بسم الله الرحمن الرحيم

#ثگيل
[ بين الفرات وزمزم ]

بين الفرات وزمزم اتخيَّل
دار الحجي وسولفوا بالمقتل

عرضوا احداث ومواقف
والعِطَش غَطّه السوالف
_

زمزم بِده يسولف ويعتب زعلان
كَال اجت هاجَر وبكَلب حايّر جان
تِحمِل اسماعيل بدليله اللّهفان
جَوّا نبعت وشَرَب ما ظَل عطشان

بس انته خلّيت السبط ظامي
ويصيح شربة مَيّة لايتامي

تفطّرت منّه الشفايف
والعطش غطّه السوالف
_

رَد الفُرات وظَل يسولف للبير
يا بير ما أنكرلك آنه التقصير
بس آنه جنت مطوّق بجيش جبير
والموقف اكبر مِن عِذر لو تبرير

بلا راس لكن همّه كَطعوني
خيل وزلم وكَفت عله متوني

وآنه مِن تقصيري خايّف
والعِطَش غطّه السوالف
_

رجَّع جواب البير يا نهر البين
شيفيد حجيك هذا مِن طاح حسين
راح احجي كلمة ورايدك تسمع زين
كِلّك ذنب مِن هامتك للرجلين

لو انته عاشكَ صدكَ مِن كَلبك
تصنع معاجز خاطر يشربك

العاشكَ يضحّي ويجازف
والعِطَش غطّه السوالف
___

كَال الفرات وصوته مخنوكَ بهاي
يا زمزم آنه عاشكَ حسين اهواي
بس هوّه اجاني وما شرب منّي الماي
بساعتها حيل تظايكَت مِن دنياي

ظلّيت حاير واشعِر بخنكَة
جي ماكو قطرة وصلت لحلكَه

ريت ذيج اللّحظة ناشف
والعِطَش غطّه السوالف
_

زمزم خِتَم هذا الحوار بإصرار
يا نهر ما تنفع بَعَد هالأعذار
لا ظامي أنته مروّي ، لا خامد نار
بس ماي كَصة حسين يسوه الأنهار

ما اريد أسمع بَعَد أي كلمة
ليهسّه تجري ومات ابو اليمّة

ذنبك يعثّر مظايّف
والعِطَش غطّه السوالف


الحمد لله والشكر والفضل والمنّة
بركات الكفيل سلام الله عليه
[ هَذَا مِنْ فَضْلِ رَبِّي ]
#رزقهم_سلام_الله_عليهم
حيدر الموسّوي