Бозорчилардан мурожаат!
Бугун Уйчи туманидаги «Деҳқон бозори»га бориб кўздан кечирдик. Бозор янгиланяпти, ишлар жадал. Бизнинг қамровимиз фақатгина қурилиш объекти эмас, бозор ходимлари, тадбиркорлар ва харидорлар бўлгани учун «Савдогар» кўчасининг орқа томонига кўчиб ўтган вақтинчалик бозорга юзландик. У ерда юзга яқин савдогарлар ҳалол меҳнат қилишяпти. Аммо эски бозор олдида йўл четига раста очиб олган тадбиркорларни(агар шундай дейиш мумкин бўлса) тушунмадик. Тушунмаганимиз, улар ҳеч кимга бўйсунмас эканлар. Бир марталик кунлик тушумни тўлашни ҳам, орқа томондаги эл улус савдогарларга қўшилишни ҳам истамас эканлар. Содда тилда айтадиган бўлсак, йўл бўйидагилар, сув бўйида турган бўлсалар, улардан ўтиб борган харидорларгагина орқа томондаги савдогарлар хизмат кўрсатишмоқда. Бозор назоратчиларининг айтишича, ўша орқадагилар 2 минг сўмдан 5 минг сўмгача ўзлари рози бўлиб, кунлик тўлов берар эканлар. Аслида ҳозирча муайян ҳудуди бўлмаган бозорга тўлов йиғиш ҳам яхши эмасу, аммо бозор ва унинг ходимларини ҳам ўзига яраша харажатлари бор. Аммо бир кунга 2 мингдан 5 минг сўмгача пул ҳам унчалик катта маблағ эмас. Хуллас ҳозирча ҳамма рози, муроса яхшида барибир...
Озгина кўнглимизни хира қилгани, бизга кўп тадбиркорлар иссиқда қийналаётгандек туюлди. Уларнинг кўпи янги бозорга ўрнашолмай қолишдан қўрқиб фойда кўрмасада, ҳар куни растасини очаётгандек туюлди. Ҳар бир тадбиркор тезроқ шароити яхши янги бозорга ўтиб, ойлик шартномаси-ю, кунлик тўловларни тўлиқ тўлаб давлатга фойда келтиргиси келиб кетаётгандек туюлди. Янги бозор ишга тушса, назоратчилар ҳозиргидек минг хижолат билан эмас, очиқ юз билан ўз ишларини давом эттиргилари келаётгандек туюлди...
Ҳозир бу иссиқда «Енгил маҳсулотлар айниб қолмаяпти, ҳўл мевалар қуриб қолмаяпти» деганимизда ҳам, қишли қировли кунлар олдинда турибди ҳали...
Шулардан келиб чиқиб биз вилоят, шаҳар ва туман раҳбарларидан ҳудудда ўзбошимчалик билан йўл устига чиқиб олган савдогарларни тартибга солишда, қолаверса қурилиши давом этаётган янги бозорнинг тезроқ битказилиб, халққа топширилишида амалий ёрдам сўраймиз. Мустақиллик байрами арафасида янги бозор ишга туширилса, бу кўпчиликнинг дуосига ва барчамизнинг қувончимизга сабаб бўларди.
Ушбу мурожаатимизни эътиборсиз қолдирмайсиз деган умиддамиз...
«Бозорлар ва савдо комплекслари фаолиятини мувофиқлаштириш» уюшмасининг ахборот хизмати.Уюшма матбуот хизматининг расмий канали👇
http://T.me/axborotuyushma