في ذِكر من أذكار الصباح و المساء فيه كمية معاني تغيرية جدًا لو قولتها بفِهم كل يوم هيفرق معاك بإذن الله :

" اللهم إني أسألك خير ما في هذا اليوم فتحَه و نصرَه و نورَه و بركَته و هداه "

( فتحهُ ) :

ممكن يكون الغلق في يومي مش غلق أبواب بس، أو غلق سكك كنت همشي فيها، ممكن يكون الغلق غلق في نفسك أنت ! تحس نفسك مقفول كده، فـ أنت محتاج فتح، ربنا يفتح قلبك و نفسك، و يفتح لك كل باب، و يفتح لك قلوب الناس، محتاج فتحه في كل تفصيله في يومك.

( نصرهُ ) :

في معارك في يومك صغيرة محتاج فيها نصر، و من ضمنها " مبادئك " لأن من أعظم أنواع النصر إنك تثبت على مبادئك مفيش أي حاجة تخليك تتنازل عنها، أنت محتاج نصرهُ في حاجة حد مستينك تنهزم فيها، محتاج نصرهُ إنك تتعب في الحاجه و تطلع حاجة تشرف،
محتاج النصر بكل أشكاله .

( نوره ) :

بعض الأمور هيكون فيها ضلمة، هتبقى محتاج نور، نور تشوف بيه صح، محتاج النور كمان اللي ممكن يجيلك في شكل كلمة تسمعها، آية تقرأها كأنك بتقرأها لأول مرة فـ تنورلك فكرة في دماغك، محتاج النور قبل ما تاخد خطوة مُعينة فـ ربنا ينورك بإنه يوريك " ما خفي عليك " .

( بركته ) :

بعض الأحوال هتحس بقلة بركة كده، محتاج بركة في الوقت ( يعني اللي تعمله في كام يوم تخلصه في ساعات ) بركة في الصحة ( تعمل مجهود كبير في وقت قليل)، بركة في الفلوس ( تكفيك و تفيض )، البركة بتخلي أي حاجة معاك تزيد من غير ما تزودها .

( هداه ) :

قرار واحد غلط ممكن تدفع تمنه سنين من عمرك، أنت محتاج الهداية إنك تقرأ الدنيا صح، و إنك تمشي في الطريق ( المناسب ليك) و إن ربنا يهديك نتشوف كل حاجة على حقيقتها مش بزينتها .

--

الذكِر ده لكل المغاليق .. و المواجهات .. استعن بالله ولا تعجز .♥️

مني محسن