ОНА ВА КЕЛИН
Оқшомда эшикка қараб, кўз тикиб,
Юракка ташвишу, гумонлар экиб.
Она билан келин, бермай сирини,
Бири ўғлин кутар, бири эрини.
Боласи тушмагур ҳаяллаб қолди,
Нохуш хаёл дилга ғулғула солди.
Бўлмасин деб бирор кору ҳол содир,
Дилгир онаизор олар хавотир.
"Йиқилмай, туртинмай, топмай фалокат,
Уйга етиб келсин, соғу-саломат" -
Дея дуо қилиб ўғлин кутади,
Ҳасратларин она ичга ютади.
Келин ҳам кутади ухлаб-ухламай,
Гумонлари дилда сира тўхтамай.
Айни дамда эри қайда, ким билан,
Кеч бўлганда нима қиляпти экан.
Жуда ҳам бемалол бу эркак халқи,
Улфатлари билан биргадир балки.
Гоҳ васваса солар бекорчи хаёл,
Балки ёнидадир бегона аёл...
Кўнгилда ором йўқ келгунча эркак,
Она билан келин - икки қуш ҳуркак.
Эркак кеч қолганда, яхшиси, ҳар гал,
Фақат яхшиликни ўйлаган афзал.
Хуллас, не ҳам дердик сўз адосида,
Оналар ҳақ эрур ўз дуосида.
Гумонда яхшилик бори туфайли,
Бўлақолсин хотин айтганча, майли...
БОБУР БОБОМУРОД
@jurnalisqizN