Yakuniga yetib borayotgan “Insonga eʼtibor va sifatli taʼlim yili” mamlakatimiz taʼlim tizimida unutilmas tarixiy voqealarga boy bo‘ldi. Bugun yana bir xushxabar bizni behad quvontirdi.
✅ Jizzax viloyati, Jizzax shahridagi 26-umumtaʼlim maktabining boshlang‘ich sinf o‘qituvchisi Ro‘zigul Orziqulova Oliy Majlis Senati tomonidan o‘tkazilgan “Yil ayoli” milliy-ko'rik tanlovi g‘olibi bo‘ldi.
Qariyb yarim asrlik umrini ustozlik kasbiga baxshida etayotgan ustozning bu g‘alabasi barcha taʼlim sohasida faoliyat olib borayotgan pedagoglarimiz mehnatining yana bir munosib eʼtirofi deyish mumkin. Bu eʼtiborning zamirida qanchadan-qancha mashaqqatli mehnat, sabr, sinovlar yotishini har birimiz yaxshi bilamiz.
➖ Bugungi kunda Ro‘zigul Orziqulova olti nafar farzandi qatorida millat bolalarining ziyoli bo‘lishi uchun sidqidildan mehnat qilmoqdalar.
Davlatimiz rahbari aytganlaridek, “O‘qituvchining obro‘si oshsa, maktabning obro‘si oshadi, ilmning, taʼlim-tarbiyaning qadri ko‘tariladi”. “Yil ayoli” tanlovida ham aynan o‘qituvchimizning mutlaq g‘olib sifatida eʼtirof etilishi aynan shu so‘zlarning hayotiy tasdig‘idir.
⚡️Fursatdan foydalanib, ushbu mukofot bilan ustozimiz Ro‘zigul Orziqulova hamda ular orqali barcha ustozlarimizni muborakbod etaman. Zero, taʼlim sohasida faoliyat olib borayotgan har bir fidoyi ustoz bu sharafga loyiq.
Ustozlarimizning xalqimiz farzandlariga taʼlim-tarbiya berishda ko‘rsatayotgan mehnatlari mana shunday qadrlanishi bardavom bo‘lishini tilayman!
