БАЙРОҚ — ҒУРУР, ЭРК ВА ОЗОДЛИК РАМЗИ
Бугунги кунда мамлакатимизнинг турли ҳудудларини кезар экансиз олис туманлар марказларида ҳам миллий байроғимиз қад кўтариб турганига ва унга атаб муҳташам майдонлар ташкил этилганига гувоҳ бўласиз. Шубҳасиз, қалбида ватан туйғуси бор инсон ҳилпираган байроққа назар ташлар экан, қалбида албатта ғурур туяди. Боиси эрк ва озодлик рамзи бўлган байроқ бизга ҳамиша ўтмишнинг оғир кунлари ва бугунги фаровон ҳаётимизни эслатиб туради.
Давлатимиз суверенитетининг рамзларидан бири – мустақил Ўзбекистон Республикасининг “Давлат байроғи тўғрисида”ги қонуни қабул қилинганлигига бугун 29 йил тўлди. Ўзбекистон Республикаси Олий Кенгашининг 1991 йил 18 ноябрдаги навбатдан ташқари VII сессиясида тасдиқланган Давлат байроғи – мамлакат давлат суверенитетининг рамзи ҳисобланиб, у ер юзининг шу сарҳадларида мустақил Ўзбекистон давлати борлигини англатади ва ўзида миллий-маданий анъаналаримизни мужассамлаштиради.
Миллий туғимизнинг давлат идора ва муассасалари, ўқув юртлари, Ўзбекистон аъзо бўлган халқаро ташкилотлар, чет эллардаги элчихона ва доимий ваколатхоналаримиз пештоқида ҳилпираб туриши, турли байрам ва тантаналарда, мамлакатимиз вакиллари қатнашаётган халқаро миқёсдаги сиёсий, маданий-маърифий тадбирларда, нуфузли спорт мусобақаларида Ватанимизнинг шаъни, халқимизнинг ғурурини ёрқин акс эттириши барчамизга ифтихор бахш этади. Масалан, халқаро спорт беллашувларида ғалаба қозонган спортчиларимиз шарафига юртимиз байроғи баланд кўтарилган лаҳзада ҳар биримиз чексиз ҳаяжон ҳис қиламиз.
Тарихдан маълумки, миллий рамзлар ор-номус, шон-шараф саналган. Шайх Нажмиддин Кубронинг жасоратини тарихдан яхши биламиз. Ҳамон бу буюк қаҳрамонлик тилдан тушмайди, ҳанузгача халқимизни ватанпарварликка, қаҳрамонликка чорлайди. Юрт байроғини ёв қўлига топширишни истамаган Нажмиддин Кубро уни қўлида маҳкам тутганча жон берган эди. Душман ҳарчанд уринмасин, унинг қўлидан байроқни тортиб ололмай, охири панжалари билан кесиб олади. Туғини жонидан ортиқ асраган Тўмарис, Спитамен, Муқанна, Темур Малик, Амир Темур, Жалолиддин Мангуберди каби ўнлаб саркардалар ҳаёти ҳам бугун авлодларимизга катта ибрат.
Аслида Ватан байроғини кўзга суртиш, уни тўтиё қилиш биз учун ҳам фарз ҳам қарз. Фурсатдан фойдаланиб, 18 ноябрь — давлатимиз рамзи — муқаддас байроқ қабул қилинган сана муносабати билан халқимизни самимий қутлайман. Мустақил давлатимиз байроғи мангу тинч ва осойишта, озод ҳамда эркин ҳаётимиз разми бўлиб қолсин! Унинг муқаддаслиги, юрт манфаати ҳар недан устунлиги ҳамиша қалбларимизда мутаҳкам муҳрлансин!
Азиз СУВОНОВ,
Халқ депутатлари Навоий вилояти Кенгаши депутати.
👇👇👇
http://t.me/aziz_aslanovich