Asoosama gabaabaa Ililliifi Sabboonaa
Kutaa 3ffaa
Sabboonaan tole, bade, osoo hin jedhiin waasila isaa, Obbo Buttaa biraa gara manaa deebi’e.
Haati Sabboonaa, Aadde Naatoliin Sabboonaa ‘suuqitti’ waan ergiteef eegaa jirti. Inni garuu jechi waasila isaa Obbo Buttaatiin machaa’ee waan ergameef dagachuun gara manaatti harka duwwaa harmeesaa Aadde Naatoliitti deebi’e.
Sabboonaan “Waasilli koo maaf akkas jedhe? ……. Barbaadetii laata?... moo maal yaadeti? … waay’een bareedina ishee hin himamuu silaa maaf ishee jibba?...dhugaa qaba... lakki …lakkii.. anumaaf yaadeti malee badaafi miti…. Yoo jaalalaan qabame barnootasaa gatta jedhee yaadeti.” Jedhee of jajjabeesse.
Abbaan Hurruumee Obbo Buttaan garuu guyyaa sanaaf sammuunsaa boqonnaa hin arganne. Akkasumaan afarfamaa oole. Duraanuu dubbii barbaadaa har’a akka biraa ta’aa oole. Sababa tokko malee sa’aatii 5:27 irraa kaasee hanga sa’aatii 9:09 tti, dargagoota naannoo sana jiraatan nama saddeet akka mana hidhaa( qoraasuma dhiiraa) galan taasise.
Hurrumeen itala isaati; Ishee Qananiirraa dhalche. Qananiin mana daadhii urgaansaa fagoodhaa siyaamu, daandii mana warra Sabboonaa harka bitaatti gatee gara biroo Tajaajila Ifaa Magalaa Fiichee nama geessu qarqaraa qabdi.
Daadhiin Aadde Qananii maqaa qaba. Guyyaa Sanbata xiqqaa namoonni Baadiyyaa naannawaa Magaalaa Fiichee jiraatan, inni dhadhaa qabu dhadhaa isaa, inni Qamadii qabu Qamadiisaa, inni ‘Baaqilaa’ qabu Baaqilaasaa, inni xaafii qabu xaafiisaa, inni burtukaana qabu burtukaanasaa, inni loomii qabu loomiisaa, inni Hoolota qabu Hoolaasaa, ……. Gariin immoo meeshaalee mana keessaa kan harka namaatiin hojjetaman kanneen akka ‘Masoobii’( meeshaa bideen keessa olkaawwamu) ‘leemmatii’ keessattuu waqtiilee cidhaatti, walumaa galatti inni bituu barbaade bituuf maallaqasaa qabatee, inni gurgurachuu barbaade gurguruuf waan qabu qabatee gabaa Sanbata xiqqaa (ቂዳሜ ጋበሃ)tti erga dhimmaa isaanii xummuratanii booda mana daadhii Aadde Qananii kana dhaquun daadhiisaanii unachaa guyyaa boqonnaasaanii akka ajaa’ibaatti kan dabarsan mana daadhii Aadde Qanannii kanatti.
Obbo Buttaanis daadhiirraa fagaatee hin ta’uuf. Bariitee sa’aatii afur booda mana daadhii kana isa hin dhabdu. Kanaafi kan haadha Hurrumeetiin walbaree Hurrumee godhate.
Guyyaa sana erga nama saddeet sababa qabatamaa tokko malee hiisisee booda, mana daadhi Aadde Qananii dhaqee, daadhiisaa akka waan bishaan lagaa kaffaltii tokko malee waraabameetti dhundhulchaa oole. Sa’aatii 11:25 irratti Obbo Buttaa ta’ee kan seene, halkan keessaa sa’aatii 5:00tti nama biraa ta’ee bahe. Hanga mana obboleessa isaa, abbaa Sabboonaa gahutti bakka hedduutti kukkufaature. Akkuma achi gaheen “ Tulluu…. Yee Tulluu….. ba ..ba..ba..bani balbala ” jechaa balbala Obbo Tulluu akka malee rurrukutuu eegale.
Akka carraa ta’ee guyyaa sanaaf abbaan Sabboonaa Obbo Tulluun dhimma hojiitiif magaalaa guddittii Mootummaa Naannoo Oromiyaa, Finfinneetti imalaniiru. Sababa kanaaf hoo haati Sabboonaa yeroon yoo rafanillee Sabboonaan garuu qayyabachaa jira.
© Abboomaa Ijaaraatiin
Oromiyaa, Harargee lafa jaalalaarraa💓💓💓
