خيري الصفراني

يأهـل الـهواشم نومه ..
وأم الخـدر مهضـومه ..
إن چان ماتدرون بيهه ..
أم عـون طرت حومه ..

طلـعـت تدور اعليكم ..
وانتـم عـدل ما بيكم ..
بالهيمه عـثـرت زينب ..
هذا الحچي يچويكم ..

نسوان طلعت وين شيمتكم
كلـش ثگـيله اعلوم غيـرتكم
لا حيل عدهه أم عون لا رأي
وانگلبت الدنيه اعله اخيتكم

+++++ـ

مكسوره حيل وخاطر ..
ابزينب اشسوه العاشر ..
لحسين بالطف صاحت ..
شو وخّـر امـن الحـافر ..

الخـيـل فـوگــك دارت ..
شالت اعضامك شالت ..
واتـراب صدرك صـاير ..
جــارت الدنيه ومـالت ..

ويلي اعلشيخ الدنيه والكسره
طشت الخيل اضلوع ويـعطره 
قـــربــان لله حـسين مــذبـوح
اطهر بشـر مطــروح والــزهـره

+++++ـ

عباس وينك صاحت ..
للحـوم زينـب راحت ..
وتـريــد شـوفـة عينه ..
اتريد اخوها اشتاگت ..

هـاي الـهزل جابـوهه ..
وناس الغرب يحدوهه ..
فشله اعلزينب تركض ..
ويـن الأهــل يحموهه ..

عباس شيردهه الاجــت غـاره
وما ضلت اعله أم الخدر چـاره
تــدرون لــو محـد دره اشـصار
كل واحد اعله الخيمه شب ناره

+++++ـ

صـارت رمـاد الخيمه ..
جا وين راعي الشيمه ..
يگـعـد يلـحـگ اعلينه ..
مـو گـلبي ورمّ ضـيمه ..

يأهل الـرحم حاچوني ..
اشلون الزجر يسبوني ..
جـا ويــن عـزّ اخواني ..
ؤنيــت مــا غــاثـونـي ..

چا وين راعي الحيل چا وينه
دارت راحاهه الدنيه وامشينه
مــرونـه يمــكم والــوجــع نـار
محـد نشـدني وحــرك وايمينه

+++++ـ

- خيري الصفراني ✍️

#لسان_حال_الخدام اللذين لايتمكنون هذا العام من الذهاب لمولاتي زينب ع بسبب الأوضاع .. 💔



الـعـام گـوه ودعـيـناهـه ومشينه
العام مدري شلون مامتنه ابچينه
ابـاب زينب مـن تشابگنه بجروح
العوده گلنه نرجع وبس ما اجينه

مـكسـوره خـدامچ ..
گطعوا درب شامچ .. 
ما حـرگوا اخـيامچ .. حرگوا گلبنه
حـرمـونـه يا زينب ..
وبينه الگلب شيّب ..
واعله الصور ينحب .. والشوگ اخذنه

غـريبه رجـعـتي يبت حيدره
رجعتي گعدتي ابضلامچ تره
نصيح اويه أبوفاضل المعذره

++++++ـ

اشلون هذا العام ما نوصل وطنهه
ندري هسه امتانيه وفارغ صحنهه
لا أهــل لا خــــادم أتـعـنــه يـــزور
هضمه هـاي و زيدت ؤنهه وحزنهه

هاي السنه اگبالچ ..
مـا نشـتم اتـرابچ ..
وما نحتمي ابابچ .. هاي المصيبه
بالحسره ضلينه ..
ويـاهـو اليودينه ..
يم عون اعذرينه ..  اه ياغريبه

السنه يبچي بابچ علينه اشكثر
بــدون الـزيـاره اشـيفيد العمر
اعلحسرة مقامچ يطول الكسر

++++++ـ

بــاب زينب ينتظر ويـن الـيجـونه
زينب ابهاي هالسنه ماعدهه عونه
ياهو اليساعدهه من تبچي وتنوح
فـوگ مـا يتـعب گـلبـهه ايتـعبـونه

عالـگـبه مكـتـوبه
متـعـوبه متعـوبه
مو چنتي مهيوبه .. صرتي سبيه
جمره الدمع صاير ..
راجعـلــچ العاشر ..
مدري شنو الكاسر .. منج خطيه

عله الؤن فلا يلگه عونه الگلب
لان يـم مقـامج يـزينب حرب
يعين الله گلبچ مصايب يصب

++++++ـ

أن شاءالله اتعدي محنتچ ياغريبه
ونـرجـع اردود ونعينـچ عالـمصيبه
و لابد ابهــاي هالسنه زايــر يجيج
صح بعيدين احنه بس بينه النهيبه

يالـحــره نــدعيـلچ
ابعون الله وابحيلچ
جـم خـادم ايجيلـچ .. عنه ابنيابه
يحچيهه جـمــرتنـه ..
مـنـعـوهـه لـمــتـنه ..
تــدريهـه كــسرتـنه .. يالبل خرابه

اعلجمرة دمعنه اشتياگ وحزن
يسـولــف گلبنه ابزيـاره ويـحن
فــلا يهــده سـاعه يـزيـنب يؤن

++++++ـ

- خيري الصفراني ✍️

#چنت_أكول..


راح أموت ..
ياهـو اليشيل النعش ويّفزع إخوتي
راح أموت ..
ومـاكو واحد محتـرگ ويهمه موتي
راح أموت ..
أشكي من الأمي واتشيّب شـكوتي

ليـلي مـو مثـل اليـمركم ليلي لـيل
يهلي مامش عافيه وماعندي حيل
حـتـه بحـلامي گطـعـتوا بيه ليش 
يهلي مكسوره تره وحـملـي ثـگيل

عگب افياكم ماكو افياي
عگب الخوّه ما ضل رأي
خلصت بس الروح تگول
شـالـع گـلبي الماي الماي

======ـ

چنت اگول ..
العدهه سبع أخوان دوم اتضل أميره
چنت اگول ..
انه عـلــويـه وحلـم مـاصـير أسـيـره
چنت اگول ..
العاش عمره ابعزه مايصفه اعلحيره

تـالـي ضلـيت الـغـريبه المـالي رأي 
انه مـو دون الخـلگ يكتـلني مــاي
شنسه مـن ايامي من عشت ابدلال
ما يســويهه الـزمن وتــردلـي هـاي

مشــتـاگه انـه الــذيـچ أيـام
ما چنت اعــرف بيـهه الشام
أمشي ابرأيي وعندي اخوان
واگـعـد أميـره ابنص اخيـام

======ـ

كافي ضيم ..
والله من يوم اهدعش ما مستراحه
كافي ضيم ..
راح يـوگـف گـلبي مـن كثـر النياحه
كافي ضيم ..
اتحملت والله اشكثر غربه وجراحه

ذبلت اوراق العمر واجروحي نار
المـا اريده ايصير گوه اعليه صار
والله شيبتني البـواچي اتعـذبيت
جرحي مثل ادموعي يخواني حار

كافي اجروح وكافي اهموم
خل ارتـاحــن لــو بـس يوم
يلچم كلشي الــروح اهواي
ولا مــر اعله عيـونـي النوم

======ـ

كلشي راح ..
وكلهه تدري افراك ابو سكينه الكتلني
كلشي راح ..
وهــذا آخـر يـوم بي يـوجعـني متني
كلشي راح ..
عمري يگضي وللأزل مايگضي حزني

ياتراب اليدفن جروحي وتطيب
وانه بالـغــربه ولا يمـي الحبيب
الشام ما يرحم گلب والهمّ چبير
مدري شيريده بعد والله عجيب

وكتي ابلا رحمه امن ايدور
ماخـذ كــل أهلي ابـعـاشور
اتغرب عمري ابگــاع الشام
گـلبي اليمته ايضل مكسور

======ـ

- خيري الصفراني ✍️

مهضومه وبعيده
زينـب يا وحيده
الهاضمهه العدو ..

متغربه ابمدينه
كلش مو حنينه
وتريدلهه أخو ..

من عنهه گالوا هذي السبيه
صارت تمـوت ابكل مغـربيه
عذبهه زينب چـف العبيد

مرهونه وسفه ابيد النياحه
والحيله رايح ما يلگه راحه
أه يا وكتهه منهه اشتريد

وين الغيور اليرضه ابهاي
زينـب تــدور عــن حماي
مو مره وحده ولا مرتين
تكسر گلبهه الغربه اهواي

~ـ

بت حيدر حزنهه
نيشـان ابصحنهه
ما يخفه الجرح ..

والشام المصيبه
ما يرحم غريبه
ذابحهه ذبح ..

اباب العقيله الخوف اشعلاته
ردت عليهه النــاس الشـمـاته
جا يمته يخلص ضيم الشام

ميته الغـريبه ومـا مستراحه
حرگوا گلبهه وينزف جراحه
هالمره حرگوا موش اخيام

ردت هضيمه الــوليـة ناس
ماعدها غيره ولاكو احساس
فنـه التمرجل يمهه ام عـون
لو يمهه اخوهه ايطب عباس

~ـ

ويلي استوحدوهه
چي مو يم اخوهه
زينب بالغرب ..

مجروحه وتـعـاني
وللـخـادم تــتـانـي
ومكسورة گلب ..

بـابـج يـزينب ويـن اليجونه
يل عالبواچي محتاجه عونه
تعــبانه زينـب مـن الــؤنين

محتاجه ندري عطر امناخوتچ
ما يهده گلبج حته اويه موتچ
صوتچ ينادي وينك حُسين

زينب تــتـاني جـيـت نـاس
البيــهم عـطـر مــن الـعباس
تحسب ليــالي ومحـد جاي
وسفه ابوضعهه محد حاس

~ـ

نــادوچ الغياره
سهليهه الزياره
يم عون السنه ..

نتــمنه نـــزورچ
ويلمنه احنه نورچ
ماردنه الهنّه ..

بحيلچ يزينب نحيي الزياره
احنه النتاني مـوعـد غيـاره
هاي السنه والله اعله النار

يخت أبو فاضل لازم نجيلچ
وفقينه فـدوه زينب دخيلچ
بيـدچ نــشوفه صـار القرار

لازم نـــزورچ هــذا الــعــام
عيــنــچ يزيــنب عالخــدام
موعـــدنا هــذا ومـــا ننساه
خلي ابمأملنه ايتاني الشـام

~ـ

- خيري الصفراني ✍️

#لأم_البنين


يا لذتْ الرحَمه .. واحَزاميّ بالخدمه
يمّ البنين أعمه .. كـــل الجــفــاكم
يالحَره وفـقيـني .. خلينْي بحَسيٓني
ذايب واهلّ عيني .. وامشي بگفاكم

مولاتــي .. يا دُرت الزَهـرا
مولاتــي .. ربينْي عالـويلآه
مولاتــي .. لحسيني كل الآه

رزقيـني يـم الاربعـه بنـظـراته
خليني ابدي وانتهي ابحسراته
كلما تجرني الـدنيه يا مـولاتي
يالحره زيدي اعله گلب لچماته

-------------------ـ

يم الفضل عيني .. عبدچ احسبيني
عالـخدمه ربيني .. هــاي أمنـياتي
دنيـا وتـفر بيه .. وابخـاطـري أمنيه
مـوتي ابحسينيه .. تخلص حياتي

مولاتــي .. ربيَني اريدْ أرباچ
مولاتــي .. ما خَايب الينخاچ
مولاتــي .. خليني اشيّل الواچ

تسهيل امري لو ذكرتْ افضالچ
يــمّ البنَين و احنــه دوم ابـالـچ
شمعة مَجالسنه وذكرنه الـدايـم
سـوّلفنه بيـچ وننحـني الافعـالچ

-------------------ـ

ضايع وانقذيني .. متفرهده سنيني
يالحره عينيني .. هـالـدنيه غـربه
يالزودج اهوايه .. ثبتيني عالـغـايه
چف ارفع ورآيه .. للضامي گلـبه

مولاتــي .. هَالدنيه رمشت عينْ
مولاتــي .. خَليهه بس لحسينْ
مولاتــي .. يـَم عَتبـتـج مـسكين

ضعتْ بمتاهات العُمر يوميه
حـايـر أروح ليَـا كتـر مـا بيـه
گالولي انخه أم الگمر واتعـنه
كل حاجه تگضيهه وعلي البدويه

-------------------ـ

يـمّ الضوه الأربـع .. ولدربچ انه اتبعْ
هذا الجفن يدمع .. لابـن الــزجيه
كل ليلي وانهاري .. كون الدمع جاري
للمنذبح عَاري .. فـوگ الـوطيه

مولاتــي .. بالطمه اريد الروحْ
مولاتــي .. محترگه عالمذبوحْ
مولاتــي .. دايــمْ اريـده النـوح

منْ الصغر هَاي المجآلس بيتي
وامن ابتعد تتلاشه كل عافيتي
عَلميني عالؤن والجزع عَلميني
انه الكُـبر مــن هالـمــأتم صيتي



-------------------ـ

- خيري الصفراني ✍️

#كلام_مولاتي زينب ع



مـو كـافي نـار وضيم وأحـزان
ما عنده نيّه ايعـوفني الـدخان
صوت الحرب والموت مسموع
عـدكـم علـمّ بالحـال يالــوليان

وين ايروح .. گلبي تعب
هـذا الشام .. كلشي نهب
نار او موت .. بيـه عتـب
مو كافي ياعذاب ..
ما مليـت .. كافي صحت
شنهو اتريد .. وانه متت
انه ام عون .. تدري تعبت
وماخذني التراب ..

صوت الحرب يمي : وأسمع اصياحه
عــدكـم عـلّـم ميته : ومــا مستراحه
الشـام الاخذ حيلي : خـلصـوني منه
صـارتـلـي نيـشاني : الغــربه ذبــاحه

++++++ـ

متعـوبه والمتعوب ضميه اهــواي
مليت مـن هالحــال شنـهـو الـرأي
ياهو اليوديني اعله اخوي حسين
رد الخــطر والــغــربه هـاي احذاي

أبچي اهواي .. محد سمع
ذاك الـضـيم .. يهلي رجع
اشكي الحال .. للمايجون
وين اليحامي وين ..
صـــار لــيل .. خوف والم
رد الــچــان .. حارگ خيم
لا حــمــاي .. لا أي عــلـم
ومشتـاگله للحنين ..

مـحــد دره اشحــالي .. محد اليدري
ومـن ينــكسر ظهري .. ينكسر صبري
ابين الـهـضـم وسفه .. اهلي عافوني
ابنص الغـرب ذابل .. يا وسف عمري

++++++ـ

عـذرينـه لو گطعـوا دربنه اعليچ
ريته اعله بيتي الصار هذا البيچ
اسملله اعله گلبچ يالعقيله انگول
بعده الزمـن يم عون هـم يـاذيچ 

خاف العـام .. محد يجي
يم أم عـون .. ماكو بچي
صعبه هواي .. يابت علي
حالچ كسرنه حيل ..
ماكو ادموع .. يم الصحن
ماكو عيون .. يمـج بچـن
واويــــلاه .. مـن المـحن
خله الضهيره ليل ..

هـاي الـسـنه اگـبـالـچ .. لا تــتـانيـنه
گعـطــوا درب شامـچ .. يمه عذرينه
الهـم والهــجر يـاذيي .. ابكل مسيتنه
ابعــيد الــدرب زينب .. صاير اعلينه

++++++ـ

- خيري الصفراني ✍️

يا گلب سولف جروحك
هسه ويـن تـريد روحك
تبچي يم شباچ زينب عالمصيبه
بلـكـت ايسويـهه بختك
وتوگـف ابطولك دمعتك
العايش الغربه صعب يخفت نحيبه
منـتـظـر هــاي الــزيـاره
حلمـك اتـلاگـي المنـاره
وتصرخ ابحـرگه وهضم اه يا غريبه
يمه زينـب يمتـه اجيلچ
خـايف واصرخ دخـيـلج
گلـبي يخفـگ والــدمع يمـچ طبيبه

هنيال الي يروحون .. بشام الغرب يبچون
ويگابلون أم عـون .. يم باب الاخضر يوگف

هذا انه مـثل العـام .. ومـا راح ازور الـشـام
يا گلبـي عالهمّ نــام .. والچم جروحك سولف

غريبه .. غريبه .. غريبه
++++++ـ

يا گـلب طـال انتظـارك
وما رحمّ بيك انكسارك
اعله الزياره شگد تحّن كل مغربيه
يـمـتـه زيـنــب تلـتـقيهه
ابكل مسيـتك تـرتجـيهه
يـمـه هــاي أيــامچ وعــينـچ علـيه
تصـرخ ويـاهـو اليسمعك
عالصور ضل يجري دمعك
ما وصـل يم زينـب وگـالـوا خـطيه
يمه زيـنـب ماهي سهله
روحي ما حاسبهه عدله
ماتـت امن الشوگ والهمّ والــرزيه

حـار الـدمع بالشوگ .. يمچ دموعي اتلوگ
يمه الگلب محـروگ .. وضل ينظـر توميله

ضل ابتعب وأحـزان .. هـذا الگـلب غـرگان
ويمه اشكـثـر ذبـلان .. يا زينب ابلا حيله

غريبه .. غريبه .. غريبه
++++++ـ

ياگلب ضل ابچي وانحب
الهسه مـا مـرتـاحه زينب
الهسه دخــان وحـرب يمهه الغريبه
ميـته والخـوف ابكـترهه
ونعـجـز انـوصف صبرهه
ابغربه ضلت يا گلب هــاي الحـبيبه
الخـايـف اتأمنه ابصحنهه
زيــنـب الـما كــف حـزنهه
كـل وكـت تـنـعـاد يـم زينب مصيبه
الــعـاشر الـمـا خله بـيـهه
ايسـير ابـكـل لحضه ليهه
ابغـربه والكـافل بعـد ليهه اشيجيبه

شيجيبه چا حاميچ  .. كلش بعيد اعليچ
نـدري البعد ياذيـچ .. والغربه كلش صعبه

زيـنـب ولـوهه الناس .. ويـن الگمـر عباس
احضرهه يابو احساس .. خلصهه من غربه

غريبه .. غريبه .. غريبه
++++++ـ

زيـنب اتـقـاسي الـمصيبه
والأســم صـــار الـغـريبـه
اتـحـول ابيوم السبوهه والله زحمه
استوحدوهه ابلايه اخوهه
شــيـبــوهـه وركـضـــوهه 
وهيه بالخمسين زينب هاذي هضمه
والله دنيـه وبـيــهه دارت
خــلـت المـهـيبوبه حـارت
تشـكي الـمن والــذبح ما خـلـه زلمه
يا گلب تدري ابجرحهه
زيـنـب الـعـاشر ذبــحهه
وراحـت ابنص غربه واتنادي ييمه

اتصيح بالدمع وبآه .. يا يـمـه يالــزهـراء
متني اشـكـثر أذاه .. السوط انطبع بيه

اخذيني يمچ كـون .. انه الغريبه ام عــون
ذبلانه مني اعيون .. شوفي اشجره اعليه

غريبه .. غريبه .. غريبه
++++++ـ

- خيري الصفراني ✍️

اهتـزت ريشتة العباس عالمهره
وجه الگاع صارت بالردم صفره
ما ينـرش واره المـاي كلما صال
ما ينخاف عالكافل صعب گدره

يِخطف ارواح .. ويكسر ظهر التماده
يرجهه الـگـاع .. يسحگ شارب القاده
فحل معروف .. صلّ وهـيــبة الـساده

ياعباس .. ياعباس
~~ـ٢
جـاء امن الخيم والكـل شرد عنه
لـيـث امـن السُـلاله اليـنحـذر منه
عباس الزلم تحسبله الف احساب
ولاگــاهـه الجـيـوش الـمـا يلاگنه

وگلبهه اصياح .. وارگـاب الـزلم طـارت
وامخلي الناس .. بس برواحهه احتارت
يـمــيل الــكـون .. شـائت يمنتك شـائت

ياعباس .. ياعباس
~~ـ٣
الكـافــل من لگـدهه اتبسم الشوفه
وامجاد الولي انعادت عله اجفوفه
ما تگضي الحرب طباهه ابن حيدر
تـرهب عينه گد ما تـرهب احروفه

أٓمـان اخـيـام .. أسمك يا گمر هاشم
شرار احروب .. طبعـك حـيّر الـوادم
يظهر حسين .. واگف بالحرب صارم

ياعباس .. ياعباس
~~ـ٤
اأول بالاخـوّه ايصـيـر بـس عـبـاس
كل عقل ابجماله ايحيـر يـا هالـناس
ابـن الـفـــارس الهيـجاء مــا گـدروه
يمطر چفه رحمه وخير عطر وياس

يابو الريشات ..  يا بدر الـخـيم هيبه
وانته العباس .. والحگ چفك ايجيبه
علـيـك الـرأي .. طــالـع من زلــم نيبه

ياعباس .. ياعباس
~~ـ٥
تـعــب أم الـبنيـن الـبـيّــن ابحـيـله 
خالسهه الــزلم كلهـه اعله الكـحيله
صوفر عالمغاره الخوف من الرهبان
وعالـهـامـات رنّ اسيــوف وادخيله

شهـم ما هـاب .. هـذا اربات بدويه
وچـبير الگـوم .. وناسه اتأمن ابفيّه
تصيح الـنـاس .. هذا الاخته علويه

ياعباس ياعباس
~~ـ

- خيري الصفراني ✍️