1-асар, 10-саҳифа (1.10)
Курсантлар марказий майдонга чиқиб саф тортишди. У ерда ёши қирқлардан ошган, фуқаро кийимидаги эркак кутиб турарди. Сержант қаддини ғоз тутиб эркакка ҳисоб берди.
- Ўртоқ подполковник, ўн кишидан иборат курсантлар гуруҳи дастлабки машғулотлар учун тайёр!
- Жуда яхши, - деди подполковник. - Азиз курсантлар, шу улуғ даргоҳга хуш келибсизлар! Бугундан эътиборан бир йил давомида тажрибали устозлардан касб сирларини ўрганасизлар. Биламан, курсни ўташ осон кечмайди. Шу сабабли биз саралаб-саралаб уч юз аскар орасидан фақат сизларни танладик. Лекин бу ҳаммангиз бизнинг касб эгаси бўлиб қоласиз дегани эмас. Йил сўнггида шахсан ўзим сизлардан имтиҳон оламан. Ўтолмаганингиз билан хайрлашишга мажбур бўламан. Имтиҳонни аълога топширганлар эса илк топшириқни бажаришга киришади. Гапларим тушунарлими?
- Худди шундай! - жавоб қилишди курсантлар бараварига.
- Унда, эшитинг, мана бу сержант сизларнинг взвод командирингиз ҳисобланади. Унинг буйруғини бажаришдан бош тортган курсант аёвсиз жазоланади. Эсингизда бўлсин, бизнинг жазоларимиз турмадагидан ўн чандон қаттиқ. Ҳозир эса дастлабки машғулот сифатида ўн чақиримга югурасиз. Ана шунинг ёрдамида жисмоний жиҳатларингизни синаб оласиз. Унутманг, ўн чақиримлик югуриш ҳар куни уйқудан туришингиз билан, албатта, бажарилиши шарт. Қани, ботирлар, йўлга!
Сержант курсантларни дарвоза тарафга йўллади ва кимсасиз кенгликка чиқишлари ҳамоно югуришга буйруқ берди.
* * *
Каналга уланиш 👇
@akbarugli_aziz