#book_review #kitobxon_fikri
✍️Henri Marsh
📖”Ozor berma”Neyrojarrohlikdagi achchiq haqiqat shuki, murakkab operatsiyalarni koʻplab tajribalardan keyingina yaxshi bajara boshlaysiz. Bu esa dastlab ancha xatolar qilib, ortingizdan bir nechta nogiron bemorlar bilan iz qoldirishingizni anglatadi.
Hammaga maʼlumki tibbiyot eng murakkab, shu bilan birgalikda insondan katta masʼuliyat talab etiladigan soha. Neyrojarrohlik esa, ana shu murakkab tibbiyotning eng dolzarb va ahamiyatli bir boʻlagidir. “Ozor berma”da siz ana shu sohada faoliyat yuritayotgan vrach hayoti bilan tanishasiz. Uning yutuqlaridan tortib xatolarigacha boxabar boʻlasiz. Kitob qisqa hikoyalardan iborat boʻlib, har bir bobda har xil bemor, kasallik, operatsiya tasvirlanadi.
Har biringiz vrach xato qilishi mumkin emas degan fikrni koʻp marta eshitgansiz. Bu toʻgʻri, lekin tibbiyotda, ayniqsa nozik operatsiyalarda shunday holatlar boʻladiki, jarrohlar oʻziga bogʻliq boʻlmagan vaziyatlarda albatta xatoga yoʻl qoʻyadi. Kitobda ham Henri Marsh ana shunday vaziyatlarni roʻy-rost gapirib beradi, oʻz xato va muvaffaqiyatsizlikarini tan oladi. Kerak vaqtda bulardan toʻgʻri xulosa chiqaradi. Odatda, bemorlar bir marta koʻrikdan keyin shifokorning yodidan chiqib ketaman deb oʻylaydi, aslida-chi? Aslida shifokorlar ogʻir bemorlarni, ayniqsa vafot etgan bemorlarni bir umr esda saqlab qoladilar, bir umr afsuslanadilar.
-Duolaringizda eslang uni.
-Men operatsiyadan keyin vafot etgan barcha bemorlarimni yodga olib turaman, — javob berdim va oʻz-oʻzimga gʻoʻldiradim: — Qaniydi, ularni eslamasam…
Ushbu kitobni barcha shifokorlar va talabalar oʻqishi kerak deb hisoblayman, chunki unda deontologiya qoidalaridan biri yaʼni shifokorning bemor va uning yaqin qarindoshlari bilan boʻladigan munosabatlarini oʻrganish mumkin. Ayniqsa, vaqt soati kam qolgan bemor bilan qilinishi kerak boʻlgan munosabat yaxshi tushuntiriladi. Kitob bir qarashda faqat tibbiyot xodimlari uchundek tuyilishi mumkin, lekin barcha kitobxonlar oson oʻqiy oladilar, yaxshi tushuna oladilar.
©️
doctorsmind_books@asaxiybooks