البشر لحسين لو خادم يموت وهوه ما نادم
يا محله الاسم لويسبكه خادم الزهره
لو ينطونه شمس بيمنته وباليسره كمره
لا يعوف الخدامه
..................................................
بسم حسين كل خادم يشد حيله
غير حسين ما عدنه وسيلــــــه
حياتك لو فنت روح اعتنيلـــــه
يحضر شدتك والهم يشيلـــــــه
العمر لو بي بعد رجعه أعيش السبعه والتسعه
عاشور الشهر لو صح دهر يوميه عشره
لو ينطونه شمس بيمنته وباليسره كمـــره
لا يعوف الخدامه
.........................................................
اليتنفس عشك يشتم هوه الملكـــــه
الما عايش جرح ما يعرف الفركـه
حسين اول جسد شمس العلي تشبكه
واجب خدمته وبابه تجي ادكـــــــــه
عرش بلقيس عد بابه كعد يشتم هوه اترابه
الخادم ملك بعز وشرف يدخل الحضره
لو ينطونه شمس بيمنته وباليسره كمره
لا يعوف الخدامه
.....................................................
العمر لو ينشره جان اشتريتــــه
هوه الخدمه حرز بنفاسي شديتـه
الخليل بلايه خله مكبره بيتــــــه
حب حسين كل خادم ملك ريتــه
الخدم لحسين عن فكره يعيش العِبره والعبره
ومن صلب الصلب ما نــــــــنسه ذكره
لو ينطونه شمس بيمنته وباليسره كمره
لا يعوف الخدامه
................................................
الخدم كل الخدم لحسين معروفه
واحدهم أمير بخدمته تشوفــــــه
اذا عباس لجله كطع اجفوفــــــه
بيت الله خدمته وطلسم احروفــه
ربيع الخدمه عد موتك تشوف الجنه تابوتك
وحسين اول عشك من تختنك كلبك يجبره
لو ينطونه شمس بيمنته وباليسره كمـــــره
لا يعوف الخدامه
.........................................................
شهر رمضان ربك يأمر تصومــــه
وايام الشهر شكم عشره مقسومــــه
ثلث تيام جسم حسين بالحومــــــــه
كل عشره اعله عشره هاي معلومه
اليصوم الماي لو يثغب لجل حسين ما يشرب
وكل لحضه التمر من العمر عالزهره اجره
لو ينطونه شمس بيمنته وباليسره كمـــــــره
لا يعوف الخدامه
.....................................
خادم خدمة الحسين
الشاعر
محمد الموالي