Проблема самоназвы
Доброго здōрōвлїчка! Маву дяку поговорити за єден из основных арґументӯв, якый хōчнувут люди обы обезцїнити право русинӯв на самобытнӯсть тай окремышнӯсть: ож слово "Русин" є просто "стара самоназва Украйинцїв".
Треба детайлно проникати чом сись арґумент є слабым по пунктам:
1. "Словяны -- просто стара самоназва Украйинцїв"
Треба рōзуміти, ож днишня карта народӯв тай етнікумӯв ни є стабілна тай ни была сяка фурт. Исе динамічна структура, котра ся из часом читаво міняла. Словяни были великōв ґрупōв доста ичнакых етнікумӯв, кōтрї ся помежи сōбōв зливали туй, тай рōздїляли ся на нōві там. Єдні етнікумы пропадали, другі взникали. Исе є нормална історична динаміка. Мы ни можеме упōівісти ож "Анты вто просто стара назывка Украйинцїв", бо тото были домак другі люди, ни тоты, што живут днись.
2. "кидь мы ся май давно кликали Русинами, а типирь Украйинцями, тай вы мусите"
Ньит, ни мусиме. Туй иде про самоє сакралноє право чилядника - выбирати. Ниє біды в тōму кидь чилядник сам, свойив вōльōв, свойим выбором рїшив упōвісти ож "я бӯлше ни Русин, я типирь Украйиниць", вто є нормалный процес. Айбо так само нормално має быти кидь чилядник упōвість "я Русин, но ни Украйиниць, ни рахуву ся дарабчиком того народа".
Біда туй ся стала якраз в час ōкупації сōюзом, коли выд люди забрали дōкументы тай переписали вшыткых на Украйинцїв ни звідавучи ся йих. Исе є злочин проти прав чилядника. Сись злочин ся убстане на сōвісти сōюза.
3. "Багато українців і зараз кажуть, що вони русини, а отже - ми один народ"
Тоже ньит. Істōрія знає много прикладӯв, коли рӯзні народы мали єднакі, авадь дуже пōдōбні самоназвы, при тōму нич йим ни мішат ся называти тай рōзуміти окремыми.
- Словакы тай Словены фактічно усокотили стару самоназву "словяны", айбо нитко спозад того ни каже, ож вни сут помежи сōбōв єден народ. Нитко ни каже такі нисмыслы ги "мы ся тоже май давно кликали словянами, значит Словакы из нами єден народ", исе тоталный абсурд.
- Румыны - фактічно ся кличут за Римлянами. Айбо кидь вам упōвість датко "сись сирохман Румын", та ци пōдумаєте си ож вӯн житель Рима? Но тай я си так думаву.
- Ромы - ни ид Румынам, ни ид Римлянам нич ни мавут, айбо самоназва ся збігла так само низавистло. Типирь вни стали из Римлянами єдным народом? А из Румынами?
- Істōрія каже нам ож в Карпатах жила чилядь, котрых кликали Бойками щи в часы первого розселеня словянськых племен. Мы дуже мало знаєме иппен за тых Бōйкӯв што жили тоды. Єдно што можеме упōісти, ож Бойкы днишні, вто сут домак другі люди, даже кидь мавут єднаку самоназву. Бо у вшыткых історичных дōкументах часу Русї Бойкы ся протиставляли Русинам тай ниґда ся в тоты часы из Русинами на асōційовали.
3. "Украйинцї уже сут Русинами, вы ся типирь мусите кликати Карпаторусинами кидь так"
Ньит, ни мусиме. Фактічно из днишньых Укрйинцїв мало тко тямит таку істōрію, а кидь айно, та ай так запервоє ся буде кликати Украйинцьом, а ни Русином. Та ци маву я хосновати тōту придавку "Карпато-" кидь самоє слово "Русин" нитко другый ни хōснує кроме нас на днишньый динь?
Тоды ци мōжу я ся кликати Русином, дачим окремым выд Украйинцїв, самобытным? Мōжу. Ци маву я ся вшыткых кругом звідати ци "мож" ми сяк учинити? Ньит, ни мав бым. Чилядник має право выбирати як себе видїти у сьōму світови, кого раховати єдным народом из сōбōв, а кого ньит. Бо єдным народом щи терба _стати_, исе ся по крови ни передасть.
Буду радый, кидь ми напишете што си за исе думаєте.
