قناة الشاعر حسين المحامي

كبب طاحن لو سمه
لو كلب من فاطمة
الطاحن ابكاع البقيع
اعيوني صبلهن دمه
__________________

ليش شو ماكو الصحن طبعه مضياف الحسن
الما يرد خطاره يوم هسه شو كبره ابسجن
موحش وخالي الكبر والحمامات اشتكن
بس حجر ظل وتراب الجان للخايف وطن

كبل ما صارت تره
حقد سجنو مكبره
الحسن للوادم شفيع
ليش كبتهه مهدمه
______________________________

الهم الكون انخلق السماء ويه الارض
همه سادات البشر عالخلك حبهم فرض
يحبهم الطاهر اصل الضدهم باصله مرض
باجر المهدي يجي والكببهم ينتفض

همه سادات الامم
مو احجار وينهدم
اقسم ابنحر الرضيع
العافهم كلبه انعمه

_________________________________

ون كبر ام الكفيل وحرم زين العابدين
الصادق وابن النبي تسمع ابكبره الونين
والله ظالم يازمن هاي طعنات السنين
للظلم علو صرح ومحو كبر ام البنين

ليش بس ولد النبي
اكبورهم هم تنسبي
كون كلشي الهم يطيع
همه بيت المرحمه
___________________________________

ليش هدموهه الكبب وانتم اولاد الرسل
اوياكم الظالم حرب انتو دستور العدل
جم جرح بيكم غفه يا دوه الكل العلل
امن اذكر البيكم جره كلبي نار وتشتعل

ناركم ما تنطفي
لا جرحكم ينشفي
ياحصن ربنه المنيع
شكد قصصكم مالمه
___________________________________

ندعي يا ربنه الفرج للامام المنتظر
ضاكت بهمنه الارض ننتظر صاحب الامر
الظالم يزيد الظلم بينه كل يوم اليمر
خاطر ايعمر الصحن ونرجع انزور الكبر

موكب انصبه وخدم
بالبقيع ايرف علم
انته يا ربي السميع
بينه كل هم تعلمه

______________________حسين المحامي

شما تكبر تظل بحاجة الوالد
مثله مايصحلك لو رحل واحد
====================
كل عمرك تظل للموت محتازه
الابو مثل الهوه مو مثل اي عازه
الله ايساعدك لو شالته جنازه
كبالك يندفن وعيونك تشاهد
====================
الابو قصة دلال ايعيش اولاده
لو واحد يميل ايصيرله اوساده
الكمر وده يجيبه لو ابن راده
يعيشهم بخير وهو ظل زاهد
=====================
البيت ابلا ابو جن مكبره نشوفه
وابد عن عينه ما ترحل اطيوفه
ابونه شلون ننسه ابيوم معروفه
يغطينه وننام وحرس جن كاعد
=====================
تعبناه هواي اشكثر تعبناه
ما وفينه حقه ويوم جازيناه
ربانه وكبرنه او بالكبر عفناه
يا وسفه الوكت بيناتنه ايباعد
====================
البو من راح اطشر شمل بيته
ظل خالي مكانه النحلف صيته
هذاك الجان تنكط هيبه خاجيته
مشه والبيت هسه بحاجة القائد
==================حسين المحامي

من يروح الجانلك عون وسند
طعم بالدنيه بعد ميظل ابد
الفاكد الوالد يحس ماعده شوف
الكاع جنهه بعينه ماساكنهه حد
الوالد امن يروح ميعوضه عزيز
ولا يسد امجانه مال ولا ولد
جان كل العافيه الماله مثيل
واخذ كل العافيه ابيوم ابتعد
حسين المحامي

عليك احباب تنشد بانه وايه
وتعرف يابو صالح بالنوايه
مثل وحشة النبته بالنوايه
هيج احبابك خلافك خطيه
حسين المحامي

المكابر علمتنه اعله الموادع والحنين
المكابر الهه كل يوم ابعزيز امسافرين

ليش ياوادي السلام
بيج ندفن بالحمام
=====================
بس شباب بيج خلينه اليطيبون الجروح
بس شباب من بعدهم مابقت بالضحكه روح
بس شباب يا نجف ما كسر كلبج من ننوح
بس شباب موت بسمانه بسفرهم ظل يلوح

فاركونه والدمع يانجف وشل بالعيون
فاركونه اخذتيهم والنه منظنهم يجون

عنهم يبجي الكلام
بيج ندفن بالحمام
======================
كل غروب نروح نشتم بعطرهم عالثياب
كل غروب من يجينه وياه تهب ريح العذاب
كل غروب نصيح شخبار الورد جوه التراب
كل غروب جا نطب بكبورهم لوبيهه باب

ما نريده هل العمر واليفكد احبابه يموت
ما نريده من نحاجي اصورهم ومابيهه صوت

راحو وعشنه بظلام
بيج ندفن بالحمام
========================
بينه نار من مشو وجروحنه يدورن طبيب
بينه نار شما نسولف بيهم يزيد المشيب
بينه نار بيهه يدري بس اليفارك حبيب
بينه نار ما تهود الا من تسمع نحيب

ياحسافه البعمرهم كون يبقه ويه الورود
ياحسافه مو يروح وما بعد النه يعود

ليش بالغربه ينام
بيج ندفن بالحمام
========================
هسه وين كل صباح تشوفهم هاي العيون
هسه وين ضحكه وياهم تجي لمن يجون
هسه وين ناس عشرتهم ولا ترهم تهون
هسه وين كبل ماترمش اذا اجو الجفون


من جفونه كلشي مر بخلافهم صرنه نشوف
من جفونه بينه بس طيوفهم ظلت تطوف

ننحرم منهم حرام
بيج ندفن بالحمام
========================حسين المحامي

خادمه وضحيتي اله ابربع بنين
وادري كلبج يحب خدام الحسين
اني خادم جيتج اطلب حاجتي
وانتي يم عباس ادره بحالتي /لاترديني
==========================
كبلي مارديتي واحد خاطر انسه بيوم دربج
واحنه مو بابج ندكه بالحسين نحاجي كلبج
عدنه من كد ما عزيزه دوم نشعر احنه كربج
كلبه يم بابج يعوفه اليكصدج مره ويجربج

انتي وصفة عافيه ودربج دلال
الما مجربج كال من وحي الخيال
دمعتي ابابج تضيع بضحكتي
وانتي يم عباس ادره بحالتي/لاترديني
===========================
يا حبيبت كلب زينب ارد احلفج بالعقيله
ادري خاطر الهه يمج وبدمع ذيج العليله
حاير وكاصد حضرتج انتي باب الله التجيله
يا وسيلة رحمة الله ويا امان الماله حيله

يل نذرتي اولادج ابيوم الطفوف
طمني كلبي حاجتي ابابج تطوف
يامفرحه الزهره اريدن فرحتي
وانتي يم عباس ادره بحالتي/لاترديني
==========================
حالتي صعبت واجيتج وادري ياباب العطايه
ما تردين اليكصدج وانتي للمعروف ايه
اني خادم لابو اليمه وخدمته بدنياي غايه
ابحقه يم عباس احلفج وبغرب ذيج السبايه

حيل محتاجج وانه معود اجيج
شما تضيك الدنيا يا طيبه اعتنيج
صاير اسمج بالشدايد رايتي
وانتي يم عباس ادره بحالتي/لاترديني
==========================
الي يلطم بالمجالس والجره اعله حسين دمعه
والنضم لحسين شعره واليجي ويواسي ربعه
البنه ابعاشور موكب والقره وكلبج يسمعه
الهم اعيونج تباوع وحته من يشعله شمعه

اسمائهم كلهم مسجلتهه بكتاب
وباجر تشفعيلهم يوم الحساب
منهم انه و بيه ضاكت دنيتي
وانتي يم عباس ادره ابحالتي/لاترديني
==========================
الخدم الحسين ما اظن يرجع وبكليبه حسره
بحر ياخذ من جفوفج الجره اعله حسن قطره
حضره اسمج للبريه وسفه كبرج ماله حضره
انه ما يحتاج اسولف ادري انتي ابحالتي ادره

حسين عدنه اثنينه اروع حبيب
وانتي لجروح المحب جفج طبيب
وداعة العباس توجع حسرتي
وانتي يم عباس ادره ابحالتي/لا ترديني

===============حسين المحامي

محد يابو صالح حاس بينه (حاس بينه اه)
بس كلبك نحسه حاس بينه
طال وفجر جايتك حاسبينه
يجي ويزيلهه هموم البريه
حسين المحامي

تركني وصارت اخباره بعيده
وشله الفاكد الوالد بعيده
خاطر ما امد ايدي باع ايده
وشراها التعب منه وباس اديه
حسين المحامي

الجنه ابكل معانيهه هي امنه
امنه الجانت الخايف هي امنه
ذبلنه ابصحره من راحت هيمنه
وجنه وياهه هيل اعله الوطيه
حسين المحامي

يا عافية الراحت بعد ما ردت
يا شربة الماي العفتهه اتبدت
مختنك يانسمة هوه رايح وين
من رحت ما ينفع بعد شوف العين
شيبت بس كبرت جروحي وشبت.

الى والدي /ذكرة وفاته بليلة استشهاد امير المؤمنين ع

يا رجال الحشد بيكم الغانمه
انتو شتلة ورد بيهه تحجي السمه
====================
لو نذرنه ارواحنه بحبكم قليله
يا سدنه اشما تمر بينه الثجيله
انتم الحب الوطن اقرب وسيله
هيبه اسمكم ما يصحلنه بديله

يا رمز للمجد يا ضوه المظلمه
====================
يارصاصة كاعنه بكلب المعادي
وضربة جفوف الحسن فوك المرادي
بيكم يظل الوطن غالي وينادي
انتم اسطورة شرف ولدي وفوادي

بيه لمن تشد كال انتم حمه
=======================
صحتو ياسيد علي وداعة غلاتك
وداعه محمد رضا ارتاح بحياتك
انته ما يحتاج لا تنكت عباتك
انته بس اشر على الرته بعصاتك

بيكم المايرد وروحه متحزمه
=====================
انتو من حيدر دوه لاخر زمانه
انتو لو راح الهوه صرتو بمكانه
درع لعيون الوطن وانتم امانه
نمشي وبيوم الحشر انتم لوانه

الزلمه بيكم يهد نار بالموزمه
===================
انتم اعيون الوطن وانتم سيوفه
انتو شربة ماي من يعطش نشوفه
الجاست تراب الوطن غدراً جفوفه
ما غفه ابليله ورعبكم ظل يطوفه

انتو نعم الولد الفرحت فاطمه
=======================
يا ولدنه اعله النجم دكيتو اسمكم
الكاع من رادت زلم طشيتو دمكم
الموت ماهمكم وطنكم صار همكم
كون اياديكم نقبلهه و جدمكم

بزودكم لا برد ولا يمسنه الضمه
=======================

حسين المحامي

يعينك الله ياعلي بهذا الصبح
وانته نص راسك وصل حد الجرح
=======================
يعينك الله اليوم طرو هامتك
حمره صارت من دماك عمامتك
يعينك الله وبيش تصبر شيعتك
اليوم كلب احبابك انصاب ابرمح
====================
اليوم تبجي الكاع وتنوح السمه
بالضلوع اتحس مصابك فاطمه
جم يتيم اليوم جرحك المه
وصاح ياهو النه بعد حيدر يصح
=====================
اشلون حالك ياعلي بهذا الصباح
من تشاهد زينب وهدهه النياح
هذا جرحك مو مثل باقي الجراح
ودم وريدك منه ياحيدر يشح
====================
شلون حالك من تودع بالعيال
والله وضعك ياعلي يهد الجبال
شلون بيهم من عكب ذاك الدلال
كل حلم بعيونهم لاحه الذبح
====================
بيش وصيت الحسن ويه الحسين
وشكلت من عاينت لام البنين
كفلت عباس باخته امن السنين
وصورة الطف ابعيونك تتضح
====================حسين المحامي

لسان حال السيدة زينب ع باستشهاد والدها ع
مصابك حيل ياحيدر اذانه
وبجه المحراب واتلم اذانه
اشلون اصبر على فراكك اذا انه
هوه اشتمك بكل صبح ومسيه
حسين المحامي

شحلاة اسمك الوي دمي وشبهه
وعشكك بيش اوصفنه واشبهه
النار اشتعلت بكلبي وشبهه
ذكر طبرتك يابو حسين بيه
حسين المحامي

يعينك الله ياعلي بهذا الصبح
وانت نص راسك وصل حد الجرح
حسين المحامي

عمرنه فدوة الك كله ودمنه
خدام الك وفقه ودمنه
يحسين الفخر لسمك ودمنه
تحبنه وصار صيت النه وهوية
حسين المحامي