الشاعر علي حسن الكناني

وين ، والدي ،، وين ، والدي

صاحت رقية اليوم ،، من فزت من النوم ،، وين والدي

؛؛؛؛؛؛؛؛؛؛؛؛؛؛؛؛؛؛؛؛

صاحت تعال ،، والله طال ،، بُعدك و أريدن جَيّتَك
بويه شوف ،، كل شي عوف ،، لازم تمر لِبنَيّتَك

إرجعلي هسه ،، بويه وسفه ،، بنتك تنوح
رد و إخذني ،، لا تردني ،، خل سوه نروح

ليش ، ما ترد ،، ليش ، مبتعد

ما ضل دمع بالعين ،، راح أشتكي لحسين ،، وين ، والدي

؛؛؛؛؛؛؛؛؛؛؛؛؛؛؛؛؛؛

بالخِربَة صار ،، هذا القرار ،، أتعَذّر و سامحني
إسمع شگول ،، يبن البتول ،، راسك يجي و ياخذني

ما بيها تالي ،، والله حالي ،، يبچي الحجار
بحرگة خيمتي ،، چفي و وجنتي ،، مچوية بالنار

نار ، تستعر ،، نار ، بالصدر

مجروحة إذنچ بيش ،، لتگلي وين و ليش ،، وين ، والدي

؛؛؛؛؛؛؛؛؛؛؛؛؛؛؛؛؛؛؛

ما قانعين ،، هالمجرمين ،، حاروا إشعذبوني
للإحتياط ،، بضرب السياط ،، بالسبي لوعوني

جَرحُولي ظهري ،، و زاد قهري ،، من يضحكون
ما أگدر أحچي ،، بحرگه أبچي ،، و ما يحسون

بيش ، أنطلب ،، بيش ، يا قلب

بعدك ترف عالويل ،، لللوعة شايل حيل ،، وين ، والدي

؛؛؛؛؛؛؛؛؛؛؛؛؛؛؛؛؛؛؛؛؛؛؛

آخر كلام ،، بنت الإمام ،، گعدوها بالخرابة
مو بالفصيح ،، گامت تصيح ،، جيبولي هسه بابه

شفته بمنامي ،، جسمه دامي ،، و راسه مذبوح
گربت إشمه ،، جيت أظمه ،، و طلعت الروح

آااااه يا حلم ،، آااااه عاليتم

بويه تعال بساع ،، ودعت إهلي وداع ،، وين ، والدي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

بويه إشدهاچ ،، باعي وراچ ،، بالطشت هذا راسي
جيتچ و أريد ،، نرحل بعيد ،، لا تذبحين إحساسي

يا كل حنيني ،، إحضنيني ،، و بوسي الجبين
عينچ بعيني ،، خبريني ،، اليوجعچ وين

جيت ، بس الچ ،، جيت ، آخذچ

كافي دمع و ونين ،، جيتچ و لتگولين ،، وين ، والدي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
#وين_والدي
#علي_حسن_الكناني

يبني الغالي ، يا سجاد الدفنك جينه
يبني الغالي ، عمك جاي بلا چفينه

جينه نردلك دين ، يوليدي آنه حسين ، إمنالطف متعنين

يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

جيتك و جايب عمامك و ذول أخوتك هالإجوا
ينبي سبعيني الأودهم گبلي والله تحزموا
بالدمه إبلا روس لجلك دگوا صدور و مشوا
بچوا لمصابك حبيبي مثل ما لجلي بچوا

بالطف صاحوا ، آه إعله الساجد و مصابه
بالطف صاحوا ، لجله نحور بدم سچابه

جبت أنصاري و جيت ، دم من نحري بچيت

إبلوعة أب ناديت ، يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

إستأذنت جدك و أبشرك جدك إلجيتي إرتضه
رغم ما مخسوف صدري و الضلوع مرضرضه
بيني شوف تراب گبري تحيرت بيش أنفضه
الخيل كسرت هاي إديه و هالمصاب أرد أعرضه

بذيچ الساعة ، بهذا الموقف شيب راسك
بذيچ الساعة ، جرحك صار خيول و داسك

أعرف يبني إشبيك ، الطف حيل إمأذيك

هالجينه نواسيك ، يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

خلصت عمرك بواچي و هالخبر ليه وصل
حگك و معذور يبني ، مثل يومي ما حصل
موذر و دامي و سليب و راسي عن جسمي إنفصل
ولدي يمي مذبحين و منهم الصاير وصل

شافت عينك ، راحوا بس محد رد سالم
شافت عينك ، من طحت و حز نحري الظالم

جيت و أهلا بيك ، عبدالله متانيك ، خل هو يحاچيك

يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

خل يسولفلك أخوك الأصغر و صبرك أهم
هالرضيع ألما رضع ، سأله على ذاك السهم
أدري مشتاق الضحكته و للأسف صارت وَهَم
أبگد عُمر نوح ويه آدم هالطفل شايله هم

من تشوفه ، هونك لا تجرح إحساسه
من تشوفه ، هم راح تشوفه بلا راسه

ملعون الذباح ، حز راس ابني و راح ، رفعوا فوگ رماح

يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عمتك زينب إجتلك يبني محنية ظهر
من شفت حالتها يمك ، نار شب بيه القهر
أصفر و ذابل وجها من البچي و طول السهر
شابت و من إسألتها جاوبت ، يم النهر

شفت الكافل ، و ما صدگت عيني الي تشوفه
شفت الكافل ، إبلا راس و مگطوعه چفوفه

من راحت لهناك ، للشاطي بلياك ، هالموقف أذاك

يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

يبني جايبلك عزيزة وياي إجتي الدفنتك
بالسبي إشگد لوعوها و بالخرابة ودعتك
تگول صار إهواي عنك غايبة و ما شافتك
بهيده كون و حن عليها لو رقية حضنتك

إشگد روعوها ، بالسوط بنيتي يضربوها
إشگد روعوها ، گطعوا ترچية و جرحوها

بيها شگد جروح ، جتني بنيتي تنوح ، شيسوي المذبوح

يبني الغالي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#يبني_الغالي
#علي_حسن_الكناني

رگضة طويريج شو سمعيني
كون بالرگضة التجي تسجليني

شوفي قلبي و فدوه إنسي ذنوبي
رايد أنداس بصحن محبوبي

بيوم عاشور

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

رگضة طويريج أحلفچ بالإمام
بالبچت عينه دمه

أرد أموت بيوم عاشر و السلام
و بضلوع مهشمه

قانع آنه إبهالأمر ،، موته بس تسوه العمر

ما ضگت لوعة نظر حرگ الخيام
و لا فطر چبدي الضمه

كون أموت آنه الحبيبي إبحترام
و يألمني ال ألمه

راح أسوي الينگدر ،، كون أهشم هالصدر



بوحدة من أعظم شعاير ديني
جسمي ليه بس نذر لحسيني

راح أجيله و ثوب الأسود ثوبي
رايد أنداس بصحن محبوبي

بيوم عاشور

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

البيچ راحوا همه ذوله السابقون
و إحنه ننتظرچ سنه

أحياء عند حسين صاروا يرزقون
بجنته و بموطنه

نالوا الفوز العظيم ،، واسوا الجسم الهشيم

و إحنه عالخطوة المشوها سائرون
و النوايا معلنه

قلوب اليواسونه ساعات المنون
مطمئنة و آمنه

و الشفاه الذابلات ،، لجله حبينه الممات



الركضه رحمة و أبد ما عفناها
ردنه بيها نموت و إگصدناها

كاتب إلها و هذا نص مكتوبي
رايد أنداس بصحن محبوبي

بيوم عاشور

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

حسين يستاهل بعد و إحنه نريد
منّه يزداد العدد

مستهل نردده و نضل نعيد
يا أبو صالح مدد

ألف عابس ألف جون ،، عالسحگ يتاركضون

هالحلم أصبح حقيقية و مو بعيد
نگدر نوفي العهد

آني من أنداس أتباهى أكيد
بموته أحلا من الشهد

الناس خلهم يسمعون ،، ربي ما أگول أرجعون

و الأعمال الصالحة بمعناها
كلها والله بركضتي الگاها

لإن چانت غايتي و مطلوبي
رايد أنداس بصحن محبوبي

بيوم عاشور

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

مو بشر رگضت أمس رگضت خيول
أعوجيه و بيها سر

من تدوس إعله العظم تِذهل عقول
ينطحن مو ينكسر

لو مشت تخسف أرض ،، عالجسد رگضت ركض

و آنه هسه بهذا حالي إشأرد أگول
أبد ما شايف عِسر

حتى لو جسمي إنسحگ ، جرحي يطول
ما عشت لوعة يِسر

عالوضع هذا أعترض ،، چنه ناقص هالفرض

تنضرب بسياط كون موتني
طايح و بسيوف ما گطعوني

كافي يا نفسي فضحتي عيوبي
رايد أنداس بصحن محبوبي

بيوم عاشور

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
#رگضة_طويريج
#علي_حسن_الكناني

أويلاه يوالدي ،، أويلاه يوالدي ،، أويلاه يوالدي

؛؛؛؛؛؛؛؛؛؛؛؛

آنه رقية بنيتك ،، أويلاه يوالدي
بالطف عفتها جثتك ،، أويلاه يوالدي
شفت الخيول الداستك ،، أويلاه يوالدي
هذا العذاب الأبدي ،، أويلاه يوالدي

؛؛؛؛؛؛؛؛؛؛؛؛؛

أركض و أدوس أعله الجمر ،، أويلاه يوالدي
من البچي عيوني حمر ،، أويلاه يوالدي
تقبلها يضربني الشمر ،، أويلاه يوالدي
و الخد الأحمر شاهدي ،، أويلاه يوالدي

؛؛؛؛؛؛؛؛؛؛؛؛؛؛؛

حاچيني و إسمع شكوتي ،، أويلاه يوالدي
مني إگطعوا ترچيتي ،، أويلاه يوالدي
يا بويه حرگوا خيمتي ،، أويلاه يوالدي
أبچي و أنوح بوحدي ،، أويلاه يوالدي

؛؛؛؛؛؛؛؛؛؛؛؛؛؛؛؛

مسبية وي عمتي رحت ،، أويلاه يوالدي
أنضرب لو لجلك نحت ،، أويلاه يوالدي
أتمنى كون إنذبحت ،، أويلاه يوالدي
و الدم يخضب جسدي ،، أويلاه يوالدي

؛؛؛؛؛؛؛؛؛؛؛؛؛؛؛؛؛

صارت حياتي مظلمة ،، أويلاه يوالدي
بالليل أبد ما نايمه ،، أويلاه يوالدي
بحضنك أنام معلمه ،، أويلاه يوالدي
صدرك يبويه مسندي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛

هذا الخبر ميفرحك ،، أويلاه يوالدي
يمنه يحوم إلي إذبحك ،، أويلاه يوالدي
هلكانه شاهدني و ضحك ،، أويلاه يوالدي
عالترب گال إتمددي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛؛

عبد الله صعبة فرگته ،، أويلاه يوالدي
مشتاقة أسمع ضحكته ،، أويلاه يوالدي
ليش أمه يمك خلته ،، أويلاه يوالدي
ما گتلي يمه توسدي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛؛؛؛

يا بويه الأكبر ما وصل ،، أويلاه يوالدي
گالولي متگطع وصل ،، أويلاه يوالدي
بالطف صدگ هالشي حصل ،، أويلاه يوالدي
يا روحي بالهم عددي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛؛؛؛؛

كل المصايب شاهدت ،، أويلاه يوالدي
و هالساعة بالخربة گعدت ،، أويلاه يوالدي
غير المنية ما ردت ،، أويلاه يوالدي
يا موتي عجل موعدي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛؛؛؛؛؛

عگبك الف لوعة عشت ،، أويلاه يوالدي
و بحلمي عنك فتشت ،، أويلاه يوالدي
جابولي راسك بالطشت ،، أويلاه يوالدي
موتني و إنصب مرقدي ،، أويلاه يوالدي

؛؛؛؛؛؛؛؛؛؛؛؛؛؛؛؛؛؛؛؛؛؛؛

#أويلاه_يوالدي
#علي_حسن_الكناني

وداعا يا گمر راح أمشي للشام
أشاگف بالسياط و أحرس أيتام

مسبيه ، ينادوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛

يا كافل ، خدر زينب ، أبشرك رايحه بروحي
الشمر باوع ، عليه و گال ، يزينب ضلي بس نوحي

أحبس دموع العين ما بين الأغراب
ظهري إنحنى و بجفاك خويه الشعر شاب

يا خويه و عگب كل ذيچ السنين
لا إنت التباريلي ولا حسين

يا عباس ، آذوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛

چنت يمي ، شلت همي ، چنت تمسح دمع عيني
تگلي لا ، تأذيني ، تره العاداك يحديني

مو طبعي يا عباس أطلع بلياك
عفتك جسد مذبوح و إلي إذبحك ذاك

يگلي للكفل صرت آنه ذباح
و من سكنة سمعت بس صوت الصياح

يَمّه تگول ، ودوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛

وِسف فوگ ال ، رمح راسك ، رحت فدوه الضمه شفافك
تعال أنزل ، أبويه الغاب ، عَلَي شيگول لو شافك

من چنت إنت زغير يا طيب الإحساس
چنت ألزم چفوفك و أمسح على الراس

گطعوا راسك و گطعوها الچفوف
ريت عيوني عميه و أبد ماشوف

بمصابك ، ذلوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

إذا تسمع ، تعال إرجع ، و گلهم لا يشتموني
أشَد حزني ، تفارگني ، و بعد ما تسأل إشلوني

المن بطيت و ليش ما تجي يا موت
آنه العقيلة اشبيك ما تعرف الصوت

إخذ روحي و عليه إگطعها الأنفاس
شسوي بدنيتي و ما بيها عباس

بلغ حسين ، و إخذوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عفتني إشلون ، عليك يهون ، تخليني بوسط غربه
يعذبني ، الشمر لمن ، يشيل الرأس و يضربه

مصدر أمان الروح هذا الوجه چان
ما أدري راح يصير مصدر للأحزان

حگي من أجزع و ألطم على العين
إبجسمك ماكو رأس و ماكو چفين

أهدا إشلون ، يعيوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

سكون الليل ، يهد الحيل ، أبات بچوله مو بيتي
شلي إبهالحال ، ولا عالبال ، سبية تصير تاليتي

چني إنسبيت سنين ما چنها أيام
و عيني بوجود أغراب ما تعرف تنام

چنت مخدره و منسد عَلي باب
الذبح عندي سهل و الصعب الحجاب

لا لتظن ، شافوني ، بغيابك ، ضربوني

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#علي_حسن_الكناني
#وداعا_يا_گمر

آه من درب السبي ،، خويه يعباس

؛؛؛؛؛؛؛؛؛؛؛؛؛؛؛؛؛؛؛؛

خويه ليش إستعجلت ، ودعتني و ما گلت ، إختي وحيدة
گوم خل عينك تِرف ، الشام يا خويه إتعرف ، كلش بعيدة

وين ما أباوع زِلم ، إبيقظه آنه لو حِلم

لوعتني النايبات ،، گمت أتمنى الممات

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ما ردت منك عذر ، خويه آنه أعتذر ، بس رد عليه
هالوضع ما ينقبل ، إشلون ترضى بالحبل ، مربوطه إديه

شلون ترضاها الشمر ، يشتم و يأمر أمر

بدنيتي صار المَحَال ،، حكمت أشباه الرجال

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

أعظم آيات الجرح ، راسك الفوگ الرمح ، و السهم بالعين
جسمك يزيد القهر ، أدري ضل يم النهر ، و بلايه چفين

دامك إنت مبتعد ، خلني للهم أستعد

والله حسرة بقلبي هاي ،، سكنة ما جبتلها ماي

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

إلك زادت ونّتي ، من أموت بغربتي ، هاك الوصية
كون أبد ما تنتظر ، إبوحشتي بوسط الگبر ، سير عليه

نعي يقرا المَلكين ، عنك إنت و الحُسَين

لا تطول بالمغيب ،، بگبري لتخليني أشيب

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ما خذت منك وعد ، أدري ما ترجع بعد ، و بطلت أتناك
موتك إعليه عِسر ، و هالعفتني باليسر ، روح الله وياك

الجزع يا خويه إعتنه ، قاب قوسين و دنه

الدنيا ظلمه بلا ضواك ،، و گرّبِت من الهلاك

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ألف حيرة تحيرت ، خويه مسبيه صرت ، آنه الأميرة
شتم يا خويه إسمعت ، بالسياط تروعت ، ها يبو الغيرة

ظهري يا خويه إنحنه ، اليوم بحسابي سنه

بنص غرب و بلا خيام ،، عيني ما تعرف تنام

خويه يعباس

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#درب_السبي
#علي_حسن_الكناني

يا علي يا علي ،،، يبني إرفع راسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

يا إبن فحل الفحول و غيرتك معروفة
عزم عباس أخو زينب بيك خل نشوفه
أمك و تدريني يبني الرجعتك ملهوفه
بس أوصيك بأبوك حسين أبد لتعوفه

يا علي يا علي ،،، لا تخيب إحساسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ألزم السيف بيمينك يا عظيم السيرة
من أبو النوماس عمك وارث إشگد غيره
من تطب للحومة خلي الجيش يبقى بحيرة
طه رد لا هذا حيدر لا علي مو غيره

يا علي يا علي ،،، وياك إخذ أنفاسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

زَلزل الطف إبمغيرك من تطب للحومة
عسكر اليوگف إگبالك موتته محتومه
يبني كل من ما يعرفك ردله هالمعلومة
حيدر الكرار جدي الما يهاب خصومه

يا علي يا علي ،،، يبني ذكر الناسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

إرسم بچفك ملاحم خله يبدع سيفك
إشما يمر بالبال سوي يبني إنت بكيفك
الخوف أبد ما يدنه يمك ما يمر بطيفك
إبن قتال النواصب هالشكل تعريفك

يا علي يا علي ،،، بيك أتوج راسي
يا علي يا علي ؛؛؛ أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

مثل عمك ما تدنگ ، راسك يضل عالي
أدري وديتك تموت و إنت إبني الغالي
روح ، بس عندي وصية ، من تمر إبالي
كون أشوفك ماي شارب حتى تهدا أحوالي

يا علي يا علي ،،، يا أعز كل ناسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛

لا تفكر بيه باچر زينب تهم بيه
خلهم يسموني يبني أمك المسبية
عالعقيلة اليجري لازم يجري هم عليه
بالصبح نشگف سياط و ننتحب ليلية

يا علي يا علي ،،، إشكثر راح تقاسي
يا علي يا علي ،،، أعرفك عباسي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#أعرفك_عباس
#علي_حسن_الكناني
#محرم_الحرام_1441

بالشفاه الذابلات ، و دمعة العين
ربي أرزقني الممات ، بحضرة حسين

؛؛؛؛؛؛؛؛؛؛؛؛؛؛؛؛؛؛؛؛؛

لا تحسبوني بوعي حسبوني مجنون
موتي ماريده مثل كل اليموتون
ما تشيلوني جنازة و ما تشيعون
كون أموت إبصحنه و بصحنه تدفون

أمنيتي هاي و غايتي
تدفنوني بجنتي
هي هايه رجوتي ،،، يا حسين

يلي صايرلي هوه
بلسم جروحي و دوه
بموتي كون نضل سوه ،،، يا حسين

لا تردهن خاليات ، چفوفي الإثنين
ربي أرزقني الممات ، بحضرة حسين

؛؛؛؛؛؛؛؛؛؛؛؛؛؛؛؛؛؛؛؛؛؛؛

#بالشفاه_الذابلات
#علي_حسن_الكناني
#محرم_الحرام_1441

روعة هالميادين صولات الهواشم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛

إذنت سوح الحرب ، بانت الخياله
و بني هاشم من تهد ، الخصم ينكر حاله
يشرد و ما يلتفت ، يدري يا ند جاله
يعرف الموت إنتشر ، و بينت أهواله

بينه و بين الخصوم مختلفة القواسم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛

فارس و جده علي ، بي نفس إحساسه
للحرب لمن يطب ، يطب رافع راسه
ما يباوع للعدد ، هذا مو مقياسه
العدو لمن يدركه ، تنگطع أنفاسه

مو شغلة قوانين ، يهلك خصمه لازم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

يا علي الأكبر مدد ، حسين صوت أنصاره
منو اليگدر يقترب ، من يسل بتاره
بساحة الطف من برز ، هناك شبت ناره
خَسِف بالگاع و جثث ، هي هاي آثاره

من يهجم على الجيش لتظن يبقى سالم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ما يخاف و ما يفر أبد من خصومه
علي كرار الحرب حيدري من يومه
مو غريبة و ما أشك أنه إبهالمعلومة
ظني ساعة طبته الشمر شگ هدومة

طالب عمر إبن عاص چان إلدرسه فاهم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

لا فتى إلا علي بن حُسَين الأكبر
يقلع جيوش الكفر مثل قلعة خيبر
الله يستر لو غضب بالحرب لو كَبر
بساع بَاوِع للخصم تشوفه كله مطبر

يشترهم عرض طول . طشرها الجماجم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

هالله هالله يا علي فوت و الله يعينك
فوت و احصدهم حصد يا بطل بيمينك
خلي أملاك السمه تنزل إعله حسينك
تگله الله بهالشم يگول گرة عينك

هذا اليرفع الراس لو صارت ملاحم
علي الأكبر بالحروب شخصه و سيفه صارم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#علي_حسن_الكناني
#روعة_الميادين