Maqsadli Mijoz

"SMM menejer hamma sohani zo‘r bilishi shart" deyishadi, shu to‘g‘rimi?

Ba’zida biznes egalari yoki HR mutaxassislar “SMM menejeri” lavozimi uchun e’lon berishganda, universal xodim izlashadi.

Ya’ni, bitta mutaxassisdan: targeting, mobilografiya, kopirayting va grafik dizayn bo‘yicha ko‘nikmalarni talab qilishadi.

Ammo bozorda bularning barchasini mukammal biladigan mutaxassis yo‘q.

Chunki bularning har biri alohida soha. Har birini yaxshilab o‘rganish uchun kamida 1-2 yil vaqt kerak.

Aslida:

SMM jamoada SMM menejer, targetolog, grafik dizayner, kopirayter va mobilograf bo‘lishi zarur.

SMM menejer shu jamoani boshqaradi va undan talab qilinadigan asosiy ko‘nikma:

Nima qilish va uni nega qilish kerakligini aniq bilish.

Misol:

Ijtimoiy tarmoqlarda brend taniqliligini oshirish kerak. SMM mutaxassisi shu maqsadga olib boradigan strategiya va kontent reja tuzadi.

Keyin SMM jamoadagi har bir mutaxassisga aniq vazifa beradi va uni nazorat qiladi.

To‘g‘ri, buning uchun SMM menejer ushbu sohalarni boshlang‘ich darajada bilishi zarur.

Lekin baribir u SMM jamoadagi barcha mutaxassislarning vazifasini bajara olmaydi.

Siz qanday fikrdasiz? Izohlarda yozib qoldiring.

🔔 Post foydali bo‘lsa, uni SMM sohasidagi do‘stlaringizga ham yuborib qo‘ying.

#shu_togrimi

@maqsadli_mijoz

Avval shu nomga mos bo‘lish kerak

- Mahsulotimni qimmatroq sotmoqchiman. Nima qilsam bo‘ladi?

- Brendni nomini yoniga “Premium” so‘zini qo‘shib qo‘y.

Kulguli holat bo‘lishi mumkin.

Lekin hozirda ko‘plab biznes egalari aynan shunday qilishmoqda.

Qayerga qaramang, Premium kiyim/mebel/buyum do‘konlarini ko‘rasiz.

Lekin ularni ichiga kirsangiz, premium sifatni ham servisni ham topa olmaysiz.

Yana mavsum oxirida 50, 70, hattoki 80% gacha chegirmalar ham berishadi.

Aslida, brendingiz chinakam “Premium” bo‘lishi uchun siz eng yuqori sifatdagi mahsulotlar va servis ko‘rsatishingiz hamda har bir mijozni rozi qilishingiz kerak.

Bunday mahsulot xaridorlariga narx eng muhimi emas.

Ular pul evaziga vaqt, energiya, asablarini asrash va tejashni istaydi.

Siz shunday xizmat ko‘rsata olsangiz va bunga xodimlaringiz ham tayyor bo‘lsa, unda sizga omad tilayman.

#kuzatuv

@maqsadli_mijoz

10 yoshli jiyanimga "nisha" nimaligini qanday tushuntirgan bo‘lar edim?

Oldingi safar sen bilan tone of voice haqida gaplashgan edik. Bugun senga "nisha" nimaligini batafsil tushuntirib beraman.

Senga savol: Ingliz tilini mukammal o‘rganib, IELTS imtihonida 7+ ball olmoqchisan. Nima qilasan va qaysi fanni ko‘proq o‘rganasan?

— Faqat ingliz tiliga e’tibor qarataman va unga ko‘proq vaqt sarflayman.

Brend bilan ham xuddi shunday.

Ya’ni, agar sen do‘stlaring orasida ingliz tilini o‘rgatish bo‘yicha eng zo‘ri bo‘lishni istasang, o‘zingga bitta yo‘nalish(nisha) tanlab ol va shuni rivojlantir.

Ammo bozorda universal bo‘lishni xohlasang, ham kuchingni, ham vaqtingni yo‘qotasan.

Barcha yo‘nalishda birinchi raqamli bo‘lish — deyarli imkonsiz.

Lekin sen bitta yo‘nalishda eng yaxshisi bo‘lsang, o‘quvchilaring senga boshqalardan ko‘ra ko‘proq pul to‘lashga ham tayyor bo‘lishadi.

Senga yanada tushunarliroq bo‘lishi uchun sen tanigan aktyor Bryus Lidan iqtibos:

“Men 10 000 ta zarbani biladigan insondan emas, bitta zarbani 10 000 marta mashq qilgan jangchidan qo‘rqaman".

===

Kuchli brend qurish uchun qadamlar ko‘p. Buning uchun sen mijozlarga ham alohida e’tibor berishing kerak. Keyingi suhbatimizda senga mijoz tajribasi haqida aytib beraman.

#soddamarketing

@maqsadli_mijoz

“Reklama yoqildi. Lekin u foyda bermayapti”

Ba’zida Target reklamani ishga tushirganda sahifaga tashriflar kam yoki umuman bo‘lmaydi.

Bunday holatda o‘lchash kerak bo‘lgan ko‘rsatkichlardan biri — CTR

CTR nima?

⭐️ CTR(Click-Through Rate) — reklamani ko‘rib, unga klik bosgan mijozlar foizini hisoblaydigan ko‘rsatkich. Bu ko‘rsatkich qancha yuqori bo‘lsa, reklama samaradorligi ham shuncha baland bo‘ladi.

Qanday hisoblaymiz?

CTR = (Kliklar soni / Reklamani ko‘rishlar soni) x 100

Masalan: Reklama 50 000 marta ko‘rildi. Unga 500 ta klik bosildi.

Bunda: (500 / 50 000) x  100  = 1%

Demak, CTR — 1%

Bu ko‘rsatkich o‘rtacha 0,5% dan 1,5% gacha bo‘lishi mumkin.

===

Qanday yaxshilash mumkin?

• To‘g‘ri maqsadli auditoriyani aniqlang;
• E’tibor tortuvchi vizual kontentdan foydalaning;
• Aniq va mijozlarga ta’sir qiladigan CTA yozing;
• Kreativlarni ko‘proq test qiling va yaxshilang;
• Mahsulot/xizmatning boshqalardan ustun jihatlariga urg‘u bering.

===

📊 Marketolog bilishi zarur bo‘lgan barcha ko‘rsatgichlar haqida quyida o'qishingiz mumkin:

- Bir mijoz narxini qanday qilib hisoblash mumkin?

- Mijozning butun umri davomida kompaniyaga qancha foyda keltirishini qanday hisoblash mumkin?

- Sarmoya qilingan puldan qaytayotgan daromadni qanday o‘lchash mumkin?

- Korxona necha foiz mijozini saqlab qolayotganini qanday o'lchash mumkin?

- Churn Rate: Mijozlarning qanchasi kompaniyani tark etmoqda?

- Tashriflar ko’p, ammo sotuv kammi?

- Mijozingiz sizga sodiqmi?

- Mijozlarning mahsulot/xizmatdan qanchalik qoniqqanini qanday hisoblash mumkin?

- Sayt qay darajada to‘g‘ri ishlab chiqilganini o‘lchash formulasi

🔔 Postlar foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

“Hammasi zo‘r bo‘lsin” deyishadi, shu to‘g‘rimi?

Grafik dizaynerga: Zo‘r dizayn tayyorlab bering;
Videografga: Zo‘r video olib, montaj qiling;
Kopirayterga: Zo‘r matn yozib yuboring.

Savol:

“ZO‘R” — siz uchun nima? Uni o‘lchash mumkinmi? Eng muhimi — buni qanday tushunish mumkin?

Hozirgi kunda ba’zi biznes egalari va SMM mutaxassislari vazifalarni shunday berishadi.

Tasavvur qiling:

Shu ko‘rinishda topshiriq berdingiz. U bajarildi. Lekin sizga yoqmadi. Buni mutaxassisga qanday tushuntirasiz?

Ha, balki vazifa haqiqatdan ham noto‘g‘ri bajarilgandir. Ammo vazifa aniq bo‘lmagani uchun mutaxassisga buni tushuntira olmaysiz.

===

Nima qilish kerak?

1. Mutaxassislarga vazifa berganingizda ulardan aniq nima/qanday natija kutayotganingizni batafsil tushuntiring.

2. Topshiriq tushunarliroq bo‘lishi uchun namuna/referens yuboring.

3. Aniq vazifa bermagan bo‘lsangiz, mutaxassislarni ayblamang.

Sizda ham shunday holat bo‘lganmi? Javoblaringizni izohlarda kutaman.

🔔 Post foydali bo‘lsa, uni marketing sohasidagi do‘stlaringizga ham yuborib qo‘ying.

#shu_togrimi

@maqsadli_mijoz

10 yoshli jiyanimga brend tone of voice’si nimaligini qanday tushuntirgan bo‘lar edim?

Oxirgi suhbatimizda senga brend aydentikasi nimaligini o‘rgatgan edim. Bu galgi mavzu tone of voice haqida bo‘ladi.

Har bir insonning o‘ziga xos tashqi ko‘rinishi va xarakteri bor.

Kel, brendni ham odam deb tasavvur qilamiz.

Uning tashqi ko‘rinishi — logotip, dizayn uslub.

Xarakteri — tone of voice

Ya’ni, brend tone of voice’si brendning xarakterini ko‘rsatadi.

===

– Tone of voice(ToV) nima uchun kerak?

Brend tanilishi: o‘ziga xos ToV brendni oson yodda qolishiga sabab bo‘ladi

Farqlanish: U seni boshqa sinfdoshlaring (raqobatchilar) orasida ajratib ko‘rsatadi.

Ishonch: Aniq va doimiy ToV brendga bo‘lgan ishonchni oshiradi.

===

Qanday qilib ToV’ni to‘g‘ri  yaratish mumkin?

- O‘quvchilaring(auditoriya)ni o‘rgan: ularning xohishlari, ehtiyojlari va bir-biri bilan gaplashish uslubini tushunib ol.

- Brendingni inson deb tasavvur qil. U qanday xususiyatlarga ega bo‘lishi kerak? Ularni yoz.

- Aynan sening brendingni ToV’ni ko‘rsatuvchi 3-5 ta so‘zni aniqla.

- Sinab ko‘r va rivojlantir: o‘quvchilarning reaksiyasiga qarab ToV’ni moslashtir.

===

Gaplarimni yaxshiroq tushunishing uchun sen bilgan brendlardan misollar:

Google: "Siz izlayotgan narsani aniq va tezroq topishingizda yordam beramiz."

Nike: ”Boshlash uchun chiroyli bo‘lishing shart emas, ammo chiroyli bo‘lish uchun albatta boshlashing kerak. Just Do It."

Coca-Cola: "Coca-Cola va tabassum bilan baham ko‘ring. Baxt sovitilgan holda dasturxonga tortiladi!"

===

Yodimdan chiqibdi, seni matematika bo‘yicha olimpiadada g‘olib bo‘lganing bilan tabriklayman.

- Endi matematikani ham boshqalarga o‘rgatsam bo‘ladimi?

- Yo‘q, men buni tavsiya qilmayman. Sababini esa keyingi suhbatimizda tushuntirib beraman.

#soddamarketing

@maqsadli_mijoz

“Chiroyli sayt tayyorlab berishdi. Lekin sotuv yo‘q”

Ba’zi korxonalarning saytiga kirsangiz, jozibali. Ammo savdosi past.

Bu holatda sayt qay darajada to‘g‘ri ishlab chiqilganini o‘lchash zarur.

Buni hisoblash uchun metrikalar ko‘p. Ulardan biri — Bounce Rate.

Bounce Rate nima?

⭐️ Bounce Rate — veb-saytga kirgan foydalanuvchilar bir sahifaga kirib, boshqa sahifalarga o‘tmasdan saytdan chiqib ketish holatini o‘lchaydigan ko‘rsatkich.

Qanday o‘lchaymiz?

BR = (bir sahifani ko‘rib chiqib ketganlar soni / umumiy tashriflar soni) x 100

Misol:

Bir kunda veb-saytga 1000 ta foydalanuvchi tashrif buyurdi. Ulardan 750 tasi bittagina sahifani ko‘rib, chiqib ketdi.

Bu holatda: (750 / 1000) x 100  = 75 %

Demak, BR — 75%

===

Bu ko‘rsatkich sayt turiga qarab quyidagicha bo‘ladi:

Internet-do‘konlar: 20-45%
Bloglar: 65-90%
Lendinglar: 70-90%

===

Qanday yaxshilash mumkin?

• Sahifalarning yuklanish tezligini oshiring;

• Saytdagi navigatsiyani osonlashtiring;

• E’tiborni jalb qiluvchi CTA’lar va ichki havolalarni qo‘shing;

• Saytni mobil qurilmalarga ham moslang.

🔔 Post foydali bo‘lsa, digital marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

“Direct orqali xabar qoldirdik” deyishadi, shu to‘g‘rimi?

Instagramdagi holat:

- Shu kiyimning narxi qancha?
- Narxini  direct orqali yubordik.
- Nega darrov narxini aytmaysiz?
- Bilmasam, hamma shunday qiladi-ku!

Hozirda Instagramda aksariyat kiyim/texnika/buyum do‘konlarining sahifasiga kirsangiz, shu holatga duch kelasiz.

“Ular mijoz bilan direct orqali individual suhbatlashib, sotishlari ham mumkin-ku” –– deyishingiz mumkin.

Lekin ko‘p holatlarda shunchaki narx yuborishadi, tamom.

===

Nima qilish kerak?

1. Direct orqali mijozga narxni yuborgandan so‘ng, uning xohishlari, istaklari/o‘lchami haqida so‘rab suhbatni davom ettiring. Ya’ni, direct orqali shunchaki narx aytmang. Mijoz bilan suhbatlashing.

2. Agar sizda qiymatini suhbatlashib tushuntirib beradigan mahsulot bo‘lsa, mijozdan raqamini olib, unga qo‘ng‘iroq qiling.

3. Yuqoridagi ikkovi ham sizga mos kelmasa, narxni darrov izohda yoki postda yozib qo‘ying. Bu sizning mijoz va uning vaqtiga bo‘lgan hurmatingizni ko‘rsatadi.

===

Siz qanday fikrdasiz? Javoblaringizni izohlarda qoldiring.

🔔 Post foydali bo‘lsa, uni marketing va savdo sohasidagi do‘stlaringizga ham yuborib qo‘ying.

#shu_togrimi

@maqsadli_mijoz

10 yoshli jiyanimga brend aydentikasi nimaligini qanday tushuntirgan bo‘lar edim?

Avvalgi suhbatimizda senga brend missiyasi nimaligini tushuntirib bergan edim. Endi senga brend aydentikasi haqida gapirib beraman.

Tasavvur qil, maktabda sendan boshqa yana 10 ta sinfdoshing ingliz tilini o‘rgatishni boshladi.

Avvaliga ularning o‘quvchilari kam edi.

Lekin...

Boshqa maktabdan sendan ingliz tilini o‘rganish uchun kelgan bolalar, seni boshqalardan ajrata olishmadi va boshqa sinfdoshlaringning kursiga yozilishdi.

Bu holat qayta takrorlanmasligi va seni boshqalardan oson ajratib olishlari uchun sen o‘z brending uchun aydentika yaratishing kerak.

Aydentika nima?

Brend aydentikasi –– brend bozorda boshqalardan ajralib turish va mijozlar bilan kommunikatsiya qilish uchun foydalanadigan vizual va emotsional elementlar.

Bular: Logotip, tipografika, mijozlar bilan so‘zlashuv uslubi(Tone of Voice), dizayn uslub.

Misol uchun: Pepsi.

Ko‘k rang, qizil, va oq rangdan iborat logotip, reklamalarda o‘ziga xos shriftda yozilgan so‘zlar va albatta “Yanada chanqoq bo‘l” shiorida aks etgan brendning so‘zlashuv uslubi.

Aynan shu elementlar orqali mijozlar seni raqobatchilar orasida oson topa oladilar.

Keyingi safar senga shu elementlardan biri ya’ni brendning so‘zlashish uslubi(Tone of Voice) haqida aytib beraman.

#soddamarketing

@maqsadli_mijoz

“Bizga mahsulotingiz yoqdi” — Hozir buni ham o‘lchaymiz!

Ba’zi kompaniyalarning Instagram sahifasiga kirsak, negativ izohlarni ko‘ramiz.

Ularni o‘qib, “mijozlarga kompaniyaning mahsulot/xizmati umuman yoqmabdi” — degan tasavvur uyg‘onadi.

Aslida, mijozlarning mahsulot/xizmatdan qanchalik qoniqqanini ham raqamlarda ko‘rish mumkin.

Buning uchun CSAT’ni hisoblaymiz.

CSAT nima?

⭐️ CSAT (Customer Satisfaction Score) — xaridorlarning mahsulot/xizmatdan qanchalik qoniqqanini o‘lchaydigan ko‘rsatkich.

Qanday hisoblaymiz?

1. Mijozlarga savol bering: “Mahsulot/xizmatimizdan qanchalik qoniqdingiz? 1 dan 5 gacha shkala bo‘yicha baholang”
Bu yerda: “1-3” — salbiy, “4-5” — ijobiy.

2. Natijani hisoblang:

CSAT = ( Ijobiy javoblar soni / Umumiy javoblar soni ) x 100

Masalan: Siz 50 ta mijozga shu savolni berdingiz. Undan 35 tasi ijobiy javob berdi.

Bu holatda : (35 / 50) x 100 = 70%.

Demak, CSAT — 70%

===

Agar bu ko‘rsatkich:

80% va undan yuqori bo‘lsa — bu juda yaxshi natija. Ya’ni aksariyat mijozlar mahsulot/xizmatdan qoniqqan;

60%-80% bo‘lsa — yaxshi, lekin mahsulot ustida yana ishlash kerakligini ko‘rsatadi;

60% dan past bo‘lsa — ko‘p mijozlar noroziligini va mahsulot/xizmatni to‘liq qaytadan ishlab chiqishni anglatadi.

🔔 Post foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

“Qora PR ham PR” — shu to‘g‘rimi?

Ko‘pchilik marketologlar “Qora PR ham PR”. U ham foyda beradi va undan foydalanish kerak degan fikrni aytishadi.

===

“PR” nima?

PR (Public Relations) –– Kompaniyadagi biror hodisa/holat/yangilik haqida jamiyatga xabar berish.

Misol: Apple iPhone smartfonlarining yangi modellerini sotuvga chiqardi.

PR’da asosan ijobiy voqealar haqida xabar beriladi.

Agar biror ko‘ngilsiz hodisa bo‘lsa, unga kompaniya darhol reaksiya bildirib, hodisa haqida batafsil tushuntirish beradi.     

===

“Qora PR” nima?

Qora PR –– kompaniyada bo‘lgan salbiy voqea haqida atayin/rejalashtirmagan holda xabar tarqatish.

Natijada, xabar tezda tarqalib, kompaniyaning taniqliligi ortishi mumkin.

===

Keys: Arzon narxdagi kiyim sotadigan do‘konlar tarmog‘i egasi xodimlarini kaltaklagan videolari tarqaldi.

Natija: Ko‘plab yangilik saytlari, blogerlar, mashhur insonlar bu haqida gapirishdi. Bundan do‘kon taniqliligi oshdi.

Lekin: Taniqli ≠ sevimli! Mijozlar shunchaki tanilgan brendlardan emas, sevimli brendlardan mahsulot sotib olishadi.

“Qora PR” brendni ommaga tanitishi mumkin. Lekin insonlar ongida u negativ xabar bilan birga joy oladi.

===

💬 Siz ham shu kabi marketingda keng tarqalgan fikr/g‘oyalarni bilasizmi? Ularni izohlarda yozib qoldiring. Eng ko‘p 👍 yig‘gan fikrlar haqida kanalda post yozaman.

🔔 Post foydali bo‘lgan bo‘lsa, uni marketing sohasidagi do‘stlaringizga yuborib qo‘ying.

#shu_togrimi

@maqsadli_mijoz

10 yoshli jiyanimga brend missiyasi nimaligini qanday tushuntirgan bo‘lar edim?

Oldingi safar senga positioning haqida gapirib bergan edim. Bugun senga brend missiyasi nimaligini tushuntirib beraman.

Senga savol: Dadang senga barcha fanlardan chorak baholaring a’lo bo‘lsa, yangi kompyuter olib beraman desalar, nima qilasan?

— A’lo baholar olish uchun zarur bo‘lgan barcha ishni  bajaraman: uyga vazifa, darsdagi faollik, nazorat ishiga tayyorlanish.

Brend ham o‘ziga shunday missiya belgilab oladi va barcha harakatlarni shu asosda amalga oshiradi.

Ya’ni, uning mahsuloti, qadriyatlari, marketing faoliyati  missiyaga mos bo‘ladi.

Kel, sen bilgan brendlardan misol keltiraman:

Nike: "Dunyodagi har bir sportchiga ilhom va yangilik taqdim etish."

Google: "Dunyodagi barcha axborotni yig‘ish hamda uni hamma uchun ochiq va foydali qilish"

Coca-Cola: “Insonlar hayotiga quvonch va ijobiylik olib kirish”

Aynan missiya brendni boshqalardan ajratib turadi va mijozlar uchun qiymat yaratadi.

Kuchli brend qurishning unsurlari ko‘p. Keyingi safar brend aydentikasi haqida aytib beraman.

#soddamarketing

@maqsadli_mijoz

Mijozingiz sizga sodiqmi?

Odatda marketolog yoki biznes egalari mijozlar qayta xaridlarni amalga oshirganda, "Mijozlarimiz bizga sodiq" degan xulosaga kelishadi.

Ammo haqiqatni faqat raqamlardan bilish mumkin.

Ya’ni bunday xulosaga kelishdan oldin mijozlar sodiqlik darajasini o‘lchashingiz kerak.

Buni aniqlash uchun NPS'ni hisoblaysiz.

NPS nima?

⭐️ NPS  (Net Promoter Score) – bu mijozlarning mahsulot yoki xizmatdan qanchalik mamnun ekanligini va boshqalarga tavsiya qilish ehtimolini o‘lchaydigan ko‘rsatkich.

Qanday o‘lchaymiz?

1. Mijozlarga savol bering:

"0 dan 10 gacha shkalada mahsulot/xizmatimizni yaqinlaringizga tavsiya qilish ehtimolingiz qancha?

2. Javoblarni 3 ta kategoriyaga ajrating:

• Promouterlar (9-10): Sizni tavsiya qiladi va sodiq.

• Passivlar (7-8): Qoniqqan, ammo unchalik mamnun emas.

• Detraktorlar (0-6): Brendingizga zarar yetkazishi mumkin.

3. Natijalarni hisoblang: Promouterlar va Detraktorlar foizini toping:

Promouterlar foizi = (Promouterlar soni / Jami javoblar soni) × 100%

Detraktorlar foizi = (Detraktorlar soni / Jami javoblar soni) × 100%

NPS = Promouterlar foizi - Detraktorlar foizi

Natija 30% va undan yuqori bo‘lsa, demak hammasi joyida.

===

Masalan: Siz 100 ta mijozga shu savolni berdingiz va natija shunday bo‘ldi:

• Promouterlar: 60 ta
• Passivlar: 20 ta
• Detraktorlar: 20 ta

Promouterlar foizi = (60 / 100) × 100% = 60%

Detraktorlar foizi = (20 / 100) × 100% = 20%

NPS: 60% - 20% = 40%

===

🔔 Post foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

Foydasiz va odatiy savollardan qoching

Vaziyat: Texnika yoki kiyim xaridi uchun do‘konga kirdingiz. Mahsulotni tomosha qilib turibsiz. Sotuvchi sizga shu savollarni beradi:

— Keling, nima xizmat?
— Nima izlayotgan edingiz?
— Sizga qanday yordam bera olaman?

Bu savollarga ko‘p holatda shunday javob beramiz:

— Shunchaki tomosha qilib turibman — deysiz va do‘kondan chiqib ketasiz.

Yoki ba’zi sotuvchilar mijoz do‘konga kirganda, o‘zi gapirmaguncha uning oldiga borishmaydi. Yakun esa yana bir xil.

===

Nima qilish mumkin?

Mijoz kirib, mahsulotni tomosha qilayotgan bo‘lsa, shunday savol bering:

— Assalomu alaykum. Do‘konimizdan oldin biror narsa xarid qilganmisiz? Yoki bu birinchi martami?

Agar mijoz “Yo‘q” deb javob bersa, “Bizda yangi mijozlar uchun maxsus taklifimiz bor” — deb suhbatni davom ettirasiz.

Agar “Ha” desa, “Do‘konimizda doimiy mijozlar uchun maxsus aksiyamiz bor” — deb undan so‘ng ehtiyojlarni o‘rganasiz.

===

Sinab ko‘ring: Bugun do‘koningizga kelgan 5 ta xaridorga “Sizga qanday yordam bera olaman?” va 5 tasiga “Siz avval do‘konimizda bo‘lganmisiz?” — deb so‘rang.

Natijalarni izohlarda yozib qo‘yarsiz.

💬 Yana qanday sotuv texnikalarini bilasiz? Izohlarda yozib qoldiring.

#kuzatuv

@maqsadli_mijoz