خادمة الحسين:
يا زمن -- كلشي انتهى من ودعت كفيلي
يا زمن -- غربة كبر يوم الرحل خليلي
يازمن
///////////
اليعيش ابلا فرح يلجم جروحه
التروح احبابه راحت منه روحه
مبين المهضوم من اهات نوحه
شرد اسولف والعمر جثه اعله لوحه

يافرح -- بعد الاهل اني الصرت وحيده
يافرح -- للي ترك فوك الثرى عضيده

/////////////
جمعة الاحباب فرحة كل مسيه
وانه نيران الخيم مستعره بيه
لو حظنت اطفال اخوتي ابين اديه
بيهم انظر كل مصاب الغاضريه

والدمع -- يشرح عذابي وونتي ونحيبي
والدمع -- اخر حجي ضل ابأثر حبيبي
--
///////////
اليودع غالي تذبح ذكرياته
وكل طعم مايبقه لسنينه وحياته
العايش ومر الهجر يشحط لهاته
كل صباح وكل مسه ايتاني مماته

والاجل -- اصعب سهم من دنيتي ابدليلي
والاجل -- حان ابارض جانت سبب لويلي
///////////
اليلوم ادموعي ماحس بالبواجي
ولاكبال اعيونه مسلوبه التراجي
هوه لو شايف جسم حلو المحاجي
كل كتر منه عله التربان راجي

كل جرح -- من كربله بيه ترك علامه
كل جرح -- اهون علي من ونت اليتامه
/////////////
المايضوك المر فلا يعرف مراره
مو حزين الماغفه ودمعه ايتجاره
التشب روحه اعله وجهه تشوف ناره
المو بديها الكيد شلها وي اليساره

انهظم -- لو عاينت كيد الاسه اباديه
انهظم -- اكثر لان ماحانت المنيه

أحمد عيسى البديري
خادمة الحسين: