الشاعر عباس الفرطوسي الكربلائي

كاتب اسمك فوك الريه
شكـــرا ياراعي الحنيه
ما استاهل عطفك اني
يحسين انته هواي اعليه
...............
انته اول بشــر يبجي اعله ذباحه
يه مــدور التعـب يالما ردت راحه
يم شباج روحــك روحي مرتاحه
يامالك احساسي ملاجه وفلاحه

حسيني ... واهـــس دنيتي وديني وحياتي
حسيني ... .يامالك وجــودي وكــل صفاتي
حسيني ... .يالبيك اكتمل صومي وصلاتي

غيرك ياهو اليه

شكبر احساسي كبال احساسك
يالشاريني بدم عباسك
يالمذبوح بخنجر اعمى
ما استاهل كطعت راسك
..............
دلـــوني علـــه حضــره مهجة الزهره
ارد اوصل واساله من ادخـل الحضره
ياشيـخ الي مثــلك عـــزب ابنــحـــره
وخلاها الحـــوافـــر تاكــــل بصــدره

انته ... نايم والشمس جسمك تحركه
انته ... اتلكيت الخيــول شلون ملكه
انته ... خايف عالشمر عن لا تسحكه

خيول الاعوجيه

كلــي بيا طلبه يطلبــونك
شمسوي انته ويسلبــونك
ياروحي ويا روح الزهــره
بالخيل شلون يسحكونك
.........
عطشان واجيــتــــك معتني لبيرك
كلبـــــي لو يــــدك هم لازم يشيرك
ما احتـــاج احـــــد غــــارك بخيرك
منو يلفيني غيرك حته احب غيرك

غالي ... كلـــش ياحبيبي عليــه دربك
غالي ... دخيل الزهره منه شكبر كلبك
غالي ... والعبـــاس يامــــولاي احــبك

بكد دمعة رقيه

طيب يالما تطفه شـمـــوعك
شحنيتك من تجري دموعك
جــان الحــــافــــر تايه رايه
كمـت ودليته عله اضلوعك
...........
يحسين الاهـل عالخدمه ربوني
وبالشبـاج مثـــل العلك شـــدوني
ابو الدمعه الرخيصه همه سموني
وانته اول دمـــع ترتاحله اعيوني

هايم ... بحــــروفك مثل ما هام عابس
هايم ... عيوني بحضرتك مثل النوارس
هايم ... سموني الاهـــــل عبد المجالس

وخادم للزجيه

مجنون حسين يسموني
ينكــال اسمك ويلقنوني
بالمجلس من يذكـرونك
يطلع دخـان من عيوني
.........
انته اول بشر ينشهـك ما ينـــشـــاف
يالتنطي اليجيلك كبـل ما يلتاف
شباجـك ابــد يحسيـــن ما ينعاف
الازم ضهره انته سيدي ميخاف

بريتي ... يا اول نسيم انـــتـــه عرفته
بريتي ...كـــاتـب اســم ولا ما مسحته
بريتي ... من شح الهوه اشتميتك انته

هاي احسن هديه

ذايب بجـــروحـــك خليني
راسملك صوره بنص عيني
يا ابوي الما اعـــرف غيرك
يحــســيــن بكيفك ربيني



للعبد عباس الفرطوسي الكربلائي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
____

لمن يجد صعوبة بالحن اطلبه من
@muatmed

يسري المرض بالروح والجروح خذت حيلي
هم اني مجتوف             هم ضيم الطفوف
خذت حيلي
...................
عيني شبعانه بدموعي والدمع بيها سكن
شفافي بيها ريحة الله ليش بدموعي ارتون
ليش مجتوات اديه  شعنده وياي الزمن
من كثر جر الحبال جفوفي احسها اتكطعن
يجري الدمه من الايد وانه اعليل ارحموني
تاذيني الجفوف             هم ضيم الطفوف
الخذت حيلي
....................
المرض نابت بروحي وينهش بروحي نهش
اسمي مو مالت شتايم  اسمي اني بالعرش
ليش بمتون الترافه منطبع حيل النقش
ليش عماتي وخواتي كلها بالهيمه تطش
ملكه الحسن للضيف هالسياط تلكنها
كاتلهن الخوف              هم ضيم الطفوف
................
وين جنه اوين صرنه احنه ياناس بحلم
اني ابن ذاك الحنين الما مصدك ينشتم
العمره ما غثاله زلمه ذبحته اشباه الزلم
ليش داسو فوك صدره وقطع منه تنثلم
من هديتو هالخيل عله الهيل وكع عطره
تلتم الطيوف            هم ضيم الطفوف
..........................

التمت الحسبات بيه وضاعت بعيني السمه
من سمعت ارقيه كالت راح اموت من الضمه
من شفت راس الكفيل الرمح حيل مألمه
عين بيها السهم نابت عين متغطيه بدمه
حيل السهم اذاه يون كام ابو فاضل
ما ذيته السيوف              هم ضيم الطفوف
................
المرض يسري بعضامي وكل كتر بيه نحيل
ويسحل الجمال بيه وين ما مال اني اميل
يطكني بحجاره اعله عيني هوه كل ما عنده حيل
من يطكني بصوت اصرخ عد ابو فاضل دخيل
لا تسرع يجمال بالضعون مريض انه
من السبي اوف            هم ضيم الطفوف
..................




#للعبد_الحسيني_عباس_الفرطوسي
_____________


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________________
لمن يجد صعوبة بالحن اطلبه من
@moatmed1

#اللهم_عجل_لوليك_الفرج

طب صركال الطف اعليها
حطها اباله وكال امحيها
،،،،،،،،،،،،،
طب يتمشه وذب خاجيته
صرفن ايده وشد جفيته
تخاف الوادم من لحيته
كامت ترعش من طاريها
،،،،،،،،،،،،
الكافل طبها وفل الثامه
حضر سيفه وضب حزامه
راح وذب عالجيش اكومه
ناوي ويه الكاع يساويها
،،،،،،،،،،،
كال احنه انشور بيدينه
وانصطره الناوي يلاوينه
احنه العليه تلوك اعلينه
واعلينه العليه مسكميها
،،،،،،،،،،،،
زامط وشمحلاها ارسومه
طك ابطك بنص الحومه
خله الجيش ابنص زردومه
وكل بلعت ريج يطك بيها
،،،،،،،،،،
مثل المنجل يحصد بيهم
هد ورد وهد اعليهم
صار اولهم وي تاليهم
وبكيفه يلمها ويجفيها
،،،،،،،،،،،
طشرها الكوم ولماها
زمجر بيها ورد طشاها
راس براس اتطك خلاها
ابن اجواد وزمجر بيها
،،،،،،،،،.
هذا الكافل طب بسيوفه
خافو من سمعو بحروفه
طباها وشردو للكوفه
ملاج بكيفه يمشيها


للعبد الحسيني عباس الفرطوسي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

يحسين البكه براسك
لم جفوف عباسك
ورد بيهن للخيام
خويه الدنيه خلصانه
تموت انته واموت انه
وزينب تمشي للشام
...........
خويه العذر لله وليك شوفة عينك شلوني
حجي عيوني يريد عيون وانه السهم بعيوني
شحلف لك يبو جروحي والعباس غدروني
ذكرتك وانهدم حيلي وبجيت وغفله ضربوني
طحت وطاحت جفوفي
وراحت جلمت (اليوفي)
وخلصت ذيج الايام
خويه الدنيه خلصانه
تموت انته واموت انه
وزينب تمشي للشام
............
من ضربوني عالهامه طحت للكاع من مهري
وتلكيت الثره بوجهي ودم من هامتي يجري
وسهام الصدر متروس كلها انكسرت بصدري
وسهم جبدي وسهم كلبي طلعن من خرز ضهري
طحت ورايتي اكبالي
وتهضم طيحة العالي
وشكد بيها آلآم
خويه الدنيه خلصانه
تموت انته واموت انه
وزينب تمشي للشام
...........
ابجي وخدي عالتربان وكلبي يصد عله عيالي
واتخيلهم من ابعيد غالي يودع بغالي
منهد ما طحت من مهري وانه زينب على بالي
عزيزة كلب ابو فاضل بس لا تنطك اكبالي
سهامي مكسره بعيني
واصرخ خويه اعذريني
هدت حيلي الاسهام
خويه الدنيه خلصانه
تموت انته واموت انه
وزينب تمشي للشام
..............
يحرورة كلب عباس يماي اعيوني اريد انخاك
اشبع من اخيك شوف ورد لزينب اترجاك
اختك يابعد طولي تراها مناطرتني هناك
عمت عيني على زينب ما كالتلي الله وياك
كلمن حاير بضيمه
وزينب تركض بهيمه
وتنطك بين الازلام
خويه الدنيه خلصانه
تموت انته واموت انه
وزينب تمشي للشام
............
ما منطيك بس عمري انه آسف يمذبوحي
بروحي اسوالف اهوايه شسولف وارضه عن روحي
خجلان بكثر دمعي بكثر ما نزفت جروحي
بكثر كسرة كلب زينب عليه من اسمعت نوحي
سمعت صوتي من صحتك
وصاحت ها يبعد اختك
بس لا جيتك احلام
خويه الدنيه خلصانه
تموت انته واموت انه
وزينب تمشي للشام
...............
خويه جروحي تلجمني ضاكت ياشريج الراي
دور عالجرح بيه وادور بيك عن ملكاي
يحسين العطش هدني ما ضل حيل احرك عضاي
امطر ياجبير الغيم الخلك بكصصها شحة ماي
امطر يبو الحنيه
وشرب سكنه ورقيه
راح يصيرن ايتام
خويه الدنيه خلصانه
تموت انته واموت انه
وزينب تمشي للشام
..............
للخادم عباس الفرطوسي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

يهلال الشهر من ياكتر هليت
انته اول ضوه اتلكيته واتبديت
.........
لحد ياليل ياخذني النِشد والشوك
يهلال الشهر ليش اكبلت مخنوك
من هليت جبت وياك اليه النوك
كلشي البيك يوجع حته لو ضويت
......
من جن ليلك الاظلم على ايامي
شفت السوك والديوان جدامي
وشفت بهاي عيني حركة خيامي
وشفت شلون بين الوادم انطكيت
.........
يهلال الحزن بس كلي حدك وين
يهلبت تستحي وتسأل عليه منين
انه زينب اخت راعي العلم وحسين
ليش من القهر جلد وعضم ضليت
.......
ارجع ياهلال الليله مو وكتك
ما اريدن ضوه منك ولا ردتك
العمر طشيته عالتربان من شفتك
كبلك موتتي يهلال انه تمنيت
...........
عليك الزهره يهلال الشهر ارجع
شما اشوفك يجيني الاه والمدمع
انه شجم دوب اعمض عيوني من تطلع
ما احتار بس من شفتك احتاريت


للخادم
عباس الفرطوسي الكربلائي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه
____

لمن يجد صعوبة بالحن اطلبه من
@muatmed