Huquq Labaratoriyasi

BUNDAY INSONLARNI MEN IKKI TOIFAGA AJRATAMAN


Biz o'z hayotimizda ba'zi paytlarda shunday odamlarga duch kelamizki, ular o'tmishda ancha katta hayot qiyinchiliklari (xususan moliyaviy) ni boshidan o'tkazib yenga olgan hamda hozirgi vaqtda barcha ishlari "besh" ketayotgan odamlardir.

Men shunday insonlarni, xuddi o'zi kabi qiyinchilik ostida yashayotgan boshqa insonga nisbatan munosabatiga qarab ularni ikki toifaga ajrataman.

1-toifa. Bu insonlar odatda o'zining hozirda atrofidagi qaysidir o'zi bilgan biror tanishining xuddi o'zining o'tmishidagi qiyinchilik ostida qolganini, misol uchun moliyaviy muammolar girdobida qolib ketayotganini ko'radida, bu odamga juda katta yordam berishni istamaydi va "men ham xuddi shu insondagi paytimda ancha qiynalganman, bu qiyinchiliklarga chidab, o'zim mustaqil shu hozirgi hayot tarzimga erishganman, demak bu insonga ham hozir yordam bersam, u balki mendek irodali odam bo'lib kelajakda shakllana olmas, balki u mening bunday yordamimga ishonib qolib, o'zining maqsadi tomon harakat qilishni esidan chiqarib qo'yishi mumkin", degan ishonch bo'ladi.


2-toifa. Bu insonlar esa, o'zining atrofidagi xuddi o'zidek qiyinchilik ostida yashayotgan boshqa insonga nisbatan iloji boricha ko'proq yordam bergisi keladi va "men ham bir paytlar xuddi shu insondek qiynalib yurgan paytim menga hech kim yordam bermadi, menga yordam qo'lini cho'zadigan odamim bo'lmadi, ammo bu odamning oldida men xuddi shunday odam bo'lishim mumkin, unga ancha yordam berib, kelajakdagi erishmoqchi bo'lgan maqsadlariga yetisha olishi uchun unga dastak bo'lishim mumkin" degan ishonch bo'ladi.

➖➖➖➖➖➖
Umuman olganda, yuqoridagi ikkala toifa insonning ham o'z qarashini hurmat qilaman, ikkala holatda ham o'z afzalligi va kamchilik tomonlari bor albatta. Lekin menga ko'proq 2-toifadagi insonning qarashi ko'proq yoqadi.

Chunki agar ahamiyat bersak, o'zimizning atrofimizdagi ba'zi yomon insonlar ham, tug'ilishidan yomon odam bo'lib tug'ilib qolmagan, ko'pincha ularni shunday holatga shu qiyinchiliklar tushirib qo'ygan bo'ladi. Qiyin paytlarda ularni hech kim eshitmagani, yordam kerak paytida negadir hech kimdan yordam qo'li cho'zilmagani ularni hayotga, odamlarga nisbatan nafrat hissi bilan yashashga o'rgatib qo'yadi.

Shu sababli ham, menimcha "o'z muammosini o'sha insonning faqat o'zi mustaqil hal qilishi kerak, o'shanda u kelajakda irodali inson bo'lib shakllanadi" degan fikrni har kimga ham qo'llash to'g'ri bo'lmaydi deb o'ylayman.

KREDIT-MODUL TIZIMIGA O'TMOQCHI BO'LSAK, BUTUNLAY O'TAYLIK UNDA

Hammaga ma'lumki, hozirgi vaqtda O'zbekistondagi barcha Oliy ta'lim muassasalarining ta'lim jarayonlarini xalqaro standartlarga moslashtirish - ta'limning kredit-modul tizimiga o'tkazishlik bo'yicha katta tashabbuslar qilinib kelinmoqda.

Shu qatori Toshkent davlat yuridik universitetida ham bu borada ancha istiqbolli ishlar amalga oshirildi, shuningdek hozirda ham amalga oshirilyapti. Yaqin kunlardagi bunday istiqbolli ishlardan biri bu - universitet fanlarining oraliq imtihonlarini sekin-sekin to'liq yozma tarzdagi imtihon dasturiga o'tkazish, talabaning fandagi qaysidir mavzu bo'yicha o'zining ilmiy-tahliliy yozma ishini amalga oshirish talabi kiritilganidir.

⚠️ Endilikda, talaba universitetdagi seminar darslarda xohlasa qatnashib borishi, xohlasa darsga tayyorgarlik ko'rib kelishini ba'zi ustozlar aytib o'tishmoqda. Lekin bu tashabbusning ham bir qancha yomon jihatlari borligi meni havotirga solyapti.

Jumladan, ular baralla aytishayotgan "endi xohlasang universitet seminar darslariga kelgin, baribir darsdagi ishtiroking ball uchun hech qanday ahamiyatga ega emas" mazmunidagi gapga biz amal qila olishimiz uchun, talabaning darsda qatnashmaganligi statistikasini qilib borishlik (nb qo'yib borishlik) amaliyotini bekor qilib berishlari kerak bo'ladida. Bizda baribir ular aytgandek, xohlagan paytimiz darsga kelmasligimiz, darsga umuman o'qib tayyorlanib bormasligimiz uchun NB degan katta to'siq borda. Shu NB uchun biz ba'zida, biz uchun keraksiz fanlarning ma'ruzasiga, seminar darslariga vaqt ajratib borishga, o'z fanini yaxshi o'ta olmaydigan ba'zi o'qituvchining ma'ruzasini eshitishga majburmiz.

❗️Shuningdek, ular aytgandek imtihonning faqat yozma tarzda bo'lishi, talabalarning halollik fazilati darajasiga ham zid kelib qolishi mumkin.

Aytaylik, bunda istalgan puli bor talaba, o'zining imtihon ishini boshqa a'lochiroq talabaga yozdirib, uni bu xizmati uchun yaxshigina pul bilan "rozi qilishi mumkin". Qarabsizki, bu o'z-o'zidan imtihon ballarining adolatliligi, talabaning bilimiga mutanosibligi prinsiplariga qattiq zarba bo'ladi.

❗️Shuningdek, agar haqqatan, talaba bilimining katta qismini o'zi mustaqil tarzda o'zlashtirib rivojlantirsa, unda nega biz universitetda pul to'lab darslarda o'qiyapmiz? Keling, unda o'quv yili boshida sentyabrda hamma talabani universitetga o'qishga chaqirmasdan, hammani qo'liga kitobni berib o'z uyiga jo'natib yuborsinda, keyin semestr oxirida hammadan imtihon olishsin, shu haqiqiy mustaqil ta'lim bo'ladimi shunda?

OLMA MEVASINING INSON UCHUN FOYDALI JIHATLARI

Umuman olganda, olmada inson organizmi uchun zarur bo'lgan juda ham foydali moddalar jamlangan hisoblanadi. Misol uchun, olmada mavjud C va V vitaminlari insonning barcha a’zolarida modda almashinuvini yaxshilashga yordam beradi. R va E vitaminlari esa inson organizmini yoshartirib, teri va to'qimalar holatini tiklaydi.

➖Olma tarkibidagi pektin esa organizmdan ortiqcha xolesterinni chiqarib yuborishga ko'maklashadi, shuningdek bu modda yuz terisining tarang va tiniq bo'lishini ta’minlaydi.

➖Bundan tashqari, miyadagi zo'riqishlar, kayfiyatni xira qilib turadigan o'y-xayollarni unutishda ham olmaning yordamiga tayanish mumkin. Buning uchun yotoqxonadagi deraza tokchasiga xushboy hidli olmadan 1-2 tasini terib qo'yish kifoya hisoblanadi.

➖Bu mevani xush ko'ruvchilar odatda, aqlli insonlar bo'lishadi (shu qatori men ham olmani yaxshi ko'raman😁). Chunki bu meva qon-tomirlardagi qon harakatini maromiga keltirib, parishonxotirlik, miya horg'inligiga qarshi kurashadi.

Manba


(bu ma’lumotlar nega berildi deb hayron bo`lmang, hozir Korzinkada olmaga katta aksiya ketyapti ekan, shunga imkon borida siz ham olvoling deyapmiz😄)

#Ustoz Ip Mandan 5-tavsiya


"Ey, Pakaxontes qizim!

Sen ham mana ancha katta qiz bo'lib qolibsan, yaqinda kelganimda qo'linga qovunni po'chog'ini ushlavolib yugurib yurgan qizcha eding. Endi ba'zi narsalarni yaxshilab eshitib olgin.

Jamoat transportida ketayotganingda, ayniqsa metroga chiqayotib anavi uzun qilib yoyib olgan sochlaringa ozgina e'tiborli bo'lishni o'rgangin. Chunki odam tiqilinch payti metroda ketilayotganda, shabada esib sening anavi yoyib olgan sochlaring tolalarini yoningda sen bilan ketayotgan odamning yuziga tegishidan xushyor bo'lgin, u odamni bundan achchig'i chiqayotgan bo'lishi, ichida sening bu holating uchun senga bitta yaxshi "rahmat" aytib qo'yishlikni o'ylayotgan bo'lishi mumkin.

Ayniqsa, metro ichida ketayotganda shabada esgan payti sening sochlaring atrofga yoyilsayu, yoningda turgan odam shu payti uyqusi kelib esnayotgan bo'lsa...😏 tamom u odamni endi qaytib uyqusi kelmay qoladi, esnaganiga ham pushaymon bo'ladi.

Keyin yana bir gap, metroda odam ancha tiqilinch bo'lgan payti, ozgina sabr qilishni o'rgangin, bu to'lib qolgan metroni o'tkazib yuborib, yana boshqa sal bo'shrog'i kelishini kutgin, "haa men bemalol sig'ib olaman shu joyga" deb metro ichida turgan 50 ta odamni orasiga 51-odam bo'lib eshik tagiga turtilib kirib olib, uydan sepib chiqqan atiring hididan hammani bahramand qilib ketishingni hech hojati yo'q.

Qizim Pakaxontes! Yana bir bor yuqoridagi maslahatlarimni o'ylab ko'rgin, agar bu maslahatlarga rioya qilish qo'lingdan kelmasa, yaxshisi, metroga chiqmaginda, ozgina cho'ntakka zarar qilib taksida ketavergin".

NEGA BU GAPNI ODDIY HOLATDEK QABUL QILYAPMIZ?

Biz hozirda yashab kelayotgan ushbu jamiyatning tarkibiy qismini ikki toifaga mansub odamlar tashkil qilib keladi. Bular erkaklar va ayollar yoki o'g'il bolalar hamda qiz bolalardir. Ammo odamzotning mana shu ikki toifasidan boshqa uchinchi ko'rinishi ham paydo bo'lishi - bu jamiyatning muqarrar tanazzuliga sabab bo'ladi. Bizga faqat yuqoridagi ikkitasi yetadi, uchinchisi aslo kerak emas.

Ko'pchiligimiz yoshligimizda ham, hozir ham, hattoki kelgusida ham qulog'imizga chalinadigan, ko'zimiz tushadigan holatlardan biri bu - qiz bolalarning biroz o'g'il bolasifat toifasidir.

Ko'plab mashhur insonlar, xususan shou-biznes ayol vakillari, ayol blogerlarning intervyularida o'zlarining yoshlik hayot tarzlari, hozirgi harakterlari haqida gapirishi chog'ida, "to'g'risi, men qiz bola bo'lsam ham, yoshlikdan o'g'il bolalar bilan birga o'ynab o'sganman, harakterim biroz o'g'il bollarnikiga o'xshaydi. O'zim ham hozir qizlar bilan emas, balki ko'proq o'g'il bola do'stlarim bilan gapimiz yaxshiroq chiqishadi" mazmunidagi gaplarini eshitib qolamiz.

Shuningdek, ba'zi o'smir yoshidagi qiz tomonidan qandaydir nojo'ya harakat sodir bo'lsa, bu haqida uning ota-onasiga shikoyat qilinayotganda ham, ota-onaning "haa endi aybga buyurmaysiz, qizimiz sal erkakshoda qiz, yoshligida o'g'il bolalar bilan o'sib katta bo'lgan" mazmunidagi javob bilan bu vaziyatdan osongina chiqib ketganiga guvohi bo'lamiz.


❗️Endi e'tibor bering, bunday o'g'il bola tabiatli qizlar haqidagi gaplar nega bizning kundalik hayotimizga shunchaki oddiy gapdek kirib kelmoqda? Nega biz bunday o'g'il bolasifat qizni ko'rganimizda yoki u haqida eshitganimizda undan seskanmayapmiz, bunday qizdan achchiqlanmayapmiz? Balki biz qiz bolaning bunday toifasini hech qanday qarshiliksiz o'zimizning hayotimizga kiritib yuborishga tayyormizdir?

Keling shunday toifadagi qizning teskarisini o'ylab ko'raylik: qiz bolasifat o'g'il bola.
Menimcha, siz bunday o'g'il bolani qabul qilish u yoqda tursin, bunday o'g'il bolani ko'chada ko'rib qolsangiz, narigi ko'chadan aylanib o'tsangiz kerak.

⚠️ Nega unda biz biroz erkakshoda qiz bolani xuddi oddiy hayot haqiqatidek qarshiliksiz qabul qilyapmizku, ammo qiz bola tabiatli o'g'il bolani qabul qila olmayapmiz? Qizsifat o'gil bola jamiyatda qanday hijolatli holat bo'lsa, o'gilsifat qiz bola ham shunday bo'lishi kerak emasmi?

@huquqlabaratoriyasi

Bugun kechki soat 20:00 va 21:00ga ikkita ajoyib post tayyorlayapman, nasib bo'lsa tashlayman.

Ustoz Ip Man bu safar qabila sardorining qizi Pakaxontesni oldiga tashrif buyurmoqchikan😁

Iloji bo'lsa, ushbu kanalni boshqa hamfikr tanishlar, kursdoshlarga ham tavsiya qilib yuboraylik😊

Hafta davomida e'lon qilingan foydali postlar:


O'zbekiston mehnat qonunchiligida xodimlarning ish tashlash huquqi mavjudmi?

Chet el fuqarolarining O'zbekistonda vizasiz rejimda yurish muddatlari qancha?

"APELLATSIYA" to'g'ri yozilganmi yoki "APELLYATSIYA" mi?

KINO TAVSIYA

INBAZAR asoschisining video murojaatiga

Nega McDonald's o'zbekistonda mavjud emas?

"Iztopar" xorij serialidagi foydali iqtiboslar

OLTIN HECH QACHON ZANGLAMAS

Ustoz Ip Mandan 1-tavsiya

KINO TAVSIYA

#nozikmavzu

Ustoz Ip Mandan 2-tavsiya

Shunday holatlar ham ancha ko'payib ketdi

Har bir dars soati uchun talaba qancha kontrakt puli to'laydi?

Ustoz Ip Mandan 3-tavsiya

O'zbekistonda o'z jinsini o'zgartirish taqiqlanganmi?

ME'YORNI USHLASH JUDA MUHIM

NIMA DEB O'YLAYSIZ? (nozik mavzuning davomi)

Ustoz Ip Mandan 4-tavsiya

#Ustoz Ip Mandan 4-tavsiya.


"Ey Bryus Li shogird!

Telefondan foydalanish odoblariga rioya qilish doimo esingda tursin. Misol uchun biror kafeda yoki metro,avtobusda ketayotganda, telefoningda ovozini baland qilib olib Instagram, Tik Tokdagi be'mani videolarni ko'rib ketishni bas qilgin. Ozgina anavi bo'yningni tepasidagi tana a'zoyingni ishlatishga harakat qilib ko'rsang, yoningdagi boshqa insonlar qandaydir o'zining ish-yumushidan charchab turganini, hozir ularga tinchlik kerakligini, sening Instagram Tik Tok videolaringdan chiqayotgan ovoz-shovqinlar ularga umuman ortiqcha ekanligini tushunib yetasan.

Bundan tashqari, yana bitta kichik narsani esingdan chiqarmagin. Bu ham bo'lsa, telefoning klaviaturasida kimgadir sms-xabar, telegram-xabar yozayotgandagi klaviaturadan eshitiladigan "bliq-bliq" ovozlarni o'chirib qo'yishlikni unutmagin.

Chunki sen ana shu "bliq-bliq" ovoz chiqarib qaysidir qizchang bilan miriqib sms-xabarlashayotgan paytingda, ayni vaqtda sening oldingda o'tirgan inson sendan asabiylashib, ichida sening yaqin qarindoshlaringni birma-bir "eslab chiqayotgan" bo'lishi mumkin.

Shu sababli shogirdim Bryus Li! Telefonda yozishayotganda, o'sha klaviatura ovozini o'chirib qo'yib keyin yozishgin, agar o'chirishni iloji bo'lmasa, menga o'xshab yangi bitta Iphone 16 pro olvogin, yangilari hozir ovozsiz chiqyaptikan".

nozik mavzuning davomi.


NIMA DEB O'YLAYSIZ?

Bundan oldin aytganimizdek, hozirgi global dunyoda surrogat onalik shartnomasiga nisbatan talab borgan sari ortib bormoqda. Hattoki bir qancha mashhur insonlar mana shunday amaliyotga qo'l urganlari (Priyanka Chopra) hamda kelgusida qo'l urish niyatida yurganlari (Selena Gomez) ham yo'q emas albatta.

Albatta hozirgi vaqtda ushbu amaliyot bizning O'zbekiston diyorlariga ham o'z shabadasini sekin esib kelmoqda. Qani unda o'z o'zidan sizga savol beramiz...👇

NIMA DEB O'YLAYSIZ, O'ZBEKISTON QONUNCHILIGI USHBU SURROGAT ONALIK AMALIYOTIGA RUXSAT BERGANMI YOKI TAQIQLAGANMI?🧐


O'ylab oldingizmi? Yaxshi, unda bizning o'ylagan o'yimizni bir eshitib ko'ringchi.

❗️Oila kodeksi 207-moddasi tug'ilgan bolaning metrkasiga qanday qilib bolaning ota-onasini belgilanishini tartibga soladi.

Shu 207-moddaning oxirgi qismiga ko'ra,

o‘zaro nikohda bo‘lgan va boshqa ayolga homilani rivojlantirish maqsadida embrionni ko‘chirishga yozma rozilik bergan shaxslar bolani tuqqan ayolning (qondosh onaning) roziligi bilangina bolaning ota-onasi deb yozilishi mumkin degan qoida bor.

⚠️ Xo'sh, buni tushundingizmi? Bu modda orqali O'zbekiston qonunchiligi surrogat onalik shartnomasi orqali tug'ilgan bolani bilvosita tan olayotganligini bildiradi.

Haa albatta, endi bemalol bizning milliy qonunchiligimizga ham surrogat onalik shartnomasi elementlari kirib kelgan deb ayta olishimiz mumkin.

Biz qonunchilikdagi bunday "ayyorona ruxsat etuvchi" qoidalarni shaxsni o'z jinsini o'zgartirish mavzusida ham gaplashgan edik. Ya'ni, qonun normasini tuzayotganda, bunday "ayyorona ruxsat etuvchi" normalarni moddaning ichiga ko'rinmas tarzda tiqib qo'yib, bu orqali "qani agar kallang ishlasa, o'zing o'qib tushunib xulosa qilib ol" kabi mazmunni ilg'ab olishimiz mumkin.

❗️Aslida bu surrogat onalik amaliyoti islom dini ta'limoti bo'yicha taqiqlangan amaliyot hisoblanadi.

MUHIM! Shu sababli, menimcha bunday amaliyotni O'zbekiston qonunlarida shunday ayyorona, berkitgan holda emas, balki ochiqdan ochiq hamma bilib olishi mumkin bo'lgan holda joylashtirilganda edi, bu butun xalqning katta nafrati, g'azabiga duchor bo'lish bilan barobar bo'lardi.

Ha yana aytmoqchi, endi anonim savol-javob qilishni biroz to'xtataymikan deyapman, bo'lmasa o'zimni ochilmagan sirlarim ochilib ketib qolyapti😁

Bugun soat 20:00 da va 21:00 da yana ikkita ajoyib post tashlamoqchiman,😊

Ustoz Ip man ham ancha zerikib qoldi😁

ME'YORNI USHLASH JUDA MUHIM


Menimcha, hozirgi vaqtda meni juda ham tashvishga soladigan, biroz o'zim uchun mas'uliyat vujudga keltiradigan narsa bu - har bir o'zimizning xatti-harakatimizda me'yorni saqlay olishlik deb o'ylayman.

✅ Buni ikkita holat bilan tushuntirib berishni afzal ko'raman.

➖1. Odamlarning sen haqingdagi gaplariga hadeb quloq solib o'tirishga, "odamlar nima deydi?" deb har bir o'zimiz bajarayotgan ishda hadik, qo'rquv hissi bilan yashashga hech bir inson majbur emas hisoblanadi. Lekin bunda ham me'yorni ushlash kerak.

Ya'ni, odamlarning gapiga hadeb e'tibor beravermaylik, ammo shu bilan birga bee'tibor ham bo'lmaylik. Chunki agar biz yuqoridagi "odamlar gapiraveradida" degan shiorga qat'iy yopishib olsak, ba'zi insonlarning bizni yaxshilikka chorlovchi nasihatlarini, bizning qaysidir nojo'ya bajarayotgan ishlarimiz haqida bizga maslahatlar beruvchi bizning yaqin insonlarimizning fikrini e'tibordan chetda qoldirib qo'yishimiz mumkin.

➖ 2. Har bir inson zoti borki, kelajakda o'zi uchun eng yaxshi narsalarni istaydi, ularga erishish uchun tinmay harakat qiladi. Buning turlaridan biri karyera deb nomlanadi. Inson o'z karyerasi tomon olg'a borish, uning maqsadlarini, uning harakatlarini bo'lar-bo'lmasga tanqid qilib kamsitadigan insonlarni o'zining changida qoldirib ketish nafasi bilan yashaydi.

Biroq, inson o'z karyerasi tomon faqat olg'a intilib borarkan, ba'zida kerakli paytda to'xtab biroz tin olishi, faqat uning tepasida turgan karyerasiga emas, balki o'sha karyerasi kabi muhim ahamiyatga ega bo'lgan yonidagi ba'zi boshqa ishlarga ham e'tibor berishi kerak bo'ladi. Aks holda, inson ko'r-ko'rona faqat o'z karyerasi tomon quvib borishi, uning uchun boshqa muhim bo'lgan ishlardan mahrum qilib qo'yadi.

❗️Shu sababli, inson har bir ishni shijoat bilan, kuchli g'ayrat bilan qilishi, ammo o'z vaqti kelganda me'yorni ham ushlay bilishi kerak bo'ladi.

va'da qilingan post


O'ZBEKISTONDA O'Z JINSINI O'ZGARTIRISH TAQIQLANGANMI?

Hozirgi global dunyoda xalqaro inson huquqlarining "yangicha, zamonaviy" turlari paydo bo'lib bormoqda. Shulardan biri bu - ba'zi mamlakatlar o'z qonunchiligi orqali fuqarolarga o'z jinsini o'zgartirish imkonini berganligidir. O'zbekistonda ham fuqarolarning shunday huquqi mavjudmi yoki yo'qmi? Ushbu post orqali shu haqida biroz ma'lumot berib o'tamiz.

O'zbekiston Republikasi Oila kodeksi 201-moddasiga ko'ra, farzandlikka olish, otalikni belgilash, familiya, ism va ota ismini o‘zgartirish, jinsni o‘zgartirish kabi voqea va faktlar ushbu moddaning birinchi qismida nazarda tutilgan fuqarolik holatlari dalolatnomalariga tegishli o‘zgartirishlar kiritishda ifodalanadi.

Bundan tashqari, Vazirlar Mahkamasining 550-sonli qarori asosida tasdiqlangan Fuqarolik holatini qayd etish qoidalarining 139-bandiga muvofiq, fuqarolik dalolatnomalariga o'zgartirish kiritishga, shaxsning o'z jinsini o'zgartirganligi sabab bo'lishi mumkinligi belgilangan.

Agar yuqoridagi moddalarga mantiqan e'tibor bersak, bunda shaxsning o'z jinsini o'zgartirganlik holati tegishlicha fuqarolik holati dalolatnomasiga kiritilar ekan. Bu degani "agar sen o'z jinsingni o'zgartirgan bo'lsang, bu haqida FHDYoga xabar bergin, sening jinsing haqidagi ma'lumotlarga tegishlicha o'zgartirish kiritib qo'yiladi" degan mazmunni ilg'ash mumkin.

⚠️ Yana ham soddaroq tarzda tushuntirsak, O'zbekiston qonunchiligi qaysidir ma'noda fuqarolarning o'z jinsini o'zgartirish huquqini tan olyapti.

❗️Bundan tashqari, bizdagi Ma'muriy javobgarlik to'g'risidagi kodeksda ham, Jinoyat kodeksida ham shaxsning o'z jinsini o'zgartirganlik uchun biror javobgarlik begilanmagan. Bundan biz O'zbekistonda shaxs o'z jinsini o'zgartirishiga hech qanday taqiq yo'q degan xulosaga kelamiz.

MUHIM! Ammo O'zbekiston qonunchilik hujjatlarida aniq va oshkora tarzda ushbu huquq e'tirof etilganligini uchratmaymiz. Menimcha buning sababi - oddiy xalqning katta g'azabini keltirib chiqarish ehtimoli mavjudligi bo'lishi mumkin.


➖Qiyoslash mumkinki, Germaniya Fuqarolik kodeksi 208-moddasiga ko'ra, shaxs 21 yoshga yetgunicha, sudga nisbatan uning jinsni erkin tanlash huquqi buzilayotganligi bo'yicha da'vo taqdim eta olmasligi e'tirof etilgan.

Shuningdek, Germaniyada 2024-yil 1-iyunda "The Self-Determination Act " hujjati qabul qilingan bo'lib, ushbu hujjatga ko'ra, fuqarolar o'z jinsini erkin tanlay olish, o'z jinsini erkin o'zgartirish huquqi e'tirof etiladi.



(ushbu ma'lumot orqali qaysidir shaxsni o'z jinsini o`zgartirishga chorlash maqsad qilinmadi)

@huquqlabaratoriyasi

Kechki payt bitta ajoyib post tashlaymiz deb xabar bergan edik. Kutayotganlar bormi?

Xonanda Konstaning "Ko'k jiguli" qo'shig'i haqidagi fikri:

— "Ijodkor sifatida “Ko‘k Jiguli” taronasini past baholayman. Hamdam Sobirovning o‘zi ijro etganida boshqa gap edi. Lekin bir necha yillik kuchli obrazdagi ovoz ampulasiga ega bo‘lgan Ozoda Nursaidovaning buni ijro etgani yaxshi emas. Chunki ijodkor bu toifadagi qo‘shiqlarga nisbatan ancha kuchli ovozga ega. O‘ylashimcha, bu qo‘shiq Ozoda Nursaidovaning minusi bo‘ldi. Orqasidan chiqargan “Lada”si ham xuddi shunday. Nahotki shularsiz uni hech qayerga aytishmayotgan bo‘lsa? Bunday qo‘shiqlarsiz ham uning sanʼatdagi o‘rni bor edi va kerakli sanʼatkor edi. Menimcha, bu qandaydir poyganing oqibatlari bo‘lsa kerak. “Men ham trendda bo‘lishim kerak. Kim hit tarona yaratayotgan bo‘lsa u bilan hamkorlik qilishim kerak”, deyishning oqibati shunday bo‘ladi".

Shuningdek, Konsta hozirgi vaqtgacha biror marta pul evaziga to'yga chiqmaganligini va bundan keyin ham chiqmasligini, san'atkorning to'ylarda yurishi uning ijodiy faoliyatiga yomon ta'sir qilishini aytib o'tibdi.



(Shaxsan men ushbu repper xonandani tinglamayman. Lekin intervyusida bergan fikrlarida ancha jon bor deb o'ylayman).

#Ustoz Ip Mandan 3-tavsiya.


"Ey Bryus Li shogird!

Mana seni ham ancha aqling kirib, ko'k choynakka ko'k qopqoqni, oq choynakka oq qopqoqni to'g'ri qo'ya oladigan darajada fahm-farosating ancha o'sib qoldi.

Endi ko'cha-ko'yda yurganda, ayniqsa sal eni torroq piyodalar yo'lida bir guruh og'ayni do'stlaring bilan ketayotganda, anavi bo'yningni davomini ozgina ishlatishga harakat qilgin. Do'stlaring bilan gaplashib ketib butun boshli yo'lakni to'sib qo'ymagin, orqangdan kelayotgan odam yoki ro'parangdan kelayotgan odamni bu yo'lakdan o'tib keta olishiga qiyinchilik tug'dirmagin.

Bu yo'lni o'zingniki qilib olib, bemalol yurishni hayoldan chiqargin. Chunki ustalar o'z vaqtida bu yo'lni qurayotganda, sening katta xolang bu ustalarga choy tashib berib, qaralashib turmagan. Bu jamoat yo'lida sening tugul, o'sha katta xolangni ham oddiy yo'lovchi sifatida yurishdan boshqa hech qanday haqqisi yo'qligini tushunib yetgin.

Keyin shogird, yana bitta narsaga quloq sol. Oddiy yo'lda ketayotganda sal oldi-orqanga qarab yerga tuflashni o'rgangin. Yo'lda ketayotganda nos chekvolib, qayerga tuflashni bilmayotgan bo'lsang, ozgina sabr qilib sal chetga o'tib ishingni bajarginda, yana o'z yo'lingda davom etavergin.


Ey Bryus Li, mening yuqorida aytgan tavsiyalarimga, ayniqsa oxirgi aytgan tavsiyamga doimo amal qilgin. Agar oxirgisiga amal qila olmasang, hech bo'lmasa menga o'xshab kuniga bir mahal uyda yotar paytdan avval nosingni chekib keyin tuflab uxlagin".