Next Episode, Please!

🐧 "Pingvin" Ozzning ko'tarilishi

#serial

"Pingvin" seriali DC Comics nashrining shu nomdagi personaji haqida suratga olingan serial. Osvald (Ozz) Kobblpot — Betmen dunyosidagi, ya'ni Gotham Citydagi eng yovuz personajlardan biri. Unga "Pingvin" laqabini — uning bir oyog'ida nuqsoni bo'lgani uchun pingvinlarga o'xshab yurishi sababli berishgan.

U Gothamning eng qoloq, "getto" hududida katta bo'lgan. Bolaligida go'yoki unda nimagadir erishish uchun hech qanday imkoniyat yo'qdek edi... Lekin oddiy bolakay asta-sekin "monstr"ga aylana boradi va vaqti kelib shaharning katta "figura"siga aylanadi. "Я создал монстра" degan mashhur ibora bor-ku, bu serialda o'sha "monstr"ni uning onasi yaratadi.

O'zi so'nggi paytlarda yovuz obrazlarni har tomondan ko'rsatib, unga nisbatan hamdardlik va simpatiya hissini uyg'otish serial va kinolarda ko'p qo'llaniladigan usul bo'lib qoldi. O'sha eski zamonlardagidek, personajlarni faqat bir tomonlama, faqat yovuz va faqat yaxshi obraz sifatida ko'rsatish endi zerikarli. Va bunday yondashuv endi hech kimni qiziqtirmaydi. (Garchi o'zimiznikilar buni hali ham davom ettirishayotgan bo'lishsa-da).

Shu jihatdan bu serialda ham obrazlar juda zo'r ochib berilgan. Bu yerda nafaqat bosh qahramonning, umuman barcha obrazlarning transformatsiyasini ko'rish mumkin.

Serial vizual tomondan ham puxta ishlangan, Gotham Cityning atmosferasini shunday his qilib o'tirasiz. Asosiy personaj rolini ijro etgan Kolin Farrelning grimchilari esa aktyorni mutlaqo boshqa insonga aylantirishgan, qoyil qolmasdan iloj yo'q.

Umuman olganda, serialni maqtashga arziydigan jihatlar ko'p. Bularni uzoq sanash mumkin. Lekin vazifam sifatida bu serial kimlarga yoqishini ham aytib o'tishim kerak. Shaxsan menga, mafiya va gansterlar haqidagi filmlarni sevib tomosha qiladigan inson sifatida bu serial juda yoqdi. Serial shuningdek Betmen va Joker haqidagi filmlarga, ularning dunyosi tasvirlangan asarlarga qiziqadigan insonlarga yoqadi.

📺 Bu serialni men shu tematikadagi boshqa shedevr seriallar orasiga qo'shib qo'yaman: "Boardwalk Empire" ("Подпольная империя"), "The Sopranos" ("Клан Сопрано"), "Taboo" ("Табу" [2017], asosiy rolni Tom Hardi o'ynagan), "Peaky Blinders" ("Острые козырьки").

Men uchun "Pingvin" — kriminal yo'nalishidagi yilning eng zo'r seriali.

➡️Please!

Aytgancha, men aytayotgan kino va seriallarni qayerdan ko'rish borasida o'ylanayotgan bo'lsangiz, bitta "lifehack" o'rgataman.

Payme ilovasi borku, shunda bilsangiz yig'ilgan ballarni promokodlarga almashtirsa bo'ladi. O'sha joyda ballaringizni TVCOM dan 30 kunlik promokodga almashtirasiz. Keyin ilovani ko'chirib olib (men TVga ko'chirganman, mobil versiyasi ham bor), bemalol yangi film va seriallarni tomosha qilaverasiz.

Hech qanday reklamalarsiz. "Piratskiy" saytdan ko'ryapman deb vijdoningizam qiynalmaydi. Foydalaninglar!)

Reklama emas, tavsiya. Qaniydi reklama uchun to'lashsa))

➡️Please!

Hozirda mana shu serialni ko'rayapman. Aytishim joizki, Kolin Farrel o'z rolini yorvorgan. Grim sababli boshida hatto tanimadim ham. Ozz rolida u chiqqanini keyin, serialda kimlar o'ynaganini ko'rgach bildim.

Ko'rib tugatgach, serial haqida o'z fikrlarimni batafsil yozaman. Lekin hali boshlamagan bo'lsangiz, tavsiya qilaman.

➡️Please!

"Trap" — manyakni tutish uchun qopqon
("Ловушка")

#kino

2024-yilda chiqqan filmlar orasida eng oxirgi ko'rganlarimni xotirlay boshlaganimda, mana shu film birinchi bo'lib xayolimga keldi.

Menga Nayt Shyamalanning filmlari doim yoqqan. Shuning uchun ham bu filmni tomosha qilishga qaror qilgandim. Film qiziqarli, boshidan oxirigacha sizni hayajonda ushlab turadi. O'zi bu rejissyorni barcha kinolari shunaqa. Shuning uchun, agar uning ijodi bilan tanish bo'lmasangiz, haliyam kech emas. Ayniqsa 'The Sixth Sense' ("Oltinchi hissiyot"), 'Split', 'Old' filmlaridan boshlashni tavsiya qilaman.

'Trap' filmi Shyamalanning shedevrlari orasiga kira oladimi yo'qmi, bir narsa deya olmayman. Lekin kinoda uning uslubi sezilib turadi. Menimcha, bir marta bo'lsa ham ko'rish kerak. Ayniqsa agar siz trillerlarni yoqtirsangiz, qahramonlar bilan birga havotirlanish hissi sizga begona bo'lmasa — bu film sizga yoqadi.

Ushbu filmda sevimli aktyorlarimdan biri Josh Xartnett asosiy rolni ijro etgan. Menga u rol o'ynagan 'Lucky Number Slevin' ("Счастливое число Слевина") filmi yoqqandi.

Postlarni shu filmdan boshlaganim va uni maqtaganim uchun darrov xulosa qilmanglar. Men juda rang-barang janrlar va tematikalardagi kinolarni ko'raman. Vaqt sayin hali barchasini ko'rib chiqamiz.

Bu filmni rafiqam bilan birga tomosha qilgandik va unga bunday filmlar juda yoqadi. Aslida o'zi kino bo'yicha qiziqishlarimiz kesishadigan kamsonli janr va tematika ham shu. Trillerlarni (jangari emas, aynan triller, bu ikkala yo'nalishni ko'pchilik adashtiradi) juda yaxshi ko'ramiz.

Shuning uchunmi, bu filmni juftingiz bilan bemalol tomosha qilishingiz mumkin. Menimcha qiziq taassurotlar olasizlar. Agar bir o'zingiz ko'rsangiz ham hechqisi yo'q. Hech narsa o'zgarmaydi — baribir tavsiya qilaman.

➡️Please!

Barchaga salom!

Mening ismim Nazarbek. Ehtimol, siz meni Bookerberg blogi orqali tanirsiz. Shu vaqtgacha asosan kitoblar haqida yozib kelar edim. Endi filmlar, multfilmlar va seriallar haqida ham blog ochishga, bu borada o'z fikrlarimni, topilmalarimni ulashib borishga qaror qildim.

Seriallar ko'rishni yoqtirganim va asosan yangi mavsumini boshqa kunga qoldirmasdan ko'rib tashlashim sababli, blog uchun yuqoridagi nom tanlandi. Aniqrog'i, bu bir nechta variantlardan biri edi — kitoblar haqidagi blogimda uyushtirilgan so'rovnomada mana shu nom eng ko'p ovoz to'pladi. "Maqsadga o'ting, please!"

Xo'sh, bu blogni qanday o'qish kerak?

Agar sizni ko'proq seriallar qiziqtirsa, bu mavzudagi barcha postlarni #serial xeshtegi orqali topasiz

Filmlar haqidagi postlar #kino; multfilmlar haqidagilari esa #multfilm xeshtegi bilan belgilanadi. (Kim ham o'ylabdi deysiz!)

Bundan tashqari, blogda muallif versiyasi bo'yicha toplar berib boriladi — #TOP.

Ora-sirada treylerlarni kanda qilmaymiz — ularni #treyler xeshtegi orqali topasiz. Kino olamidagi qiziq, muhim yangiliklar ham bo'lib qolishi mumkin — buni #news deb belgilaymiz.

Kelgusida blog doirasida yana qandaydir rubrikalar yo'lga qo'ysam, ularning xeshtegini ham albatta shu postga qo'shib qo'yaman.

Yangi blogimga xush kelibsiz, do'stim. Film va seriallar bo'yicha didlarimiz teskari kelib qolmaydi deb umid qilaman.

➡️Please!