربي ردلي هلال عيدي

بهذا الحال يا عباس اتوزع شوفي
مره عليك ولزينب لتنظرك خوفي

المثلك وين يل شابهة لعودك
ياوفاي چف وعين اشهودك

يا عباس يا عباس

———————

ليك ولزينب أصد صوت أسمعه من بُعد
حسين يا خويه سلامي
رحت صوبه بالعَجَل گلبي نيران اشتغل
بلا حمه ضلت خيامي
خويه من ليك أوصلت هوايه اشوف أتغيرت
شوفتك خلت نظامي
شفتك وحالك صعب أمغيّرك كثر الضرب
كل عضو من اعضاك دامي

طولك ذاك الكل ناسك محتميه بفيه
فوگ الگاع يمأمِن روع العلويه

كبار أزغار كلنا نام بزودك
ياوفاي جف وعين اشهودك

يا عباس يا عباس

——-

حسين بمصابك وگع كل رزيه وهم جمع
فگدتك ما مر مثلها
چنت الي حزام الظهر يل خذك مني النهر
عون الي ولشده حلها
لزينب بيا حال ارد تنتظر مني نشِد
تنطر اخبار الكفلها
وإنت راسك ياشهم بالحديده منهشم
والسهم عينك طفلها

والأطفال تنتظرك يا عمد اخيامي
يل عيناك بشوفتهن يتروه الضامي

انت الماي ويروينه وجودك
ياوفاي جف وعين اشهودك

يا عباس يا عباس

———————

يا كفيل العايله خدر إختنه منهو إله
يا ذره وستر الفواطم
انت چثه موذره وآنه ساعه وعالثره
ابقه عالتربان نايم
زينب إتضل لضعن وينها أوين المحن
مدلِلة كل الهواشم
تنهضم زينب حرام وهيه تربات الكرام
بداره جبريل خادم

ولصيوان خوفي إهجوم العسكر يوصل
والنسوان محتارات وبالهيمه إتضل

يدرن بيك باذل كل مجهودك
ياوفاي چف وعين اشهودك

يا عباس يا عباس

—————-

عالنبي أجرك مضه والوصي عنك رضه
وأقسم أُمك راضيه عليك
عليه موتك مايهون خيرأخو وياخيرعون
يا هو عنده من الصفه البيك
عندك إيثار النفس صار للعالم درس
طابت إيد أُم التباريك
جنه ألك يوم الحشر الزهره بچفوفك تمر
الموقف ، الغايه تجازيك

امك هاي يا عباس وأقصد فاطم
ما تنساك يوم الدين تقاضي الظالم

موقف بيه إيكرمك معبودك
ياوفاي چف وعين اشهودك

يا عباس يا عباس


أبو زينب الظالمي

- السيدة زينب سلام الله عليها تشكوا ما مر بها لجسد أخيها الحسين عليه السلام


إجيت أشكي الهظم ماني
معوده أشكي الهظم يمك
واخبرك بالسَلِب سهمي
يل صار الذبح سهمك

————

سهمي صابك وأدريه.
منه خمدت أنفاسك
وحگك متت يوم إلي
شفت فوگ الرمح راسك

————

ضنعنكم زلم حارت بيه
وكل شاب إنبره لإمه
يخويه إشلون خليتوه
بذمة فاجده وحرمه

———

الوج من التعب يحسين
يخويه أواگفه گوه
واحاذر كمت رمش العين
لا يطبك وأخاف اهوه

————

هويت بيوم ضيكم غاب
الگظني همي وأحزاني
ربيبت خدر تالي الظيم
عگبكم دهري راواني

————

تموت التفكد الخوان
موش ابيوم اذا بسنين
وانه الفارگت بنهار
هلي وصحبتهم السبعين

————

أهلي افكدت ذاك اليوم
وبيه اتغيرت حالي
وعگب ذاك الظعن لني
بگيت بلا ذره اوالي

————

والي الحرم يوم الغاب
بالبر تاهت إعياله
وتدري الحرم ما تنهاب
إذا مو هلها خياله

—————-

خياله هلي وچانوا
ما يرضون بالعيله
طاحوا والعدو ياحيف
ولانه بزلمه وخيله

—————

إنولينه والولى يحسين
شامت من وِلانه بنار
صبوا كل حقد عدهم
عادوا فِعل يوم الدار


الشاعر : أبو زينب الظالمي

(مواضيع القصيدة مأخوذة من روايات وردت عن الإمام الحسين ع يحث الناس فيها على مكارم الاخلاق كمساعدة المحتاج والتنفيس عن المكروب وصلة الرحم وشكر النعمة )



يا أبا عبدالله … يا أبا عبدالله
يا أبا عبدالله … يا أبا عبدالله

___


بالخبر عن السبط جاءت روايه
عنه نقلتها الكتب واهل الدرايه
گال من نفسله عن مؤمن شكايه
بكل حياته وبالحشر ينجه جزايه

وِسف وإنت الفضل يحسين
تشهد آية القربه

تضل حاير يمحي الدين
مامن كربتك كربه


———————-

اليمشي بالحاجات واليسعى بأمرها
نعمه من ربه وجنان الله ثمرها
گالها حسين ولكل ناسه أُمَرها
كلفه يدري الفاقه وبلسعة جمرها

الطفل كل حاجتك مولاي
جِبته يشرب أُمَيّه

رجع لا بالعمر لا ماي
رد إبرگبه ملويه



___

ولي راد الله يأخِر في مماته
لرحم دومه يواصل في حياته
رزقه يتنامه ويحصل مبتغاته
ينول مرضاة الإله ومكرماته


لآخر ساعه من عمرك
بيها أتواصل أرحامك

لذلك لنهر گصديت
تعنت للأخو أجدامك


_



شكرك لنعمه مضت يوجب زياده
هاي ضامنه السبط رمز الشهاده
بهالمضامين الولي جان اعتقاده
بيها عسيف أنتصر راعي الإراده


اخذ ياربي ما يرضيك
إحسبت عُظم البلا نعمه

لذلك إنت أول مَن
على السيف إنتصر دمه



الشاعر :أبو زينب الظالمي

أبوذيــه
(( يا أبا عبدالله يا مهجة فاطمة ))


الحوافر مامحت ذكرك والكدام
المجـد مانالته اعدائك ولك دام
صوتـــك دوم ضل عالي ولك دم
إنتصــر ع السيف يوم الغاضريه


البيت الأول : والكدام أقصد بها الكدمات وهي جمع كدمة بمعنى الضربة ( كتبتها كما هي عليه الان لضرورة شعرية)


الشاعر : أبو زينب الظالمي

أبوذيــه
( نهنئكم بذكرى عيد الغدير الأغر - ذكرى تنصيب سيد الموحدين علي مولى للمؤمنين ثبتنا الله وإياكم على ولايته وحشرنا مع شيعته )


أساس الدين حُب حيدر وصل له
إبجهنم خصمــــه لـو صام وصله
اليود حيـــــدر رُفَــع صوته وصله
علـــى طــــه وعترتــه وعزچيــه


الشاعر : أبو زينب الظالمي

أبوذيــه (( للإمام الحسين عليه السلام))


آلاف العدو جيشه وانتمائه
ضميت! الكوثرإنت وانتمائه
يمثل الدين نهجك وإنتمائه
يروح الهادي يامهجة وصيه



البيت الاول : مائة عدد جيش الإمام الحسين ع على رواية يزيدون قليلًا أو ينقصون…

- أن عددهم كان 100 يزيدون او ينقصون قليلا رواه الطبري عن أحد شهود العيان وهو سعد بن عبيدة - وكان من جيش عمر بن سعد - قال: "وإنّي لأنظر إليهم وانهم لقريب من مائة رجل فيهم لصلب عليّ بن أبي طالب عليه السّلام خمسة ومن بني هاشم ستة عشر" (تاريخ الطبري: 14/ 295) .



الشاعر : أبو زينب الظالمي

قصيدة لعبدالله الرضيع ع
( أم الرضيع تخاطب ولدها )


من حضن الحسين.. عالتُــــرُب نايـــم يعبد الله
من حضن الحسين.. ماتلگه احن ومودع بالله

يا شمعتــي وبكربلـــه اطفوها
يا أحلى صوره بعيني سلبوها

من حضن الحسين

—————-

يعبد الله يماي العين بُعد يوليدي بس كافي
يبعد أمك وكت نومك هسه بيا حضن غافي
إذا انت بلذيذ النـــوم جفني لنومته مجافي
رحت مني وبعدهن ليك يحنن يبني أچتافي

جفني فلا نام .. ما فارگتني بصحوتي طيوفك
جفني فلا نام ..اذكـــر بوجهي مسحة جفوفك

آمالي كلهـــا بكربلــــه أنهوها
يا أحلى صوره بعيني سلبوها

من حضن الحسين

_________


يعبد الله بدفـــــوا حضني اناغيلك جنت وأسهر
لحظات من أعوفك شوگ إلك من عندي يتفجر
ساعه مصبر لفرگــــاك نتفــــارگ دهــر مگدر
ومثل إشفافـــك الذبلــن عيونـــي ذبلـــن وأكثر

لمن يجي الليل .. أتذكـــــــرك عبدالله يالغالـــــي
لمن يجي الليل .. يرسملي صوره لوجهك گبالي

ياريت روحـــي بدالك أخذوها
يا أحلى صوره بعيني سلبوها

من حضن الحسين

________


جميـــل أيامــــي وأسعدهــا من ربنــا إليه أنطـــاك
روحـــي تستچن يبنــي من أسمـــع حلـــو مناغاك
رحت ماضل عطر منك سلبوا كل شي حتى أغطاك
يطلبـــك بيش چتـــالك ويـــا ثــار الإله ويـــــاك


أصبر بالطفوف .. والغايه أواسي السيده الزهره
أصبر بالطفوف .. المحســـن إنت وأنه لسطــــره

وللواسه فاطـــم جَنه ينطوها
ياأحلى صوره بعيني سلبوها

من حضن الحسين

—————-

كالــــوا عالولـــد والمال نعمه وللحياه زِينه
بمالــــه يعاون المحتــاج بالخلفه تقـر عينه
سند عالدنيا والأيـــام ورجاءه بكبرته يعينه
الحمـــد لله الولد والمال نطينه لوجه بارينه



يا گرة العين .. يالجاري وسط عروگي مجره الدم
يا گرة العين .. يا بيتــي يلـــي بكربلــــــه أتهـــدم

جبدتــــك تسعر نبله يسگوها
ياأحلى صوره بعيني سلبوها

من حضن الحسين


—————-


إلك نار بدليلــي تهيج مثــل نيران صيواني
وبعد ضحكاتك ونورك يبني الحزن خاواني
أَتَچه أعلــه متن الهم فگــدكك يبنـي خلاني
ما هــزك ونينــي عليك رد وطفـــي نيراني



ماضل بعد حيل .. ياريت ضمني اللحد من ضمك
ماضل بعد حيل .. وإلمـــن أعيشـــن يا بعـد أُمك

ونيــاگ هِزَّل يبنــــي جابوها
ياأحلى صوره بعيني سلبوها

من حضن الحسين


الشاعر: أبو زينب الظالمي

أبوذيــه
(( للإمام الحســين عليه السلام))


خِلق ربنا السمه لجلك ولك بر
تِهــاون دون مقـــــدارك ولَكبر
وهبـــت الديـــن عبدالله ولكبر
وجسـمك من بعدهم عالوطيّه


الشاعر : أبو زينب الظالمي

أبوذيــه
( السيدة زينب ع على مصرع أخيها الحسين ع)


دليلي نار ياخويــه وج عليك
أشوفه رايح بخيله وج عليك
انشدك يا جرح أكثر وجعلك
أداويــه وتـــرد يحســـين ليه


الشاعر : أبو زينب الظالمي