ياهو اليروح الكربله ياخذني وياه
مابيه امشي الوحدي ولابيه انساه
ياهو التهمه احوالي
ياخذني يم الغالي
مابيه انساه
…….
الليل بجاني ودمعتي ترست العين
غربه ومن الشام ازورن گبر الحسين
طگت الروح اعله شوفه وگلبي نصين
ياهو اليوصلني يمهم والكي الثنين
مشتاگه اشمن حظرته وهناك الكاه
مابيه امشي الوحدي ولابيه انساه
ياهو اليفرح بالي
ياخذني يم الغالي
مابيه انساه
…… .
ياهو ياخذني واشوفه عگلي محتار
وادخل الحظره مثل ماتجي الزوار
جنه من ادخل ضريحه والبعد نار
شخلت ابگلبي الليالي المره تذكار
لمن اطبله بيادمع اشرحله فركاه
مابيه امشي الوحدي ولابيه انساه
طاري الحزن يحلالي
ياخذني يم الغالي
مابيه انساه
… .
مدري ياصوره اضمله بعيني هواي
ذكرياته شكد عزيزه وعاشت اوياي
هالنذر ماظن اعوفه وگلبي وفاي
من اطب الصحنه اوزع بيدي الماي
محظره ثواب من الدمع يتوزع هنا
مابيه امشي الوحدي ولابيه انساه
الرايد حزن ينعالي
ياخذني يم الغالي
مابيه انساه
………
كبرت بعيني المسافه والدمع طاح
متانيه العباس يرجع من وكت راح
ماتعودت امشي وحدي وليلي اشباح
بلكت يوديني يمه خاطر ارتاح
ياخذني بيده كافلي لو مره انخاه
مابيه امشي الوحدي ولابيه انساه
هسه يگوم اگبالي
ياخذني يم الغالي
مابيه انساه
…… ..
گبل لا تسمع رقيه وتحجي وتلوم
وتنفض اتراب المگابر خاطر اتگوم
تريد هم تمشي تزوره طيره وتحوم
بلجي ينطيها تراجي وصفطة هدوم
ضلت يتيمه امحسره هم مثلي تهواه
مابيه امشي الوحدي ولابيه انساه
الگلبه حزن يبرالي
ياخذني يم الغالي
مابيه انساه
…… ..
بالظريح انصب عزيه ونجمع الكون
والگي جون والگي عابس باليلطمون
كون اعيش ابليله وحده وي اليخدمون
حته انطيهم ثواب ادموع العيون
ياهو اليدور اخره وطلكها دنياه
مابيه امشي الوحدي ولابيه انساه
اليجبر كسر دلالي
ياخذني يم الغالي
…… ..
علي الحاج الصبيحاوي